ສະພາແຫ່ງຊາດ ສະຫລຸບການເຄື່ອນໄຫວວຽກງານປະຈຳປີ 2019
11/02/2020

ຂປລ.​ ໃນ​ວັນ​ທີ 11 ກຸມພາ 2020 ສະພາແຫ່ງຊາດ ໄດ້ຈັດກອງປະຊຸມສະຫລຸບ ການເຄື່ອນ ໄຫວວຽກງານ ແລະ ຂະບວນການແຂ່ງຂັນ “ຮັກຊາດ ແລະ ພັດທະນາ” ປະຈຳ ປີ 2019 ພ້ອມ​ວາງທິດທາງແຜນການ ປະຈຳ ປີ 2020 ​ໂດຍ​ມີ​ ທ່ານ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ, ພ້ອມ​ດ້ວຍ​ສະມາຊິ​ກພັກ, ພະນັກງາ​ນ-ລັດຖະກອນ ພາຍ​ໃນ​ສະພາ​ແຫ່ງ​ຊາດ ​ເຂົ້າ​ຮ່ວມ​. ​ໂອກ​າດດັ່ງ​ກ່າວ, ທ່ານ ນາງ ສວນ​ສະຫວັນ ວິ​ຍະ​ເກດ ​ເລຂາທິການ​ສະພາ​ແຫ່ງ​ຊາດ ​ໄດ້ລາຍ​ງານໃຫ້​ຮູ້​ວ່າ:​​ ​ໃນ​ໄລຍະ​ຜ່ານ​ມາ ຄະນະ​ປະຈຳ​ສະພາ​ແຫ່ງ​ຊາດ ​ໄດ້​ພິຈາລະນາ​ບັນຫາ​ສຳຄັນ​ຕ່າງໆ ທັງໝົດ 114 ​ເລື່ອງ ​ແລະ ຮັບຮອງ​ເປັນ​ມະຕິ​ຂອງ​ຄະນະ ​ປະຈຳ​ສະພາ​ແຫ່ງ​ຊາດ ຈຳນວນ 50 ສະບັບ. ​ໃນ​ນີ້, ມະຕິ​ວຽກງານ​ລັດຖະບານ 6 ສະບັບ; ມະຕິ​ວຽກງານ​ອົງການ​ໄອ​ຍະ​ການປະຊາຊົນ​ສູງສຸດ ​ແລະ ສານ​ປະຊາຊົນ​ສູງ​ສຸດ 33 ສະບັບ; ມະຕິ​ວຽກງານ​ອົງການ​ກວດ​ສອບ​ ແຫ່ງ​ລັດ 4 ສະບັບ ​ແລະ ມະຕິ​ວຽກງານ​ສະພາ​ແຫ່ງ​ຊາດ 7 ສະບັບ;​ ​ໄດ້​ຕິດຕາມ​ກວດ​ກາ ການຈັດ​ຕັ້ງ​ປະຕິບັດ​ກົດໝາຍ ​ແລະ ນິຕິ​ກຳ​ໃຕ້​ກົດໝາຍ ທີ່​ຕິດ​ພັນ​ກັບ​ການຈັດ​ເກັບ​ລາຍ​ຮັບ; ການຈັດ​ຕັ້ງ​ປະຕິບັດ​ກົດໝາຍ ​ແລະ ນິ ຕິ​ກຳ​ໃຕ້​ກົດໝາຍ ທີ່​ຕິດ​ພັນ​ກັບ​ການ​ສ້າງ​ວິຊາ​ຊີບ, ການ​ພັດທະນາ​ສີມື​ແຮງ​ງານ ທີ່​ມີ​ຄຸນ​ນະພາ​ບ, ການ​ສ້າງ​ວຽກ​ເຮັດ​ງານ​ທຳ​ຂອງ​ປະຊາຊົນ ​ແລະ ການ​ຕິດຕາມ​ກວດກາ ​ການ​ຕົກລົງຂອງ​ຄະນະ​ປະຈຳ​ສະ ພາ​ແຫ່ງ​ຊາດ ກ່ຽວກັບ​ການຈັດ​ຕັ້ງ​ປະຕິບັດ​ນິຕິ​ກຳ ທີ່​ພົວພັນ​ກັບ​ການ​ເຊົ່າ, ສຳ​ປະທານ​ທີ່​ດິນ, ຜ່ານ​ການ​ຕິດຕາມ​ກວດກາ ​ເຫັນ​ວ່າ​ລັດຖະບານ ກໍ​ຄື​ ຂະ​ແໜງການ​ທີ່​ກ່ຽວຂ້ອງ​ເອົາ​​ໃຈ​ໃສ່​ສ້າງ, ປັບປຸງ ​ແລະ ຈັດ​ຕັ້ງ​ປະຕິບັດ​ກົດໝາຍ, ນິຕິ​ກຳ​ໃຕ້​ກົດໝາຍ ​ເຂົ້າ​ໃນ​ການ​ປະຕິບັດ ໜ້າທີ່​ວຽກງານ​ດັ່ງກ່າວ ນັບ​ມື້​ນັບ​ດີ​ຂຶ້ນ, ປະກອບສ່ວນ​ໃນ​ການ​ປະຕິບັດ ​ແຜນ​ພັດທະນາ​ເສດຖະກິດ-​ສັງຄົມ, ​ແຜນ​ງົບປະມານ​ແຫ່ງ​ລັດ ລວມທັງ​ການ​ພັດທະນາ ສີມື​ແຮງ​ງານ, ການ​ສ້າງ​ອາຊີບ ທີ່​ສາມາດ​ສ້າງ​ລາຍ​ຮັບ​ໃຫ້​ແກ່​ປະຊາຊົນ, ຫລຸດ​ພົ້ນ​ອອກ​ຈາກ​ຄວາມທຸກ​ຍາກ; ​ໄດ້​ກວດກາ, ຄົ້ນຄວ້າ ​ແລະ ພິຈາລະນາ​ຄຳ​ຮ້ອງ​ຂໍ​ ຄວາມ​ເປັນ​ທຳ ຂອງ​ປະຊາຊົນ 824 ​ເລື່ອງ ​ແລະ ​ແກ້​ໄຂ​ສຳ​ເລັດ 329 ​ເລື່ອງ ​ເທົ່າ​ກັບ 47,57% ຂອງ​ຄຳ​ຮ້ອງ​ທັງໝົດ; ຕ້ອນຮັບ ​ແລະ ​ໃຫ້​ຄຳ​ປຶກສາ​ແກ່​ປະຊາຊົນ ກ່ຽວກັບ​ຄຳ​ຮ້ອງ​ຂໍ​ຄວາມ​ເປັນ​ທຳ 220 ​ເທື່ອ.

ສຳລັບ​ທິດ​ທາງ​ແຜນການ​ເຄື່ອນ​ໄຫວ​ວຽກງານ​ປະຈຳ​ ປີ 2020  ສະພາ​ແຫ່ງ​ຊາດ ຈະສືບ​ຕໍ່​ປັບປຸງ​ກົງຈັກການຈັດ​ຕັ້ງ​ ພາຍ​ໃນ​ສະພາ​ແຫ່ງ​ຊາດ ​ໃຫ້​ມີ​ຄວາມ​ເຂັ້ມ​ແຂງ, ໜັກ​ແໜ້ນ, ສາມາດ​ປະຕິ ບັດໜ້າທີ່​ເປັນ​ເສນາ​ທິການ​ທີ່​ດີ ​ໃຫ້​ກົງຈັກ​ສະພາ​ແຫ່ງ​ຊາດ ​ແລະ ກົງຈັກ​ ທີ່​ຄະນະ​ປະຈຳ​ສະພາ​ແຫ່ງ​ຊາດ, ​ເອົາ​ໃຈ​ໃສ່​ປັບປຸງ​ລະ​ບອບ​ການ​ເຮັດ​ວຽກ ພາຍ​ໃນ​ສະ​ພາ​ແຫ່ງ​ຊາດ, ສືບ​ຕໍ່​ເອົາ​ໃຈ​ໃສ່​ຍົກ​ສູງ​ຂີດ​ຄວາມ​ສາມາດ ​ໃຫ້​ແກ່​ພະນັກງານ-​ລັດຖະກ​​ອນ ​ເປັນ​ປົກກະຕິ, ​ເອົາ​ໃຈ​ໃສ່​ຈັດ​ຕັ້ງ​ປະຕິບັດ ການ​ປະ​ເມີນ​ຜົນ​ການ​ປະຕິ​ບັດ ໜ້າທີ່​ວຽກງານ ຂອງ​ພະນັກງານ-​ລັດຖະກອນ​ປະຈຳ​ ປີ 2020  ​ເຊິ່ງ​ເປັນ​ປີ​ແຫ່ງ​ການ​ມ້ວນທ້າຍ ຂອງ​ສະພາ​ແຫ່ງ​ຊາດ ຊຸດ​ນີ້ ​ໃຫ້​ສຳ​ເລັດ​ທັນຕາ​ມ ​ເວລາ​ທີ່​ກໍານົດ​ໃນ​ແຜນການ ​ແລະ ນິຕິ​ກຳ​ກ່ຽວຂ້ອງ ​ແລະ ຮັບປະກັນ​ຄຸນ​ນະພາ​ບ ​ແລະ ອື່ນໆ.