ສພຊ ເລົ່າມູນເຊື້ອວັນລັດຖະທຳມະນູນ ແລະ ວັນສ້າງຕັ້ງແນວລາວສ້າງຊາດ
25/08/2020

           (ສ​ພ​ຊ) ເພື່ອ​ເສີມ​ຂະ​ຫຍາຍ​ມູນ​ເຊື້ອ​ແຫ່ງ​ຄວາມ​ສາ​ມັກ​ຄີ​ໃຫ້​ເປັນ​ປຶກ​ແຜ່ນ​ແໜ້ນ​ໜາ​ຂອງ​ບັນ​ດາ​ເຜົ່າ, ຊັ້ນ​ຄົນ, ເພດ​ໄວ​ພາຍ​ໃຕ້​ການ​ນຳ​ພາ​ຂອ​ງ​ພັກ ທັງ​ເປັນການໂຄສະນາສຶກສາອົບຮົມສະມາຊິກພັກ, ພະນັກງານ ແລະ ລັດ​ຖະ​ກອນ ເຫັນໄດ້ບົດບາດ, ຄວາມໝາຍຄວາມສຳຄັນ ແລະ ເນື້ອ​ໃນ​ຂອງ​ລັດ​ຖະ​ທຳ​ມະ​ນູນ​ ແຫ່ງ ສ​ປ​ປ​ລາວ ເພ​ີ່ມ​ທະ​ວີ​ສະ​ຕິ​ເຄົາ​ລົບ​ລັດ​ຖະ​ທຳ​ມະ​ນູນ ແລະ ກົດ​ໝາຍ​ຢ່າງ​ຖືກ​ຕ້ອງ ແລະ ເຂັ້ມ​ງວດ; ຕອນ​ເຊົ້າ​ວັນ​ທີ 14 ສິງ​ຫາ​ຜ່ານ​ມາ, ​ທີ່​ຫ້ອງ​ປະ​ຊຸມ​ຄ​ະ​ນະ​ເລ​ຂາ​ທິ​ການສະ​ພາ​ແຫ່ງ​ຊາດ ນະ​ຄອນ​ຫລວງວຽງ​ຈັນ, ສ​ະ​ພາ​ແຫ່ງ​ຊາດ (ສ​ພ​ຊ) ໄດ້​​ຈັ​ດກອງ​ປະ​ຊ​ຸມ​ປາ​ຖະ​ກະ​ຖາ​​ເລົ່າ​ມູນ​ເຊື້ອວັນ​​ລັດ​ຖະ​ທ​ຳ​ມະ​ນູນ ​ແຫ່ງ ສ​ປ​ປ​ລາວ ຄົບ​ຮອບ 29 ປີ (15 ສິງຫາ 1991-15 ສິງຫາ 2020) ແລະ ​ວັນ​ສ້າງ​ຕັ້ງ​ແນວ​ລາວ​ສ້າງ​ຊາດ ຄົບ​ຮອບ 70 ປີ (13 ສິງຫາ 1950-13 ສິງຫາ 2020) ​ໂດຍ​ການ​ປາ​ຖະ​ກະ​ຖາ​ຂອງ​ທ່ານ ສົມ​ພູ ດວງ​ສະ​ຫວັນ ປະ​ທານ​ກຳ​ມາ​ທ​ິ​ການ​ວັດ​ທະ​ນະ​ທຳ-ສັງ​ຄົມ ສ​ພ​ຊ ແລະ ທ່ານ ຈັນ​ທະ​ວົງ ແສນ​ອາ​ມາດ​ມົນ​ຕີ ຮອງ​ປະ​ທານ​ສູນ​ກາງ​ແນວ​ລາວ​ສ້າງ​ຊາ​ດ; ມີ​ຄະ​ນະ​ກົມ, ຄະ​ນະ​ສູນ, ຄະ​ນະ​ພະ​ແນກ, ພະ​ນັກ​ງາ​ນ-ລັດ​ຖະ​ກອນ​ພາຍ​ໃນ​ ສ​ພ​ຊ ເຂົ້າ​ຮ່ວມ​ຢ່າ​ງ​ພ້ອ​ມ​ພຽງ.

            ໂອ​ກາດ​ດັ່ງ​ກ່າວ, ​ທ່ານ ສົມ​ພູ ດວງ​ສະ​ຫວັນ ໄດ້​ຍົກ​ໃຫ້​ເຫັນຄວາມໝາຍ, ​ຄວາມສຳຄັນ​, ສະພາບຄ​ວາມ​ຈ​ຳ​ເປັ​ນ​ທີ່​ຕ​້​​ອງສ້າງ​ລັດ​ຖະ​ທຳ​ມະ​ນູນ ແລະ ການປັບ​ປຸງ​ລັດຖະທຳ​ມະນູນ​ໃນ​ໄລ​ຍະ​ຜ່ານ​ມາ ເຊິ່ງລັດຖະທຳມະນູນ ແມ່ນກົດໝາຍພື້ນຖານຂອງຊາດ, ເປັນການຫັນເອົາແນວທາງນະໂຍບາຍປ່ຽນແປງໃໝ່ຢ່າງຮອບດ້ານ ແລະ ມີຫລັກການຂອງພັກປະຊາຊົນປະຕິວັດລາວ ມາເປັນກົດໝາຍພື້ນຖານຂອງລະບອບປະຊາທິປະໄຕປະຊາຊົນລາວ ໂດຍຖືກຮັບຮອງເອົາໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນສູງສຸດຊຸດທີ II ໃນປີ 1991 ແລະ ປະກາດໃຊ້ຢ່າງເປັນທາງການໃນວັນທີ 15 ສິງຫາ 1991; ​ໃນປີ 2003 ລັດຖະທໍາມະນູນ ແຫ່ງ ສປປລາວ ໄດ້ມີການປັບປຸງໃນກອງປະຊຸຸມສະໄໝສາມັນເທື່ອທີ 3 ຂອງ ສ​ພ​ຊ ຊຸດທີ V ປະກອບມີ 11 ໝວດ 98 ມາດຕາ ແລະ ປີ 2015 ໄດ້ມີການປັບປຸງເປັນຄັ້ງທີ 2 ໃນກອງປະຊຸມສະໄໝສາມັນເທື່ອທີ 10 ຂອງ ສ​ພ​ຊ ຊຸດທີ VII ປະກອບມີ 14 ໝວດ 119 ມາດຕາ.

           ຈາກນັ້ນ, ທ່ານ ຈັນ​ທະ​ວົງ ແສນ​ອາ​ມາດ​ມົນ​ຕີ ​ໄດ້​ປາ​ຖະ​ກະ​ຖາ​ກ່ຽວ​ກັບວັນ​ສ້າງ​ຕັ້ງ​ແນວ​ລາວ​ສ້າງ​ຊາດ ຄົບ​ຮອບ 70 ປີ ໂດຍ​ໄດ້​ຍົກ​ໃຫ້​ເຫັນ​ຕົ້ນ​ກຳ​ເນີດ ແລະ ການ​ເຕີບ​ໃຫຍ່​ຂະ​ຫຍາຍ​ຕົວ​ຕະ​ຫລອດ​ໄລ​ຍະ 70 ປີ​ຜ່ານ​ມາ ເຊິ່ງ​ແນວ​ລາວ​ສ້າງ​ຊາດໃນ​ປັດ​ຈຸ​ບັນ​ ແມ່ນ​ໄດ້​ສືບ​ທອດ ແລະ ເສີມ​ຂ​ະ​ຫຍາຍ​ມູນ​ເຊື້ອ​ມາ​ຈາກ​ແນວ​ລາ​ວ​ອິ​ດ​ສະ​ຫລະ ກໍ​ຄື​ແນວ​ລາວ​ຮັກ​ຊາ​ດ​ໃນ​ເມື່ອ​ກ່ອນ ໂດຍ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ວັນ​ທີ 13 ສິງ​ຫາ 1950 ພ​າຍ​ໃຕ້​ກາ​ນ​ຊີ້​ນຳ​ໂດຍ​ກົງ​ຈາ​ກ​ພັກ​ປະ​ຊາ​ຊົນ​ປະ​ຕິ​ວັດ​ລາວ ເຊິ່ງ​ເປັນ​ອົງການ​ຈັດ​ຕັ້ງ​ສຳ​ພັນ​ທາງ​ການ​ເມືອງ​ ທັງ​ເປັນ​ຕົວ​ແທນ​ໃຫ້​ແກ່​ຊົ​ນ​ຊັ້ນ, ຊັ້​ນ​ຄົນ, ຊົນ​ເຜົ່າ, ສາ​ສະ​ໜາ, ເພດ​, ໄວ ແລະ ຊາວ​ລາວ​ທີ່ດ​ຳ​ລົງ​ຊີ​ວິດ​ຢູ່​ຕ່າງ​ປະ​ເທດ, ມີ​ໜ້າ​ທີ່​ເຕົ້າ​ໂຮມ​ຄວາມ​ສາ​ມັກ​ຄີ​ປອງດອງ​ຂອງ​ປະ​ຊາ​ຊົນ​ລາວ​ບັນ​ດາ​ເຜົ່າ​ໃນ​ກ​ານ​ປະ​ຕິ​ບັດ​ສອງ​ໜ້າ​ທີ່​ຍຸດ​ທະ​ສາ​ດຄື:​ ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ. 

                                                                                          ​ແຫຼ່ງຂ່າວທີ່ມາ: ສະພາແຫ່ງຊາດ