ທຫລ ສຳເລັດກອງປະຊຸມສຳມະນາ ວິຊາສະເພາະ
21/08/2020

          ອົງ­ຄະ​ນະ​ພັກ​ທະ­ນາ­ຄານ​ແຫ່ງ ສປປ ລາວ  (ທຫລ) ໄດ້​ຈັດ​ກອງ​ປະ​ຊຸມ​ສໍາ​ມະ​ນາ​ວິ­ຊາ​ສະ­ເພາະ ຂຶ້ນ​ວັນ​ທີ 11 ສິງ­ຫາ 2020 ທີ່​ສະ­ໂມ­ສອນ​ສະ​ຖາ​ບັນ​ການ​ທະ­ນາ­ຄານ, ເພື່ອ​ສ້າງ​ຂະ­ບວນ​ການ​ຂໍ່າ​ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່​ຜູ້​ແທນ ຄັ້ງ​ທີ IV ຂອງ​ອົງ­ຄະ​ນະ​ພັກ ທຫລ ທີ່​ຈະ​ຈັດ​ຂຶ້ນ​ໃນ­ຕໍ່­ໜ້າ​ນີ້ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ນາງ ປາ­ນີ ຢາ​ທໍ່​ຕູ້ ກໍາ​ມະ​ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ສະ­ພາ​ແຫ່ງ​ຊາດ, ມີ​ທ່ານ ສອນ​ໄຊ ສິດ​ພະ​ໄຊ ກໍາ​ມະ​ການ​ສໍາ​ຮອງ​ສູນ​ກາງ​ພັກ ເລ­ຂາ​ຄະ­ນະ​ພັກ ຜູ້​ວ່າ­ການ ທຫລ,

          ມີ​ບັນ​ດາ​ກໍາ​ມາ​ທິ​ການ​ທີ່​ກ່ຽວ ­ຂ້ອງ​ຈາກ​ສະ­ພາ​ແຫ່ງ​ຊາດ, ຈາກ​ທະ­ນາ­ຄານ​ທຸ­ລະ​ກິດ​ເຂົ້າ​ຮ່ວມ.
ທ່ານ ສອນ​ໄຊ ສິດ​ພະ​ໄຊ ໄດ້​ລາຍ​ງານ​ຄວາມ​ຄືບ​ໜ້າ ­ດ້ານຕ່າງໆ​ ໃນ​ການກະ­ກຽມ​ຄວາມ​ພ້ອມ​ການ​ຈັດ​ກອງ​ປະ ­ຊຸມ​ໃຫຍ່​ຜູ້​ແທນ ຄັ້ງ​ທີ IV ຂອງ​ອົງ­ຄະ​ນະ​ພັກ ທຫລ. ຈາກ​ນັ້ນ, ບັນ­ດາຄະ­ນະ​ກົມ ແລະ ຄະນະ ​ອໍາ​ນວຍ​ການ​ທະ­ນາ­ຄານ​ທຸ­ລະ​ ກິດ​-​ສະເພາະ​ກິດ ກໍໄດ້​ລາຍ​ ງານ​ຜົນ​ສໍາ​ເລັດ​ໃນ​ຜ່ານ​ມາ,  ສິ່ງ​ທ້າ​ທາຍ ແລະ ທິດ​ທາງໃນຕໍ່­ ໜ້າທີ່​ຕິດ​ພັນ​ກັບ​ໜ້າ­ທີ່​ການ ­ເມືອງ​ຕົ້ນ­ຕໍ​ຂອງ​ຂະ­ແໜງ­ການ​ທະ­ນາ­ຄານ ໂດຍ​ສະ­ເພາະ​ການ​ຮັກ­ສາ​ສະຖຽນ​ລະ​ພາບ​ເງິນ­ຕາ​ແຫ່ງ​ຊາດ; ການ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ລະ­ບົບ​ສະ​ຖາ​ບັນ​ການ​ເງິນ​ຢູ່ ສປປ​ລາວ; ການ­ຈັດ­ຕັ້ງ​ປະ­ຕິ­ບັດ​ນະ­ ໂຍ­ບາຍ​ການ​ເຂົ້າ​ເຖິງ​ການ​ບໍ ­ລິ­ການ​ທະ­ນາ­ຄານ ແລະ ການ​ສະ­ໜອງ​ທຶນ​ໃຫ້​ແກ່​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ; ການ​ສະ­ໜອງ​ທຶນ ເພື່ອ​ແກ້​ໄຂ​ຄວາມ­ທຸກ​ຍາກ ຊຶ່ງ​ໃນ​ໄລ­ຍະ​ 5 ປີ­ຜ່ານ­ມາ ເຖິງ​ວ່າ​ຈະ​ປະ​ເຊີນ​ກັບ​ສິ່ງ​ທ້າ​ທາຍ​ຫຼາຍ​ດ້ານ​ຈາກ​ທັງ​ປັດ​ໄຈພາຍ​ນອກ ແລະ ປັດ​ໄຈ​ພາຍ​ໃນ​ທີ່​ບໍ່​ເອື້ອ​ອໍາ​ນວຍ​ຕໍ່​ການ​ຮັກ­ສາ​ສະ­ຖຽນ​ລະ​ພາບ​ເງິນ­ຕາ​ແຫ່ງ​ຊາດ​ກໍ​ຕາມ ແຕ່​ຍັງ ສາ­ມາດ​ຮັກ­ສາ​ສະ​ຖຽນ​ລະ​ພາບ​ເງິນ­ຕາ​ແຫ່ງ​ຊາດ​ໄດ້, ການ​ລະ­ດົມ​ເງິນ​ຝາກ ເພີ່ມ​ຂຶ້ນ​ສະ­ເລ່ຍ13,48% ຕໍ່​ປີ, ສິນ ເຊື່ອ​ເພີ່ມ​ຂຶ້ນ ສະ­ເລ່ຍ 11,22% ຕໍ່​ປີ, ອັດ­ຕາ​ດອກ​ເບ້ຍ​ເງິນ​ຝາກ ແລະ ເງິນ​ກູ້​ຕໍ່າ​ລົງ.
            ສໍາ​ລັບ​ວຽກ​ງານ​ການ​ຮັກ ­ສາ​ສະ­ຖຽນ​ລະ​ພາບ​ດ້ານ​ການ​ເງິນ ໄດ້​ຫັນ​ການ​ຄຸ້ມ​ຄອງ​ໄປ​ສູ່​ການ­ຈັດ­ຕັ້ງ​ປະ­ຕິ ບັດ​ນິ­ຕິ​ກໍາ​ຢ່າງ​ມີ​ປະ­ສິດ­ທິ­ພາບ​ເພີ່ມ​ຂຶ້ນ, ຫັນ​ການ​ເງິນ​ນອກ​ລະ­ບົບ​ເຂົ້າ​ສູ່​ລະ ­ບົບ​ຫຼາຍ​ຂຶ້ນ, ມີ​ຕາ­ໜ່າງ​ການ​ບໍ​ລິການ​ຂອງ​ລະ­ບົບ​ສະ​ຖາ​ບັນ​ການ​ເງິນ​ກວ້າງ­ຂວາງ​ຂຶ້ນ. ຮອດ​ປັດ­ຈຸ­ບັນ ທະ­ນາ­ຄານ​ທຸ­ລະ​ກິດ ມີ​ທັງ​ໝົດ 44 ແຫ່ງ ເພີ່ມ​ຂຶ້ນ 3 ແຫ່ງ, ມີ 114 ສາ­ຂາ ເພີ່ມ​ຂຶ້ນ 26 ສາ­ຂາ, ມີ 535 ໜ່ວຍ​ບໍ­ລິ ­ການ ເພີ່ມ​ຂຶ້ນ 64 ໜ່ວຍ; ສໍາ​ລັບ​ສະ​ຖາ​ບັນ​ການ​ເງິນ​ທີ່­ຢູ່​ພາຍ​ໃຕ້​ການ​ຄຸ້ມ​ຄອງ​ຂອງ ທຫລ ມີ​ທັງ​ໝົດ 180 ແຫ່ງ ເພີ່ມ​ຂຶ້ນ 57 ແຫ່ງ. ພ້ອມ​ກັນ ນັ້ນ, ກໍ່​ໄດ້​ນໍາ​ສະ­ເໜີ​ບາງ​ຂໍ້­ຄົງ­ຄ້າງ ທີ່​ຕ້ອງ​ສືບ­ຕໍ່​ແກ້​ໄຂ​ໃນ​ຕໍ່​ໜ້າ.
 ໃນ​ໂອ­ກາດ​ນີ້, ທ່ານ ນາງ ປາ­ນີ ຢາ​ທໍ່​ຕູ້ ໄດ້ ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ໝາກ­ຜົນ​ທີ່​  ຂະແໜງ​ການ​ທະ­ນາ­ຄານ​ຍາດ​ ມາ​ໄດ້​ໃນ​ໄລ­ຍະ 5 ປີ ຜ່ານ​ມາ, ພ້ອມ​ທັງ​ເນັ້ນ​ໜັກ​ໃຫ້​ຂະ­ແໜງ​ທະ­ນາ­ຄານ ສືບ­ຕໍ່​ຮັກ­ສາ​ສະ​​ຖຽນ​ລະ​ພາບ​ເງິນ­ຕາ​ແຫ່ງ​ຊາດ​ໃຫ້​ໝັ້ນ​ທ່ຽງ; ສຸມ​ໃສ່​ການ​ຊຸກ­ຍູ້​ການ​ສະ­ໜອງ​ສິນ​ເຊື່ອ ເພື່ອ​ສົ່ງ­ເສີມ​ຫົວ­ໜ່ວຍ​ທຸ­ລະ​ກິດ​ຂະ ­ໜາດ​ນ້ອຍ ແລະ ກາງ ພ້ອມ​ທັງ​ກຳ­ນົດ​ນະ­ໂຍ­ບາຍ​ສິນ​ເຊື່ອ​ດັ່ງ­ກ່າວ ຢ່າງ​ຈະ­ແຈ້ງ; ເພີ່ມ​ທະ­ວີ​ການ​ຄຸ້ມ​ຄອງ, ພັດ­ທະ­ນາ​ລະ­ບົບ​ທະ­ນາ­ຄານ, ສະ​ຖາ​ບັນ​ການ​ເງິນ ແລະ ລະ­ບົບການ​ຊໍາ​ລະ​ຕ່າງໆ​ໃຫ້​ທັນ​ສະ­ໄໝ, ລວມ​ສູນ, ປອດ​ໄພ ແລະ ປັບ­ປຸງ​ພື້ນ­ຖານ​ໂຄງ​ລ່າງ​ໃນ​ຂະ­ແໜງ ­ການ​ທະ­ນາ­ຄານ ໂດຍ​ສະ­ເພາະ​ແມ່ນ ບັນ­ດາ​ນິ­ຕິ​ກຳ, ການ​ບັນ­ຊີ ແລະ ກົນ​ໄກ​ການ​ຄຸ້ມ​ຄອງ​ທະ ­ນາ­ຄານ​ທຸ­ລະ​ກິດ ແລະ ສະ​ຖາ​ບັນ​ການ​ເງິນ​ໃຫ້​ຄົບ​ຖ້ວນ, ສອດ­ຄ່ອງ ແລະ ຫຍັບ​ເຂົ້າ​ໃກ້​ກັບ​ມາດ­ຕະ­ຖານ​ສາ­ກົນ ເທື່ອ​ລະ​ກ້າວ.

                                                                               ​ແຫຼ່ງຂ່າວທີ່ມາ: ໜັງສືພິມປະຊາຊົນ