ສພຊ ແຕ່ງຕັ້ງຮອງເລຂາທິການສະພາແຫ່ງຊາດ
31/08/2020

             (ສພຊ) ໃນວັນທີ 20 ສິງຫາ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ຄະນະເລຂາທິການສະພາແຫ່ງຊາດ (ສພຊ) ໄດ້ຈັດກອງປະຊຸມປະກາດແຕ່ງຕັ້ງບຸກຄະລາກອນພາຍໃນສະພາແຫ່ງຊາດ ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານ ສພຊ, ຜູ້ຊີ້ນໍາວຽກງານເລຂາທິການສະພາແຫ່ງຊາດ ມີທ່ານເລຂາທິການ-ຮອງເລຂາທິການສະພາແຫ່ງຊາດ ແລະ ບັນດາທ່ານຫົວໜ້າ-ຮອງຫົວໜ້າກົມ, ຫົວໜ້າຮອງ-ຫົວໜ້າພະແນກ ພ້ອມດ້ວຍພະນັກງານ-ລັດຖະກອນພາຍໃນ 6 ກົມທີ່ຂຶ້ນກັບຄະນະເລຂາທິການສະພາແຫ່ງຊາດເຂົ້າຮ່ວມ.

            ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການປະຕິບັດມະຕິຕົກລົງຂອງຄະນະປະຈໍາສະພາແຫ່ງຊາດ ວ່າດ້ວຍການແຕ່ງຕັ້ງຮອງເລຂາທິການສະພາແຫ່ງຊາດ ສະບັບເລກທີ 98/ຄປຈ, ລົງວັນທີ 30 ກໍລະກົດ 2020 ແລະ ການຕົກລົງຂອງ ຄະນະເລຂາທິການສະພາແຫ່ງຊາດ ຄັ້ງວັນທີ 17 ສິງຫາ 2020.

            ກອງປະຊຸມໄດ້ຮັບຟັງການຜ່ານມະຕິແຕ່ງຕັ້ງຮອງເລຂາທິການສະພາແຫ່ງຊາດ ເຊິ່ງໄດ້ແຕ່ງຕັ້ງເອົາທ່ານ ສິງຄໍາ ວົງພະຈັນ ຫົວໜ້າກົມເລຂານຸການ ຄະນະເລຂາທິການສະພາແຫ່ງຊາດ ຂຶ້ນເປັນຮອງເລຂາທິການສະພາແຫ່ງຊາດ.

            ໂອກາດດັ່ງກ່າວ ທ່ານຮອງປະທານສະພາແຫ່ງຊາດ ໄດ້ມີຄໍາເຫັນຊີ້ນໍາວ່າ: ການເປັນເສນາທິການທີ່ດີໃຫ້ແກ່ຄະນະປະຈໍາສະພາແຫ່ງຊາດ ແມ່ນໃຫ້ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງພາຍໃນສະພາແຫ່ງຊາດໃຫ້ມີຄວາມກົມກຽວ; ເອົາໃຈໃສ່ເຝິກຝົນຫລໍ່ຫລອມຕົນເອງໃຫ້ຫລາຍຂຶ້ນ;  ແກ້ໄຂບັນຫາຂໍ້ຄົງຄ້າງ ແລະ ປັບປຸງແບບແຜນວິທີເຮັດວຽກໃຫ້ມີການຫັນປ່ຽນທີ່ຕັ້ງໜ້າ ແລະ ທ່ານຍັງໄດ້ກ່າວອີກວ່າ: ສໍາລັບເລຂາທິການສະພາແຫ່ງຊາດ ໃນປີ 2020 ນີ້ ເປັນໄລຍະທ້າຍຂອງສະພາແຫ່ງຊາດຊຸດທີ VIII ເຊິ່ງຈະຕ້ອງໄດ້ສຸມໃສ່ການຮັບໃຊ້ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII, ການສະເຫລີມສະຫລອງຄົບຮອບ 45 ປີ ຂອງສະພາແຫ່ງຊາດ ແລະ ການກະກຽມໃຫ້ແກ່ການເລືອກຕັ້ງ ເພື່ອຮັບປະກັນໃຫ້ແກ່ການປະຕິບັດວຽກງານດັ່ງກ່າວໃຫ້ໄດ້ຮັບຜົນ ສໍາເລັດນັ້ນ ຄະນະເລຂາທິການຈະຕ້ອງໄດ້ເອົາໃຈໃສ່ໃນການວາງແຜນ ໂດຍສະເພາະແມ່ນແຜນວຽກຈຸດສຸມ 6 ເດືອນທ້າຍປີຂອງຄະນະເລຂາທິການສະພາແຫ່ງຊາດ ສືບຕໍ່ສຶກສາອົບຮົມພະນັກງານໃຫ້ມີຄຸນສົມບັດສິນທໍາປະຕິວັດ, ມີຄຸນທາດການເມືອງທີ່ໜັກແໜ້ນ, ສ້າງພະນັກງານໃຫ້ມີຄວາມຮູ້ຄວາມສາມາດໃນລະດັບອັນແນ່ນອນ ມີການ ແບ່ງງານແບ່ງຄວາມຮັບຜິດຊອບໃຫ້ແຕ່ລະພາກສ່ວນຢ່າງລະອຽດ ເພື່ອຮັບປະກັນການປະຕິບັດໜ້າທີ່ວຽກງານໃຫ້ໄດ້ຮັບຜົນສໍາເລັດ. ​

                                                                         ແຫຼ່ງຂ່າວທີ່ມາ: ສະພາແຫ່ງຊາດ