ສປປ ລາວ ຍ້ອງຍໍກົມກອງ ແລະ ບຸກຄົນດີເດັ່ນ ຂອງສະພາແຫ່ງຊາດ ຫວຽດນາມ
15/01/2020

(ສພຊ) ໂດຍໄດ້ຮັບການມອບໝາຍຈາກສະຫາຍປະທານປະເທດ ແຫ່ງ ສປປລາວ, ຕາງໜ້າໃຫ້ພັກ, ລັດ, ສະພາແຫ່ງຊາດ ແລະ ປະຊາຊົນລາວບັນດາເຜົ່າ, ໃນວັນທີ 9 ມັງກອນ 2020 ທີ່່ນະຄອນຫລວງຮ່າໂນ້ຍ ສສ. ຫວຽດນາມ; ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ໄດ້ປະດັບຫລຽນໄຊ ແລະ ຫລຽນກາ  ໃຫ້ບັນດາກົມກອງລວມໝູ່ ແລະ ບຸກຄົນດີເດັ່ນ ຂອງສະພາແຫ່ງຊາດຫວຽດນາມ ຊຸດທີ XIII ແລະ ຊຸດທີ XIV ຈໍານວນ 12 ກົມກອງລວມໝູ່ ແລະ 52 ບຸກຄົນ. ທີ່ໄດ້ປະກອບສ່ວນສຸມເຫື່ອແຮງ, ສະຕິປັນຍາ, ຄວາມຮູ້ຄວາມສາມາດໃນການປະຕິບັດໜ້າທີ່ຂອງຕົນເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງສອງສະພາແຫ່ງຊາດລາວ ແລະ ຫວຽດນາມ ໃຫ້ນັບມື້ນັບແໜ້ນແຟ້ນ ແລະ ມີບາດກ້າວໃໝ່ຢ່າງບໍ່ຢຸດຢັ້ງ;  ໃນນັ້ນ, ໄດ້ປະດັບຫລຽນໄຊອິດສະຫລະຊັ້ນ 1 ໃຫ້ 5 ກົມກອງລວມໝູ່ ແລະ ບຸກຄົນດີເດັ່ນ 2 ສະຫາຍ. ປະດັບຫລຽນໄຊອິດສະຫລະຊັ້ນ 2 ໃຫ້ບຸກຄົນດີເດັ່ນ 6 ສະຫາຍ ປະດັບໂດຍສະຫາຍ ນາງ ປານີ ຢາທໍ່ຕູ້; ປະດັບຫລຽນໄຊອິດສະຫລະຊັ້ນ 3 ໃຫ້ແກ່ບຸກຄົນດີເດັ່ນ ຈໍານວນ 17 ສະຫາຍ ປະດັບໂດຍສະຫາຍ ເອກສະຫວ່າງ ວົງວິຈິດ ກໍາມະການສູນກາງພັກ, ຄະນະປະຈໍາ, ປະທານກໍາມາທິການການຕ່າງປະເທດ ສະພາແຫ່ງຊາດລາວ; ປະດັບຫລຽນໄຊມິດຕະພາບ ໃຫ້ 7 ກົມກອງລວມໝູ່ ແລະ ບຸກຄົນດີເດັ່ນ ຈໍານວນ 15 ສະຫາຍ ປະດັບໂດຍສະຫາຍ ນາງ ສວນສະຫວັນ ວິຍະເກດ ກໍາມະການສໍາຮອງສູນກາງພັກ, ຄະນະປະຈໍາ, ເລຂາທິການສະພາແຫ່ງຊາດລາວ; ປະດັບຫລຽນກາມິດຕະພາບ ໃຫ້ບຸກຄົນດີເດັ່ນຂອງສະພາແຫ່ງຊາດຫວຽດນາມ ຈໍານວນ 12 ສະຫາຍ ປະດັບໂດຍສະຫາຍ ຄໍາສຸກ ວີອິນທະວົງ ຄະນະປະຈໍາ, ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ.

ການປະດັບຫລຽນໄຊ ແລະ ຫລຽນກາໃຫ້ກົມກອງລວມໝູ່ ແລະ ບຸກຄົນດີເດັ່ນຂອງສະພາແຫ່ງຊາດຫວຽດ ນາມຄັ້ງນີ້ ເປັນຫລຽນສູງສຸດຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໄດ້ຈັດຂື້ນໃນທ່າມກາງບັນຍາ ກາດແຫ່ງຜົນສໍາເລັດຂອງກອງປະຊຸມພົບປະລະຫວ່າງ ການນໍາຂັ້ນສູງຂອງສອງພັກ-ສອງລັດ ລາວ-ຫວຽດນາມ; ຜົນສໍາເລັດກອງປະຊຸມຄັ້ງທີ 42 ຂອງຄະນະກໍາມະການຮ່ວມມືລາວ-ຫວຽດນາມ ແລະ ງານສະເຫລີມສະຫລອງວັນມູນເຊື້ອທະຫານອາສາສະໝັກ ແລະ ຊ່ຽວຊານຫວຽດນາມ ທີ່ໄດ້ປະຕິບັດພັນທະສາກົນຢູ່ ສປປລາວ ຄົບຮອບ 70 ປີ ການສະເຫລີມສະຫລອງຄົບຮອບ 74 ປີ ເລືອກຕັ້ງຄັ້ງທຳອິດ ເພື່ອເລືອກຕັ້ງສະພາແຫ່ງຊາດຫວຽດນາມ ທີ່ຫາກໍສໍາເລັດໃນຫວ່າງບໍ່ດົນມານີ້. ພິທີປະດັບຫລຽນໃນຄັ້ງນີ້ ມີຄວາມໝາຍສໍາຄັນຢ່າງຍິ່ງ, ເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແໜ້ນແຟ້ນຍິ່ງຂຶ້ນ.

ໃນໂອກາດດັ່ງກ່າວ ສະຫາຍ ນາງ ປານີ ຢາທໍ່ຕູ້ ຍັງໄດ້ນໍາພາຄະນະຜູ້ແທນສະພາແຫ່ງຊາດລາວ ເຂົ້າຢ້ຽມພົບປະກັບສະຫາຍ ນາງ ຫງວຽນ ທິ ກິມເງິນ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ. ຫວຽດນາມ ເຊິ່ງໃນການຢ້ຽມພົບປະ, ສອງຝ່າຍໄດ້ຕີລາຄາສູງການພົວພັນຮ່ວມມືລະຫວ່າງສອງສະພາແຫ່ງຊາດລາວ ແລະ ຫວຽດນາມ ແມ່ນມີການພົວພັນຮ່ວມມືເຊິ່ງກັນ ແລະ ກັນຢ່າງໃກ້ຊິດສະໜິດສະໜົມ ແລະ ມີຫລາຍດ້ານທີ່ພົ້ນເດັ່ນ ເປັນຕົ້ນແມ່ນການແລກປ່ຽນການຢ້ຽມຢາມ ນັບແຕ່ການນຳຂັ້ນສູງສຸດ ຈົນຮອດລະດັບວິຊາການເປັນຈຳນວນຫລາຍຄະນະ, ມີການຈັດກອງປະຊຸມສໍາມະນາ ແລະ ແລກປ່ຽນບົດຮຽນຮ່ວມກັນ ກ່ຽວກັບການຈັດຕັ້ງປະຕິບັດພາລະບົດບາດນິຕິບັນຍັດ, ໃນຫົວຂໍ້ວິທະຍາສາດຕ່າງໆ, ມີການແລກປ່ຽນທັດສະນະ, ຂໍ້ມູນ-ຂ່າວສານ ແລະ ສະໜັບສະໜູນ ເຊິ່ງກັນ ແລະ ກັນ, ໃນການສ້າງຄວາມອາດສາມາດໃຫ້ແກ່ສະມາຊິກສະພາແຫ່ງຊາດ, ສະພາປະຊາຊົນຂັ້ນທ້ອງຖິ່ນ ແລະ ວິຊາການຂອງສອງສະພາແຫ່ງຊາດລາວ-ຫວຽດນາມ; ການຮ່ວມກັນຕິດຕາມກວດກາ ການຈັດຕັ້ງປະຕິບັດບັນດາສັນຍາ, ຂໍ້ຕົກລົງການຮ່ວມມືຕ່າງໆ ລະຫວ່າງສອງລັດຖະບານ ເພື່ອຊຸກຍູ້ວຽກງານຂອງສອງຝ່າຍມີປະສິດທິຜົນກວ່າເກົ່າ. ພ້ອມດຽວກັນນີ້, ກໍໄດ້ພົວພັນຮ່ວມມືກັນ ໃນການເຄື່ອນໄຫວວຽກງານ ຢູ່ເວທີລັດຖະສະພາພາກພື້ນ ແລະສາກົນ. ເວົ້າລວມແລ້ວ, ການພົວພັນຮ່ວມມືຜ່ານມາ ຂອງສອງອົງການນິຕິບັນຍັດ ກໍໄດ້ປະກອບສ່ວນສຳຄັນ ແລະ ມີຜົນປະໂຫຍດອັນລ້ຳຄ່າຕໍ່ການພົວພັນສອງຝ່າຍ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ສືບຕໍ່ໄດ້ຮັບການເພີ່ມພູນຄູນສ້າງ ແລະ ເປັນຮູບປະທຳຂຶ້ນເປັນກ້າວໆມາ.