ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ວາງສີລາລືກ ແລະ ເປີດໂຄງການປຸກສ້າງຫໍສະພາແຫ່ງຊາດລາວ
06/11/2017

            (ສພຊ) ຕອນເຊົ້າວັນທີ 1 ພະຈິກ 2017 ທີ່ນະຄອນຫລວງວຽງຈັນ, ບັນ​ດາ​ການ​ນຳ​ຂັ້ນ​ສູງ​ຂອງ ສປປລາວ ​ແລະ​ ສສ.ຫວຽດນາມ ມີສະຫາຍ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່ຄະນະ​ບໍລິຫານ​ງານສູນ​ກາງ​ພັກ​ປະຊາຊົນປະຕິວັດ​ລາວ, ປະທານ​ປະ​ເທດ ​ແຫ່ງ ສປປລາວ, ສະຫາຍ ນາງ ປານີ ຢາ​ທໍ່​ຕູ້ ກຳມະການ​ກົມ​ການ​ເມືອງສູນກາງພັກ, ປະທານ​ສະພາ​ແຫ່ງ​ຊາດ ແຫ່ງ ສປປ​ລາວ, ສະຫາຍ ນາງ ຫງວຽນ ທິ ກິມ ​ເງິນ ກຳມະການ​ກົມ​ການ​ເມືອງ​ສູນ​ກາງ​ພັກ​ກອມ​ມູນິດ​ຫວຽດນາມ, ປະທານ​ສະພາ​ແຫ່ງ​ຊາດ ​ແຫ່ງ ສສ.ຫວຽດນາມ, ສະຫາຍ ສອນ​ໄຊ ສີ​ພັນ​ດອນ ກໍາມະການກົມການເມືອງສູນກາງພັກ, ຮອງ​ນາຍົກລັດຖະມົນຕີ ​ແຫ່ງ ສປປລາວ, ສະຫາຍ ຈິ້ງ ດິງ ຢຸງ ກໍາມະການສູນກາງພັກ, ຮອງ​ນາຍົກລັດຖະມົນຕີ ສສ.ຫວຽ​ດນາມ ​ແລະ ພາກສ່ວນ​ກ່ຽວຂ້ອງ​ຂອງສອງ​ປະເທດ​ ​ໄດ້​ເຂົ້າ​ຮ່ວມ​ພິທີ​ວາງ​ສີ​ລາ​ລືກ ​ແລະ ​ເປີດ​ໂຄງການ​ປຸກ​ສ້າງ​ຫໍ​ສະພາ​ແຫ່ງ​ຊາດລາວ. ​

ໂອກາດ​ດັ່ງກ່າວ, ສະຫາຍ ສົມ​ພັນ ​ແພງ​ຄຳ​ມີ ກໍາມະການສູນກາງພັກ, ຮອງ​ປະທານ​ສະພາ​ແຫ່ງ​ຊາດ​ລາວ, ຫົວໜ້າ​ຄະນະ​ຊີ້​ນຳ​ໂຄງການປຸກ​ສ້າງ​ຫໍ​ສະພາ​ແຫ່ງ​ຊາດ ​​ໄດ້​ລາຍງານກ່ຽວກັບການກະກຽມຮອບດ້ານໃຫ້ແກ່ໂຄງການປຸກສ້າງຫໍສະພາແຫ່ງຊາດລາວຫລັງໃໝ່ ດ້ວຍ 3 ເນື້ອໃນຄື: 1. ປະຫວັດ ແລະ ຄວາມເປັນມາຂອງສະພາແຫ່ງຊາດ ແລະ ຫໍສະພາແຫ່ງຊາດໂດຍສັງເຂບ; 2. ການກະກຽມຮອບດ້ານໃຫ້ແກ່ໂຄງການປຸກສ້າງຫໍສະພາແຫ່ງຊາດລາວຫລັງໃໝ່; 3. ຄວາມໝາຍສໍາຄັນຂອງຫໍສະພາແຫ່ງຊາດລາວຫລັງໃໝ່ ເຊິ່ງໃນນີ້ທ່ານໄດ້ຍົກໃຫ້ເຫັນບາງຕອນສໍາຄັນ​ວ່າ: ​ປັດຈຸບັນ ເນື້ອທີ່ເພື່ອສະໜອງໃຫ້ແກ່ການປຸກສ້າງຫໍສະພາແຫ່ງຊາດຫລັງໃໝ່ ເປັນເດີ່ນຫຍ້າສີຂຽວ, ເດີ່ນຈອດລົດ, ສາທາລະນະປະໂຫຍດອື່ນໆ ​ມີ​ຈໍານວນ​ທັງ​ໝົດ 23.400 ຕາ​ແມັດ, ​ໂດຍ​ໄດ້​ຮັບ​ການ​ຊ່ວຍ​ເຫລືອ​ລ້າ​ຈາກພັກ, ລັດ ​ແລະ ປະຊາຊົນ​ຫວຽດນາມ ຈຳນວນ 100 ລ້ານ​ໂດ​ລາ​ສະຫະລັດ ​ໃນ​ໂອກາດສະ​ເຫລີ​ມສະຫລອງ 2 ວັນ​ປະຫວັດສາດ ​ແຫ່ງ​ການ​ສ້າງ​ຕັ້ງ​ສາຍ​ພົວພັນ​ການ​ທູດລາວ-ຫວຽດນາມ ຄົບຮອບ 55 ປີ ​ແລະ ວັນ​ເຊັນ​ສົນທິສັນຍາ ຄົບຮອບ 40 ປີ ໃນປີ 2017 ນີ້ ໂດຍ​ແມ່ນບໍລິສັດ ​ແມ່​ທັບ​ນ້ອຍທີ 11 ກະຊວງ​ປ້ອງ​ກັນ​ປະ​ເທດ​ຫວຽດນາມ ​ເປັນ​ຜູ້​ຮັບ​ເໝົາ​ກໍ່ສ້າງ.

ທ່ານ ສົມ​ພັນ ​ແພງ​ຄຳ​ມີ ຍັງ​ໃຫ້​ຮູ້​ຕື່ມ​ວ່າ: ຫໍ​ສະພາ​ແຫ່ງ​ຊາດຫລັງໃໝ່ນີ້​ ເມື່ອສ້າງ​ສຳ​ເລັດ ຈະ​ເປັນໜຶ່ງ​ໃນ​ສັນຍາ​ລັກ​ແຫ່ງ​ສາຍ​ພົວພັນ​ແບບ​ພິ​ເສດ ​ແລະ ການ​ພົວພັນ​ຮ່ວມ​ມື​ຮອບດ້ານ ລະຫວ່າງສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດລາວ-ຫວຽດນາມ, ທັງ​ຈະ​ເປັນ​ມູນ​ມໍລະດົກ​ອັນ​ລ້ຳ​ຄ່າໃຫ້​ລູກ​ຫລານ​ໄດ້​ປົກ​ປັກ​ຮັກສາ, ສຶກສາ ​ແລະ ຄົ້ນຄວ້າ​ຮ່ຳຮຽນ​​ຕໍ່​ໄປ. ຈາກນັ້ນ, ຈຶ່ງເຂົ້າສູ່ພິທີຊວ້ານຫີນ ໂດຍການນໍາພັກ-ລັດ ແລະ ສະພາແຫ່ງຊາດຂອງສອງປະເທດລາວ-ຫວຽດນາມ ເພື່ອເປັນສັນຍາລັກໃຫ້ແກ່ການເປີດໂຄງການປຸກສ້າງຫໍສະພາແຫ່ງຊາດລາວຫລັງໃໝ່ຢ່າງເປັນທາງການ.

ກ່ອນໜ້ານັ້ນ, ໃນຕອນເຊົ້າຂອງມື້ດຽວກັນ ໄດ້ມີພິທີທາງພຸດທະສາສະໜາ ແລະ ຕັກບາດ ຕາມຮີດຄອງປະເພນີ ເຊິ່ງປະທານສະພາແຫ່ງຊາດ ພ້ອມດ້ວຍຄະນະນໍາຂອງສະພາແຫ່ງຊາດ ໄດ້ເຂົ້າຮ່ວມພິທີດັ່ງກ່າວ.

ຕອນບ່າຍຂອງວັນດຽວກັນ ທີ່​ທຳ​ນຽບປະທານ​ປະ​ເທດ (ຫໍ​ຄໍາ) ຄະນະ​ຜູ້​ແທນ​ຂັ້ນ​ສູງ​ ສສ. ຫວຽດນາມ​ ​ນໍາ​ໂດຍສະຫາຍ ນາງ ຫງວຽນ ທິ ກິມ ເງິນ ກຳມະການ​ກົມ​ການ​ເມືອງ​ສູນ​ກາງ​ພັກ​ກອມ​ມູນິດຫວຽດນາມ, ປະທານ​ສະພາ​ແຫ່ງ​ຊາດ ແຫ່ງ ສສ.ຫວຽດນາມ ໄດ້​​​ເຂົ້າ​ຢ້ຽມ​ຂໍ່ານັບສະຫາຍ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນປະຕິວັດ​ລາວ, ປະທານ​ປະ​ເທດ ແຫ່ງ ສປປລາວ ໃນ​ໂອກາດມາຢ້ຽມຢາມ ແລະ ເຂົ້າຮ່ວມພິທີວາງສີລາລືກ ແລະ ເປີດໂຄງການປຸກສ້າງຫໍສະພາແຫ່ງຊາດ ແຫ່ງ ສປປລາວ.

 ໂອກາດດັ່ງກ່າວ, ສະຫາຍ ບຸນ​ຍັງ ວໍລະ​ຈິດ ​ໄດ້​ສະ​ແດງ​ຄວາມຊົມ​ເຊີຍ, ຍິນ​ດີ​ຕ້ອນ​ຮັບ​ ​ແລະ ຕີ​ລາຄາ​ສູງ ຕໍ່​ການ​ເດີນທາງມາ​ຢ້ຽມຢາມ ​ແລະ ​ເຮັດ​ວຽກ ຢູ່ ສປປ ລາວ, ພ້ອມ​ທັງ​ຕີລາຄາ​ສູງຕໍ່​ການ​ມາ​ເຂົ້າ​ຮ່ວມ​ພິທີ​ວາງ​ສີ​ລາ​ລືກ ແລະ ​ເປີດ​ໂຄງການ​ປຸກ​ສ້າງ​ຫໍ​ສະພາ​ແຫ່ງ​ຊາດຂອງສະຫາຍ ນາງ ​ຫງວຽນ​ ທິ ກິມ ​ເງິນ ພ້ອມ​ດ້ວຍ​ຄະນະ​ໃນ​ຄັ້ງ​ນີ້ ເຊິ່ງມີ​ຄວາມ​ໝາຍຄວາມສຳຄັນເປັນ​ຢ່າງ​ຍິ່ງ, ທັງ​ເປັນ​ການປະກອບສ່ວນສຳຄັນ​ເຂົ້າໃນ​ການ​ເສີມ​ຂະຫຍາຍມູນ​ເຊື້ອ​ຄວາມ​ສາມັກຄີ​ແບບ​ພິ​ເສດ, ການ​ພົວພັນ​ຮ່ວມ​ມືຮອບດ້ານ​ ​ແລະ ຄວາມ​ໄວ້ເນື້ອ​ເຊື່ອ​ໃຈລະຫວ່າງສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ​ ກໍ​ຄື ​ສອງ​ສະພາ​ແຫ່ງ​ຊາດລາວ-​ຫວຽດນາມ ​ໃຫ້​​ແຕກ​ດອກ​ອອກ​ຜົນ ຈະ​​ເລີນງອກງາມ​ຍິ່ງ​ຂຶ້ນ​ເລື້​ອຍໆ.​ ພິ​ເສດ ​ແມ່ນ​ເປັນ​ການສະ​ເຫລີ​ມສະຫລອງ​ປີ​ສາມັກຄີ​ມິດຕະພາບ​ລາວ-ຫວຽດນາມ, ຫວຽດນາມ-ລາວ 2017 ກໍ​ຄື​ສະ​ຫລອງ​ສອງ​ວັນ​ປະຫວັດສາດຄື: ວັນ​ຄົບຮອບ 55 ປີ ສາຍ​ພົວພັນ​ການ​ທູດ ​ແລະ 40 ປີ ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ລາວ-ຫວຽດນາມ.

​ໂອກາດດຽວ​ກັນ​, ສະຫາຍ ນາງ ຫງວຽນ​ ທິ ກິມ ​ເງິນ ​ຕາງໜ້າຄະນະ​ ໄດ້​ສະ​ແດງ​ຄວາມ​ຂອບ​ໃຈ​ຕໍ່​ສະຫາຍ ບຸນ​ຍັງ ວໍລະ​ຈິດ ທີ່​ໄດ້​ສະຫລະ​ເວລາ​ອັນ​ມີ​ຄ່າຕ້ອນຮັບ​ຢ່າງ​ອົບ​ອຸ່ນໃນຄັ້ງນີ້,​ ພ້ອມ​ທັງ​​ໄດ້ແຈ້ງສະພາບຂອງ​ການ​ເດີນທາງມາ​ຢ້ຽມຢາມ ​ແລະ ​ເຮັດ​ວຽກ​ໃນ​ຄັ້ງນີ້​ ໃຫ້​ສະຫາຍ​ປະທານ​ປະ​ເທດ​ໄດ້​ຮັບ​ຊາບ.

(ນາງ ສຸມົນທາ ງາໄຊ)