ຮອງປະທານ ສພຊ ເຜີຍແຜ່ຜົນສຳເລັດກອງປະຊຸມ ສະໄໝສາມັນເທື່ອທີ 8
07/02/2020

(ສພຊ) ເພືື່ອເປັນການເຜີຍແຜ່ຜົນສໍາເລັດກອງປະຊຸມສະໄໝສາມັນເມື່ອທີ 8 ຂອງສະພາແຫ່ງຊາດ (ສພຊ) ຊຸດທີ VIII ແລະ ເພື່ອເປັນການສະເຫລີມສະຫລອງໃຫ້ແກ່ວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ; ວັນທີ 22 ມັງກອນຜ່ານມາ, ທ່ານ ບຸນປອນ ບຸດຕະນະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄຳມ່ວນ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວ ແລະ ຢ້ຽມຢາມກອງບັນຊາການທະຫານແຂວງຄຳມ່ວນ ໂດຍການຕ້ອນຮັບຂອງທ່ານ ພັທ. ບຸນທັນ ວິໄລຈິດ ຮອງກອງບັນຊາການ ຫົວໜ້າຫ້ອງເສນາ; ມີບັນດານາຍ ແລະ ພົນທະຫານ, ນາຍ ແລະ ພົນຕຳຫລວດ ພາຍໃນກອງບັນຊາການທະຫານແຂວງ ແລະ ກອງບັນຊາການປ້ອງກັນຄວາມສະຫງົບແຂວງເຂົ້າຮ່ວມ.

          ທັງນີ້, ກໍເພື່ອເຮັດໃຫ້ພະນັກງານລັດຖະກອນ, ທະຫານຕຳຫລວດ ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ ເວົ້າລວມ, ເວົ້າສະເພາະ ວຽກງານຂອງສະພາແຫ່ງຊາດ ກໍຄືສະພາປະຊາຊົນແຂວງ; ຮັບຮູ້ ແລະ ເຂົ້າໃຈພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນແຂວງ (ສສຂ) ໃຫ້ເລິກເຊິ່ງກວ່າເກົ່າ.

          ໃນການເຄື່ອນໄຫວຄັ້ງນີ້, ຄະນະ ໄດ້ຮັບຟັງບົດລາຍງານການຈັດຕັ້ງປະຕິບັດວຽກງານຂອງກອງບັນຊາການທະຫານແຂວງຄຳມ່ວນ; ຈາກນັ້ນ, ທ່ານ ບຸນປອນ ບຸດຕະນະວົງ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ VIII ເຊິ່ງທ່ານໄດ້ໃຫ້ຮູ້ວ່າ: ກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ VIII ໄດ້ເລີ່ມໄຂຂຶ້ນວັນທີ 7 ພະຈິກ- 6 ທັນວາ 2019 ໂດຍໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ໂດຍໄດ້ອອກເປັນມະຕິກອງປະຊຸມ ຈຳນວນ 11 ສະບັບ ແລະ ພິຈາລະນາຮັບຮອງເອົາກົດໝາຍຈຳນວນ 8 ສະບັບ ຄື: ກົດໝາຍວ່າດ້ວຍການອະນາໄມ ແລະ ສົ່ງເສີມສຸຂະພາບ; ກົດໝາຍວ່າດ້ວຍກິລາ-ກາຍຍະກຳ; ກົດໝາຍວ່າດ້ວຍການລົ້ມລະລາຍຂອງວິສາຫະກິດ; ກົດໝາຍວ່າດ້ວຍຫລັກຊັບ; ກົດໝາຍວ່າດ້ວຍຄວາມສະເໝີພາບຍິງ-ຊາຍ; ກົດໝາຍວ່າດ້ວຍການປະກັນໄພ; ກົດໝາຍວ່າດ້ວຍຮູບເງົາ; ກົດໝາຍວ່າດ້ວຍການສົ່ງເສີມການລົງທຶນ; ໃນການດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII, ສະພາແຫ່ງຊາດ ໄດ້ສະເໜີໃຫ້ບັນດາກະຊວງ, ອົງການກ່ຽວຂ້ອງ  ຂຶ້ນຕອບຄໍາຖາມທີ່ພົວພັນກັບບັນຫາພົ້ນເດັ່ນຂອງສັງຄົມ ເຊິ່ງສະມາຊິກສະພາແຫ່ງຊາດ ໄດ້ຍົກຂຶ້ນໃນກອງປະຊຸມປະກອບມີ: ກະຊວງການເງິນ, ກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ກະຊວງປ້ອງກັນຄວາມສະຫງົບ, ກະຊວງແຜນການ ແລະ ການລົງທຶນ, ກະຊວງໂຍທາທິການ ແລະ ຂົນສົ່ງ, ກະຊວງພະລັງງານ ແລະ ບໍ່ແຮ່, ທະນາຄານ ແຫ່ງ ສປປລາວ, ອົງການກວດສອບແຫ່ງລັດ, ອົງການກວດກາລັດຖະບານ;  ພ້ອມດຽວກັນນັ້ນ, ທ່ານນາຍົກລັດຖະມົນຕີ ໃນນາມຫົວໜ້າລັດຖະບານ ກໍໄດ້ມີຄຳເຫັນຕໍ່ກອງປະຊຸມສະພາແຫ່ງຊາດ ທັງເປັນການຊີ້ແຈງຕໍ່ຄຳຊັກຖາມທີ່ ສະມາຊິກສະພາແຫ່ງຊາດ ຍົກຂຶ້ນດ້ວຍບັນຍາກາດທີ່ດີ ແລະ ສ່ອງແສງໃຫ້ເຫັນຄວາມຮັບຜິດຊອບຮ່ວມກັນ ຂອງສະພາແຫ່ງຊາດ ແລະ ລັດຖະບານທີ່ມີຕໍ່ປະຊາຊົນ.

          ໂອກາດດຽວກັນ, ທ່ານຮອງປະທານສະພາແຫ່ງຊາດ ຍັງຮຽກຮ້ອງໃຫ້ກຳລັງປ້ອງກັນຊາດປ້ອງກັນຄວາມສະຫງົບ ຈົ່ງເອົາໃຈໃສ່ຈັດຕັ້ງ, ເຊື່ອມຊຶມ ແລະ ຈັດຕັ້ງປະຕິບັດກົດໝາຍທີ່ໄດ້ປະກາດໃຊ້ໄປແລ້ວນັ້ນ ໃຫ້ມີປະສິດທິພາບ, ຕິດຕາມ, ຊຸກຍູ້, ປະກອບສ່ວນໃນການປະຕິບັດແຜນພັດທະນາເສດຖະກິດ-ສັງຄົມ ໃຫ້ມີເງືື່ອນໄຂທີ່ສະຫງົບ; ຕິດຕາມກວດກາ ແລະ ເກັບກຳບັນດາຄຳຄິດຄຳເຫັນ ແລະ ຂໍ້ຂັດຂ້ອງໝອງໃຈຂອງປະຊາຊົນ ເພື່ອສ່ອງແສງໃຫ້ສະພາແຫ່ງຊາດ ກໍຄືສະພາປະຊາຊົນແຂວງ; ພ້ອມນັ້ນ, ທ່ານຍັງໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ VIII ຢູ່ຫ້ອງການປົກຄອງເມືອງທ່າແຂກຕື່ມອີກ.

          ກ່ອນໜ້ານັ້ນ ລະຫວ່າງວັນທີ 17-19 ມັງກອນ 2020 ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງພົບປະປະຊາຊົນ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ຢູ່ 2 ເມືອງ ຄື: ເມືອງຄູນຄໍາ ແລະ ເມືອງຫີນບູນ ແຂວງຄໍາມ່ວນ; ເຂົ້າຮ່ວມມີທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ, ພ້ອມດ້ວຍທ່ານ ຄໍາໜັ້ນ ສໍປະເສີດ ເຈົ້າເມືອງໆຄູນຄໍາ, ທ່ານ ຄໍາສິງ ອໍລະວັນ ເຈົ້າເມືອງໆຫີນບູນ, ມີຮອງປະທານສະພາປະຊາຊົນແຂວງ, ຄະນະເລຂາທິການສະພາປະຊາຊົນແຂວງ, ພະນັກງານ-ລັດຖະກອນ, ທະຫານ-ຕໍາຫລວດ, ເລຂາໜ່ວຍພັກບ້ານ-ນາຍບ້ານ ຕະຫລອດຮອດພໍ່ເເມ່ປະຊາຊົນເຂົ້າຮ່ວມຮັບຟັງທັງໝົດ 209 ທ່ານ ຍິງ 49 ທ່ານ.

ການລົງເຜີຍແຜ່ໃນຄັ້ງນີ້, ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງເມືອງ ແລະ ບ້ານ; ຈາກນັ້ນ, ທ່ານຮອງປະທານສະພາແຫ່ງຊາດ ຍັງໄດ້ຍົກໃຫ້ເຫັນບາງມາດຕາຂອງກົດໝາຍ ທີ່ຕິດພັນກັບຊີວິດການເປັນຢູ່ຂອງປະຊາຊົນ, ວຽກງານບົດບາດຍິງ-ຊາຍ, ໄພຄຸກຄາມ ແລະ ຜົນຮ້າຍຂອງຢາເສບຕິດ; ພ້ອມທັງເປີດໂອກາດໃຫ້ພໍ່ແມ່ປະຊາຊົນໄດ້ປະກອບຄຳຄິດຄຳເຫັນ ແລະ ຄຳສະເໜີບາງບັນຫາທີ່ຂັດຂ້ອງໝອງໃຈຈຳນວນໜຶ່ງ ເປັນຕົ້ນແມ່ນບັນດາໂຄງການລົງທຶນຂອງລັດ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ແລະ ສິ່ງແວດລ້ອມ, ບັນຫາພື້ນຖານໂຄງລ່າງ, ເສັ້ນທາງ, ໄຟຟ້າ, ນ້ຳກິນ-ນ້ຳໃຊ້ ແລະ ບັນຫາອື່ນໆ ເພື່ອໃຫ້ຜູ້ແທນນໍາໄປພິຈາລະນາ ແລະ ສະເໜີຕໍ່ກອງປະຊຸມສະໄໝສາມັນເທື່ອທີ 9 ທີ່ຈະໄຂຂຶ້ນໃນຕໍ່ຫນ້າ. ບັນຫາທີ່ປະຊາຊົນສະເໜີມານັ້ນ ບາງບັນຫາ ທາງຄະນະ ສສຊ, ສສຂ ກໍໄດ້ຊີ້ແຈງ ແລະ ໃຫ້ຄວາມກະຈ່າງແຈ້ງ, ບາງບັນຫາ ຄະນະ ສສຊ, ສສຂ ແມ່ນນຳໄປສະເໜີຢູ່ໃນກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ ເພື່ອໃຫ້ພາກສ່ວນກ່ຽວຂ້ອງນຳໄປຄົ້ນຄວ້າພິຈາລະນາແກ້ໄຂໃນຕໍ່ໜ້າ. ພ້ອມນີ້,  ທ່ານຮອງປະທານສະພາແຫ່ງຊາດ ຍັງໄດ້ເນັ້ນ ແລະ ໃຫ້ທິດຊີ້ນຳຕໍ່ອຳນາດການປົກຄອງຂອງເມືອງ, ອຳນາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ຈົ່ງພ້ອມກັນຮັກສາໄດ້ເຖິງຄວາມສາມັກຄີ, ຮັກແພງເຊິ່ງກັນແລະກັນ, ຕ້ານປາກົດການຫຍໍ້ທໍ້ຕ່າງໆທີ່ຈະເກີດຂຶ້ນ, ເອົາໃຈໃສ່ສ້າງເສດຖະກິດໃນຄອບຄົວຂອງຕົນໃຫ້ມີຄວາມເຂັ້ມແຂງ ເພື່ອເຮັດໃຫ້ຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ.