ສະຫະພັນກໍາມະບານ ສພຊ ເປີດກອງປະຊຸມໃຫຍ່ຄັ້ງທີ V
16/07/2020

           (ສພຊ) ໃນຕອນເຊົ້າວັນທີ 10 ກໍລະກົດ 2020 ສະຫະພັນກໍາມະບານສະພາແຫ່ງຊາດ (ສພຊ) ໄດ້ເປີດກອງປະຊຸມໃຫຍ່ຄັ້ງທີ V ທີ່ຫ້ອງປະຊຸມໃຫຍ່ ສພຊ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງ ສະຫາຍ ສຸບັນ ສະວະບຸດ ປະທານສະຫະພັນກໍາມະບານ ສພຊ, ເຂົ້າຮ່ວມມີສະຫາຍ ນາງ ສີໃສ ລືເດດມູນສອນ ຮອງເລຂາຄະນະບໍລິຫານງານພັກສະພາແຫ່ງຊາດ, ສະຫາຍ ປ້ານ ນ້ອຍມະນີ ປະທານຄະນະບໍລິຫານງານສະຫະພັນກໍາມະບານລາວ, ມີບັນດາຮອງປະທານສະຫະພັນກໍາມະບານ ສພຊ, ຄະນະໜ່ວຍຮາກຖານ ແລະ ສະມາຊິກກໍາມະບານ ພາຍໃນສະຫະພັນກໍາມະບານ ສພຊ ພ້ອມດ້ວຍແຂກຖືກເຊີນເຂົ້າຮ່ວມ.

            ຈຸດປະສົງຂອງການຈັດກອງປະຊຸມຄັ້ງນີ້ ເພື່ອເປັນການສັງເກດຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງສະຫະພັນກໍາມະບານ ສພຊ ແຕ່ປີ 2015-2019 ແລະ ກໍານົດທິດທາງ 5 ປີຕໍ່ໜ້າ ແຕ່ 2020-2024; ຮັບຟັງການຜ່ານບົດສໍາຫລວດການນໍາພາຂອງຄະນະບໍລິຫານງານສະຫະພັນກໍາມະບານ ສພຊ ຊຸດທີ IV ໃນ 5 ປີຜ່ານມາ; ເລືອກຕັ້ງເອົາຄະນະບໍລິຫານງານສະຫະພັນກໍາມະບານສະພາແຫ່ງຊາດ ຊຸດທີ V ເພື່ອສືບຕໍ່ວຽກງານກໍາມະບານໃນ 5 ປີຕໍ່ໜ້າ (2020-2024) ແລະ ຮັບຟັງການໂອ້ລົມໃຫ້ທິດຊີ້ນໍາຈາກ ຮອງເລຂາຄະນະບໍລິຫານງານພັກສະພາແຫ່ງຊາດ ແລະ ຄະນະບໍລິຫານງານສູນກາງສະຫະພັນກໍາມະບານລາວ.

            ກອງປະຊຸມໄດ້ຄົ້ນຄວ້າ ແລະ ຕົກລົງບັນຫາດັ່ງນີ້: ເຫັນດີເປັນເອກະພາບຕໍ່ບົດລາຍງານການເມືອງກ່ຽວກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ກໍຄືການຕີລາຄາການເຄື່ອນໄຫວວຽກງານໄລຍະ 5 ປີຜ່ານມາ ເຊິ່ງໄດ້ຕີລາຄາຜົນສໍາເລັດ 8 ວຽກ, ຂໍ້ຄົງຄ້າງ, 4 ບົດຮຽນຖອດຖອນໄດ້ ແລະ ກໍານົດທິດທາງວຽກງານໃນ 5 ປີຕໍ່ໜ້າ (2020-2024) ໂດຍກໍານົດ 6 ວຽກ ແລະ 5 ມາດຕະການ; ຕີລາຄາສູງຕໍ່ການບໍລິຫານງານໃນການຊີ້ນໍາ-ນໍາພາວຽກງານກໍາມະບານ ສພຊ ບັນລຸຜົນສໍາເລັດທີ່ຕັ້ງໄວ້, ມີຄວາມເປັນເອກະພາບສູງພາຍໃນຄະນະບໍລິຫານງານ, ນິຕິ ກໍາຂອງພັກ-ລັດ ກໍຄືການເຕົ້າໂຮມຄວາມສາມັກຄີເປັນກໍາລັງແຮງໃນທຸກວຽກງານ ແລະ ເປັນເຈົ້າການປົກຄອງສິດຜົນປະໂຫຍດຂອງສະມາຊິກກໍາມະບານ, ພະນັກງານ-ລັດຖະກອນ, ກອງປະຊຸມເນັ້ນໃຫ້ຄະນະບໍລິຫານງານຊຸດໃໝ່ ຈົ່ງເສີມຂະຫຍາຍມູນເຊື້ອຕັ້ງໜ້າ, ແກ້ໄຂຂໍ້ຄົງຄ້າງທີ່ຜ່ານມາ ແລະ ຍົກສູງຄວາມສາມາດຊີ້ນໍາ-ນໍາພາ ແລະ ເປັນແບບຢ່າງນໍາໜ້າໃນຄະນະບໍລິຫານງານສູງເດັ່ນກວ່າເກົ່າ; ກອງປະຊຸມໄດ້ປ່ອນບັດເລືອກຕັ້ງເອົາຄະນະບໍລິຫານງານສະຫະພັນກໍາມະບານສະພາແຫ່ງຊາດຊຸດໃໝ່ ຈໍານວນ 13 ສະຫາຍ; ກອງປະຊຸມຄັ້ງປະຖົມມະລືກຂອງຄະນະບໍລິຫານງານສະຫະພັນກໍາມະບານສະພາແຫ່ງຊາດຊຸດໃໝ່ເຫັນດີເປັນເອກະພາບເລືອກເອົາສະຫາຍ ອໍາໄພ ຈິດມານົນ ຮອງປະທານກໍາມາທິການກົດໝາຍ ເປັນປະທານ, ເລືອກເອົາສອງສະຫາຍເປັນຮອງຄື: ສະຫາຍ ເຂັມພອນ ອະໂນໄທ ແລະ ສະຫາຍ ນາງ ຫວັນໄຊ ຈັນທະລາ, ໄດ້ເລືອກເອົາສະຫາຍ ນາງ ຫວັນໄຊ ເປັນປະທານກວດກາຂອງ ສະຫະພັນກໍາມະບານ ສພຊ.

           ໂອກາດດັ່ງກ່າວ ກອງປະຊຸມຍັງໄດ້ຮັບຟັງການໂອ້ລົມຈາກສະຫາຍ ນາງ ສີໃສ ລືເດດມູນສອນ ເຊິ່ງສະຫາຍໄດ້ຕີລາຄາສູງຕໍ່ຜົນສໍາເລັດການເຄື່ອນໄຫວວຽກງານກໍາມະບານຢູ່ພາຍໃນສະພາແຫ່ງຊາດໄລຍະຜ່ານມາ ແລະ ເນັ້ນໃຫ້ຄະນະບໍລລິຫານງານ ສະຫະພັນກໍາມະບານສະພາແຫ່ງຊາດ ກໍຄືສະມາຊິກກໍາມະບານເອົາໃຈໃສ່ 4​ ບັນຫາຕົ້ນຕໍຄື: ຕັ້ງໜ້າເຮັດວຽກງານສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບໃນໜ້າທີ່ການເມືອງ ໂດຍສະເພາະ 3 ພາລະບົດບາດຂອງສະຫະພັນກໍາມະບານ ແລະ ດ້ານວິຊາສະເພາະຕາມສິດ ແລະ ໜ້າທີ່ຂອງສະພາແຫ່ງຊາດ, ວຽກຂະບວນການ ແລະ ລະບອບແບບແຜນວິທີເຮັດວຽກ, ການເຂົ້າຮ່ວມ ແລະ ຊີ້ທິດດັ່ງກ່າວ ໄດ້ເປັນກໍາລັງໃຈໃຫ້ແກ່ບັນດາສະຫາຍສະມາຊິກກໍາມະບານ ເພື່ອສືບຕໍ່ເຮັດໜ້າທີ່ວຽກງານທີ່ສູນກາງສະຫະພັນກໍາມະບານ ກໍຄືສະພາແຫ່ງຊາດມອບໝາຍໃຫ້ ແລະ ກອງປະຊຸມໃຫຍ່ຍັງໄດ້ຮຽກຮ້ອງມາຍັງການຈັດຕັ້ງກໍາມະບານຮາກຖານ, ສະມາຊິກກໍາມະບານ, ພະນັກງານ-ລັດຖະກອນທຸກສະຫາຍ ຈົ່ງພ້ອມກັນເປັນຈິດໜຶ່ງໃຈດຽວຮັກສາຄວາມສາມັກຄີທີ່ເປັນປຶກແຜ່ນແໜ້ນແຟ້ນ, ບຸກບືນສູ້ຊົນຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງນີ້ໃຫ້ບັນລຸຄາດໝາຍທີ່ວາງໄວ້ ແລະ ມອບໃຫ້ຄະນະບໍລິຫານ ງານສະຫະພັນກໍາມະບານສະພາແຫ່ງຊາດ ເປັນເຈົ້າການຊີ້ນໍາ-ນໍາພາການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ມີປະສິດທິຜົນ.

                                                                 ແຫຼ່ງຂ່າວທີ່ມາ: ສະພາແຫ່ງຊາດ