ປືກສາຫາລືກະກຽມດຳເນີນກອງປະຊຸມສະໄໝສາມັນ ເທື່ອທີ 9
25/06/2020

ປືກສາຫາລືກະກຽມດຳເນີນກອງປະຊຸມສະໄໝສາມັນ ເທື່ອທີ 9

(ສພຊ) ເພື່ອເຮັດໃຫ້ການດໍາເນີນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ (ສພຊ) ຊຸດທີ VIII ໄດ້ຮັບຜົນສໍາເລັດຕາມຄາດໝາຍທີ່ວາງໄວ້ ຄະນະປະຈໍາ ສພຊ ຈຶ່ງໄດ້ອະນຸຍາດໃຫ້ບັນດາກົງຈັກເສນາທິການທີ່ຂຶ້ນກັບ ສພຊ ຈັດກອງປະຊຸມປຶກສາຫາລື, ແລກປ່ຽນຄໍາຄິດຄໍາເຫັນຮ່ວມກັບບັນດາທ່ານ ສະມາຊິກສະພາແຫ່ງຊາດ (ສສຊ) ເພື່ອເປັນເອກະພາບໃນການດໍາເນີນກອງປະຊຸມ ດັ່ງກ່າວ. ໃນຕອນບ່າຍຂອງວັນທີ 23 ມິຖຸນາ 2020 ສພຊ ຈຶ່ງໄດ້ຈັດກອງປະຊຸມປຶກສາຫາລືຂຶ້ນທີ່ຫ້ອງປະຊຸມໃຫຍ່ ສພຊ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານ ສພຊ, ມີບັນດາທ່ານ ສສຊ, ຄະນະເລຂາທິການ, ຫົວໜ້າກົມ, ສູນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ກອງປະຊຸມ ໄດ້ຮັບຟັງການລາຍງານກ່ຽວກັບຄວາມພ້ອມ, ການອໍານວຍຄວາມສະດວກທາງດ້ານພາຫະ ນະ ແລະ ທາງດ້ານອື່ນໆ ໃນການດໍາເນີນກອງປະຊຸມໃນຄັ້ງນີ້ ຈາກຕາງໜ້າຄະນະປະຈໍາ ສພຊ, ຫົວໜ້າກອງເລຂາ, ເລຂາທິການສະພາແຫ່ງຊາດ ແລະ ແລກປ່ຽນຄໍາຄິດຄໍາເຫັນຖອດຖອນບົດຮຽນໃນການຈັດກອງປະຊຸມໃນຄັ້ງຜ່ານມາ.

ໂອກາດັ່ງກ່າວ ທ່ານຮອງປະທານ ສພຊ ໄດ້ມີຄໍາເຫັນຊີ້ນໍາຕໍ່ກອງປະຊຸມ ບາງບັນຫາສໍາຄັນວ່າ: ການດໍາເນີນກອງປະຊຸມໃນຄັ້ງນີ້ ແມ່ນຢູ່ໃນທ່າມກາງທີ່ສະພາບ ການເຝົ້າລະວັງ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ພະຍາດຕ່າງໆ ຕາມລະດູການ ໃຫ້ມີສະຕິລະວັງຕົວຕໍ່ການລະບາດຂອງພະຍາດດັ່ງກ່າວ; ໄລຍະເວລາການດໍາເນີນກອງປະຊຸມໃນຄັ້ງນີ້ ເປັນໄລຍະເວລາສັ້ນ ສະເໜີໃຫ້ບັນດາທ່ານ ສສຊ ໃຫ້ມີໃບໜ້າເຂົ້າຮ່ວມຄົບຕາມການລົງທະບຽນ ເພື່ອພ້ອມກັນພິຈາລະນາຮັບຮອງເອົາບັນຫາສໍາຄັນຂອງຊາດ; ຕໍ່ກັບເນື້ອໃນບົດລາຍງານຂອງລັດຖະບານ ສໍາຄັນທີ່ສຸດ ທີ່ຕິດພັນກັບການບໍລິຫານລັດຢູ່ຂັ້ນທ້ອງຖິ່ນໄລຍະເວລາຂອງການປະກອບຄໍາຄິດຄໍາເຫັນໃສ່ບົດລາຍງານລັດຖະບານມີເວລາພຽງ 4 ຊົ່ວໂມງເທົ່ານັ້ນ ສະເໜີໃຫ້ມີຕົວແທນແຕ່ລະເຂດເລືອກຕັ້ງມີຄໍາເຫັນຕໍ່ການລາຍງານຂອງລັດຖະບານ ແລະ ທ່ານຍັງໄດ້ສະເໜີໃຫ້ບັນດາທ່ານ ສສຊ ທີ່ເປັນຕົວແທນຂອງປະຊາຊົນທຸກທ່ານ ຕ້ອງໃຫ້ລົງຄະແນນສຽງຮັບຮອງເອົາບັນຫາຕ່າງໆ ແລະ ໃຫ້ເອົາໃຈໃສ່ຕໍ່ການໃຫ້ຄະແນນບຸກຄະລາກອນທີ່ສະພາແຫ່ງຊາດເລືອກຕັ້ງ ຫລື ຮັບຮອງເອົາການເລືອກຕັ້ງທີ່ຂຶ້ນລາຍງານ ຫລື ຊີ້ແຈງນັ້ນ ຂໍໃຫ້ເອົາໃຈໃສ່ຕາມເງື່ອນໄຂມາດຖານທີ່ກໍານົດໄວ້.