ຮອງປະທານ ສພຊ ພົບປະຢ້ຽມຢາມ ເຮັດວຽກຢູ່ແຂວງ ບໍລິຄຳໄຊ
27/02/2020

(ສພຊ) ລະຫວ່າງວັນທີ 18-21 ກຸມ​ພາ 2020, ທ່ານ ນາງ ສີໃສ ລືເດດມູນສອນ ກຳມະການສູນກາງພັກ, ຮອງປະທານສະພາແຫ່ງຊາດ (ສພຊ), ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 11 ພ້ອມດ້ວຍສະມາຊິກສະພາປະຊາຊົນແຂວງ (ສສຂ) ບໍ​ລິ​ຄຳ​ໄຊ ໄດ້ລົງເຄື່ອນໄຫວ​ຢ້​ຽມ​ຢາມ​ພົບ​ປະ​ກັບ​ພໍ່​ແມ່​ປະ​ຊາ​ຊົນ​​ບ້ານພຽງ​ດີ ແລະ ບ້ານ​ໂພນ​ງາມ ເມືອງໄຊ​ຈຳ​ພອນ, ພ້ອມ​ທັງເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ແລະ ຂອງສະພາປະຊາຊົນແຂວງ (ສພຂ) ຊຸດທີ I.

 ຈຸດປະສົງຂອງການລົງ​ເຄື່ອນ​ໄຫວຄັ້ງນີ້ ເພື່ອເຜີຍແຜ່ໃຫ້ອໍານາດການປົກຄອງບ້ານ ຕະຫລອດຮອດພໍ່ແມ່ປະຊາຊົນຢູ່ທ້ອງຖິ່ນ ແລະ ຮາກຖານ ໄດ້ມີຄວາມຮັບຮູ້ ແລະ ເຂົ້າໃຈຕໍ່ແນວທາງແຜນນະໂຍບາຍຂອງພັກ ເວົ້າລວມ, ເວົ້າສະເພາະ ກໍຄືວຽກງານຂອງ ສພຊ ແລະ ສພຂ; ທັງເປັນການເກັບກຳສະພາບການ, ຄຳຄິດຄຳເຫັນ ແລະ ຄຳສະເໜີຕ່າງໆ ຂອງພໍ່​ແມ່ປະຊາຊົນ​ພາຍໃນເຂດເລືອກຕັ້ງ ຕໍ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມທັງຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງເມືອງ ແລະ ບ້ານ. ພ້ອມດຽວກັນນັ້ນ, ຄະນະ ສສຊ, ສສຂ ຍັງໄດ້ຍົກໃຫ້ເຫັນບາງມາດຕາຂອງກົດໝາຍ, ວຽກ​ງານ​ຕ່າງໆ ທີ່​ໄດ້​ຮັບ​ຮອງ​ເອົາ​ໃນ​ກອງ​ປະ​ຊຸມຂອງ​ ສພຊ ແລະ ສພຂ ໂດຍ​ສະ​ເພາະ​ກໍ​ແມ່ນ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ, ວຽກງານສາສະໜາ ແລະ ຊົນເຜົ່າ, ວຽກງານບົດບາດຍິງ-ຊາຍ, ໄພຄຸກຄາມ ແລະ ຜົນຮ້າຍຂອງຢາເສບຕິດ. ພ້ອມທັງເປີດໂອກາດໃຫ້ພໍ່ແມ່ປະຊາຊົນໄດ້ປະກອບຄຳຄິດຄຳເຫັນ ແລະ ຄຳສະເໜີບາງບັນຫາທີ່ຂັດຂ້ອງໝອງໃຈຈຳນວນໜຶ່ງ ເປັນຕົ້ນແມ່ນ ບັນດາໂຄງການລົງທຶນຂອງລັດ ທີ່ສົ່ງຜົນກະທົບຊີວິດການເປັນຢູ່ຂອງພໍ່ແມ່ປະຊາຊົນ ແລະ ສິ່ງແວດລ້ອມ​, ບັນຫາພື້ນຖານໂຄງລ່າງ, ເສັ້ນທາງ, ນ້ຳກິນ-ນ້ຳໃຊ້ ແລະ ບັນຫາອື່ນໆ  ເພື່ອໃຫ້ຜູ້ແທນນໍາໄປພິຈາລະນາ ແລະ ສະເໜີຕໍ່ກອງປະຊຸມສະໄໝສາມັນເທື່ອທີ 9 ທີ່ຈະໄຂຂຶ້ນໃນຕໍ່ຫນ້າ ເຊິ່ງບັນຫາທີ່ປະຊາຊົນສະເໜີມານັ້ນ ບາງບັນຫາ ທາງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ສສຂ ຍັງໄດ້ຊີ້ແຈງ, ໃຫ້ຄວາມກະຈ່າງແຈ້ງ ແລະ ຈະນຳເອົາໄປສະເໜີຢູ່ໃນກອງປະຊຸມ ສພຊ ແລະ ສພຂ ເພື່ອໃຫ້ພາກສ່ວນກ່ຽວຂ້ອງນຳໄປຄົ້ນຄວ້າພິຈາລະນາແກ້ໄຂໃນຕໍ່ໜ້າ. ນອກນັ້ນ,  ຄະນະ ຍັງໄດ້ເນັ້ນໃຫ້ອຳນາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ຈົ່ງພ້ອມກັນຮັກສາໄດ້ຮັດແໜ້ນເຖິງຄວາມສາມັກຄີ, ຮັກແພງເຊິ່ງກັນແລະກັນ, ຕ້ານປາກົດການຫຍໍ້ທໍ້ຕ່າງໆ ທີ່ຈະເກີດຂຶ້ນ, ເອົາໃຈໃສ່ສ້າງເສດຖະກິດໃນຄອບຄົວຂອງຕົນໃຫ້ມີຄວາມເຂັ້ມແຂງ ເພື່ອເຮັດໃຫ້ຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ. ໃນ​ໂອ​ກາດ​ດັ່ງ​ກ່າວ, ທ່ານ​ຮອງ​ປະ​ທານ​ ສພຊ ພ້ອມ​ດ້ວຍ​ຄະ​ນະ ຍັງ​ໄດ້ນຳ​ເອົາ​ເຄື່ອງ​ຊ່ວຍ​ເຫລືອ​ຈຳ​ນວນ​ໜຶ່ງ​ ໄປ​ມອບ​ໃຫ້ເມືອງ ແລະ ບ້ານ ເປັນ​ຕົ້ນ: ​ຄອມ​ພິວ​ເຕີ, ຜ້າ​ຫົ່ມ, ເສື້ອ​ກັນ​ໜາວ, ປຶ້ມ​ແບບ​ຮຽນ​ມັດ​ທະ​ຍົມ ແລະ ເຄື່ອງ​ອຸ​ປະ​ກອນ​ກິ​ລາຕ່າງໆ ລວມ​ມູນ​ຄ່າ​ທັງ​ໝົດ 96 ລ້ານກວ່າກີບ, ນອກນັ້ນ ສສຊ ປະ​ຈຳ​ເຂດ​ເລືອກ​ຕັ້ງ​ທີ 11 ແຂວງ​ບໍ​ລິ​ຄຳ​ໄຊ ຍັງ​ໄດ້​ມອບ​ເງິນ​ຊ່ວຍ​ເຫລືອ​ປະ​ຊາ​ຊົນ​ ແລະ ອຳ​ນວຍ​ການ​ໂຮງ​ຮຽນ​ປະ​ຖົມ​ສົມ​ບູນບ້ານ​ພຽງ​ດີ ແລະ ​ບ້ານ​ໂພນ​ງາມ ຈຳ​ນວນ 22 ລ້ານ​ກີບ ເພື່ອ​ນຳ​ໄປ​ບູ​ລະ​ນະ​ສ້ອມ​ແປງ​ທໍ່​ນ້ຳ​ລິນ ແລະ ຕໍ່​ເຕີມ​ໂຮງ​ຮຽນ​ທີ່​ຊຸດ​ໂຊມ.

ໂອກາດລົງເຄື່ອນໄຫວຄັ້ງນີ້ ອີງ​ໃສ່​​ຄວາມ​ຮຽກ​ຮ້ອງ​ຕ້ອງ​ການ​ພາ​ຫະ​ນະ​ອັນ​ຈຳ​ເປັນ ເພື່ອ​ປະ​ກອບ​ສ່ວນ​ເຂົ້າ​ໃນ​ການ​ເຄື່ອ​ນ​ໄຫວ​ປະ​ຕິ​ບັດ​ໜ້າ​ທີ່​ວຽກ​ງານໃນ​ແຕ່​ລະ​ໄລ​ຍະ ຂອງກອງ​ພັນ​ໃຫ​ຍ່ 642 ທີ່​ໄດ້​ເຮັດ​ໜ້າ​ທີ່​ໃນ​ການ​ປົກ​ປັກ​ຮັກ​ສາ​ປະ​ເທດ​ຊາດ, ໃນ​ວັນ​ທີ 18 ກຸ​ມ​ພາ 2020 ທ່ານ ນາງ​ ສີ​ໃສ​ ລື​ເດດ​ມູນ​ສອນ ກຳ​ມະ​ການ​ສູນ​ກາງ​ພັກ, ຮອງ​ປະ​ທານ​ສະ​ພາ​ແຫ່ງ​ຊາດ ທັງ​ເປັນ​ຜູ້​ຕາງ​ໜ້າ​ໃຫ້​ຄະ​ນະ​ປະ​ຈຳ​ສະ​ພາ​ແຫ່ງ​ຊາດ ພ້ອມ​ດ້ວຍ​ຄະ​ນະ ໄດ້​ນຳ​ເອົາລົດ​ຊິ້ງ ຈຳ​ນວນ 1 ຄັນ ລວມ​ມູນ​ຄ່າ 39 ລ້ານກີບ ໄປ​ມອບ​ໃຫ້​ທະ​ຫານກອງ​ພັນ​ໃຫຍ່ 642 ເມືອງ​ບໍ​ລິ​ຄັນ ແຂວ​ງ​ບໍ​ລິ​ຄຳ​ໄຊ ກ່າວ​ຮັບ​ໂດຍ​ທ່ານ ພັ​ທ. ແສງ​ທອງ ດວງວິ​ໄລ ຮອງ​ເລ​ຂາ​ຄະ​ນະ​ພັກ, ຫົວ​ໜ້າ​ການ​ທະ​ຫານກອງ​ພັນ​ໃຫຍ່ 642 ເຂົ້າ​ຮ່ວມ​ມີ​ສະ​ມາ​ຊິກ​ສະ​ພາ​ແຫ່ງ​ຊາດປະ​ຈຳ​ເຂດ​ເລືອກ​ຕັ້ງ​ທີ 11, ຄ​ະ​ນະ​ພັກ, ນາຍ ແລະ ພົນ​ທະ​ຫານກອງ​ພັນ​ໃຫຍ່ 642 ເຂົ້າ​ຮ່ວມ.