ຮອງປະທານ ສພຊ ຕ້ອນຮັບຄະນະ ຊປປ ລາວ
04/06/2020

(ສພຊ) ໃນຕອນເຊົ້າວັນທີ 29 ພຶດສະພາຜ່ານມາ, ທີ່ສະພາແຫ່ງຊາດ (ສພຊ) ສະຫາຍ ບຸນປອນ ບຸດຕະນະວົງ ກໍາມະການສູນກາງພັກ, ຮອງປະທານ ສພຊ, ອະດີດເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ (ຊປປລ) ສະໄໝທີ IV ໄດ້ຕ້ອນຮັບການເຂົ້າຢ້ຽມຢາມ ແລະ ອວຍພອນຂອງສະຫາຍ ອາລຸນໄຊ ສູນນະລາດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງ ຊປປລ ພ້ອມດ້ວຍຄະນະ ເນື່ອງໃນໂອກາດຄົບຮອບ 65 ປີ ວັນສ້າງຕັ້ງ ຊປປລ (14/4/1955-14/4/2020).

ສະຫາຍ ອາລຸນໄຊ ສູນນະລາດ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ຕໍ່ຄະນະ ຊປປລ ຄັ້ງນີ້, ຕະຫລອດໄລຍະທີ່ຜ່ານມາ, ທີ່ສະຫາຍຮອງປະທານ ສພຊ ເປັນເລຂາຊາວໜຸ່ມນັ້ນ ແມ່ນສຸດທີ່ມີບັນຍາກາດ ແລະ ຂະບວນການຕົວຈິງ ເຊິ່ງມີຫລາຍວຽກທີ່ພົ້ນເດັ່ນ ເປັນຕົ້ນແມ່ນການສຸມໃສ່ຊາວໜຸ່ມນັກຮຽນນັກສຶກສາ, ເອົາໃຈໃສ່ວຽກງານສຶກສາອົບຮົມ ເຊິ່ງເຫັນວ່າການສຶກສາອົບຮົມ ແມ່ນໄດ້ເຂົ້າເຖິງຊາວໜຸ່ມໃນທົ່ວໄປ ເຊິ່ງສະແດງອອກໃນການເຂົ້າຮ່ວມອາສາສະໝັກຊາວໜຸ່ມຕະລຸມບອນ; ພ້ອມທັງລາຍງານໃຫ້ຮູ້ວ່າ ຄະນະຊາວໜຸ່ມປະຊາຊົນປະຕິວັດລາວຊຸດນີ້ ໄດ້ສືບຕໍ່ຮັກສາມູນເຊື້ອອັນດີງາມຂອງຊາວໜຸ່ມຊຸດກ່ອນ ເປັນຕົ້ນການເຕົ້າໂຮມຄວາມສາມັກຄີ ເອົາໃຈໃສ່ສຶກສາອົບຮົມຄົນຮຸ່ນໜຸ່ມໃຫ້ມີຄວາມເຊື່ອໝັ້ນຕໍ່ການນໍາພາຂອງພັກ, ເອົາໃຈໃສ່ເຝິກຝົນຫລໍ່ຫລອມຕົນເອງຢູ່ສະເໝີ ໂດຍສະເພາະແມ່ນການປະດິດສ້າງໃໝ່ ໃນເງື່ອນໄຂໃຫມ່ທີ່ປະເທດຊາດຮຽກຮ້ອງຕ້ອງການ, ເອົາໃຈໃສ່ວຽກງານນໍາພາແນວຄິດຂອງໄວໜຸ່ມ ກ່ອນອື່ນແມ່ນເຂົ້າຮ່ວມຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມໜ້າທີ່ການເມືອງຂອງແຕ່ລະພາກສ່ວນ ພ້ອມທັງປຸກລະດົມໃຫ້ຊ່ວຍເຫລືອສັງຄົມ, ສຸມໃສ່ປັບປຸງລະບົບການຈັດຕັ້ງໃຫ້ໜັກແໜ້ນ ແລະ ເຂັ້ມແຂງ ເຊິ່ງສາມາດສ້າງຕັ້ງສະຫະພັນຊາວໜຸ່ມແຫ່ງຊາດ ໂດຍໄດ້ຮັບການອະນຸມັດຈາກກົມການເມືອງສູນກາງພັກ ຄາດວ່າໃນເດືອນກໍລະກົດ 2020 ຈະປະກາດຢ່າງເປັນທາງການ ເພື່ອເປັນບ່ອນອີງໃນການເຕົ້າໂຮມຊາວໜຸ່ມໃນແຕ່ລະຂົງເຂດທຸກອາຊີບ; ຄະນະຊາວໜຸ່ມຊຸດນີ້ ໄດ້ສືບຕໍ່ຈັດຕັ້ງຄະນະຊາວໜຸ່ມຕະລຸມບອນ ເພື່ອຊ່ວຍໄພພິບັດທາງທຳມະຊາດ ເປັນຕົ້ນນໍ້າຖ້ວມ ໃນປີ 2018 ໄດ້ 52.000 ຄົນ, ປີ 2019 ໄດ້ 10.454 ຄົນ ປັດຈຸບັນແມ່ນໄດ້ສຸມໃສ່ຕ້ານພະຍາດໂຄວິດ-19 ດ້ວຍການເຝົ້າລະວັງ.

ສະຫາຍ ບຸນປອນ ບຸດຕະນະວົງ ໄດ້ສະແດງຄວາມດີໃຈ ແລະ ພາກພູມໃຈທີ່ໄດ້ຮັບການອວຍພອນໃນຄັ້ງນີ້, ໂອກາດດັ່ງກ່າວ ສະຫາຍຮອງປະທານ ສພຊ ໄດ້ເລົ່າຄືນມູນເຊື້ອການປະຕິວັດ ແລະ ການເຮັດວຽກຊາວໜຸ່ມຕັ້ງແຕ່ສະໄຫມປະຕິວັດ ທີ່ສະຫາຍເປັນເລຂາ-ຮອງເລຂາຄະນະບໍລິຫານງານຊາວໜຸ່ມໃນໄລຍະຜ່ານມາ ເປັນຕົ້ນນໍາພາສ້າງຄະນະຊາວໜຸ່ມຕະລຸມບອນ, ຂະບວນການຊາວໜຸ່ມເດີນທະເລ, ສະມາຄົມນັກທຸລະກິດໜຸ່ມ… ໃນຕອນທ້າຍ, ສະຫາຍຮອງປະທານ ສພຊ ຍັງໄດ້ມີຄໍາເຫັນຊີ້ນໍາຄະນະ ຊປປລາວ ເອົາໃຈໃສ່ສືບຕໍ່ຮັກສາມູນເຊື້ອອັນດີງາມຂອງຊາວໜຸ່ມແຕ່ລະຍຸກແຕ່ລະສະໄຫມ ເປັນຕົ້ນແບບແຜນວິທີເຮັດວຽກ, ແບບແຜນການຊີ້ນໍາ-ນໍາພາ; ເອົາໃຈໃສ່ເຕົ້າໂຮມຄວາມສາມັກຄີຂອງຊາວໜຸ່ມ, ເຝິກຝົນຫລໍ່ຫລອມຕົນເອງ ພ້ອມທັງແລກປ່ຽນຄໍາຄິດຄໍາເຫັນຂອງບັນດາຊາວໜຸ່ມ ຈັດການສຳມະນາ, ສ້າງຂະບວນການກິລາ, ຍາດແຍ່ງໂຄງການຊ່ວຍເຫລືອຂອງຕ່າງປະເທດ ພ້ອມກັນນັ້ນ, ກໍຕ້ອງສືບຕໍ່ຊີ້ນໍາ-ນໍາພາຊາວໜຸ່ມໃຫ້ກ້າວໄປສູ່ບາດກ້າວໃຫມ່ທີ່ທັນສະໄຫມ.