ຮອງປະທານ ສພຊ ຕິດຕາມກວດກາ ຢູ່ ແຂວງ ໄຊສົມບູນ
30/12/2019

(ສພຊ) ວັນທີ 19 ທັນວາ 2019 ທີ່ຫ້ອງວ່າການເມືອງອານຸວົງ ແຂວງໄຊສົມບູນ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ເຊິ່ງປະກອບດ້ວຍຮອງປະທານກໍາມາທິການບັນດາເຜົ່າ, ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ຕາງໜ້າກໍາມາທິການການຕ່າງປະເທດ ແລະ ວິຊາການທີ່ກ່ຽວຂ້ອງຈາກ ສພຊ ໄດ້ເຄື່ອນໄຫວຕິດຕາມກວດກາຢູ່ແຂວງໄຊສົມບູນ; ເຂົ້າຮ່ວມມີທ່ານ ບຸນສຸກ ຈອມວິສານ ຮອງເລຂາພັກແຂວງ, ປະທານສະພາປະຊາຊົນແຂວງ (ສພຂ) ໄຊສົມບູນ, ມີຮອງປະທານ ສພຂ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 18 ແຂວງໄຊສົມບູນ, ສະມາຊິກສະພາປະຊາຊົນແຂວງ (ສສຂ), ຕາງໜ້າອົງການແນວລາວສ້າງຊາດແຂວງ, ພະແນກການຕ່າງປະເທດແຂວງ, ກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ອົງການໄອຍະການປະຊາຊົນແຂວງ, ເລຂາທິການ ສພຂ ແລະ ພະນັກງານທີ່ກ່ຽວຂ້ອງ.

ພາຍຫລັງທ່ານ ບຸນສຸກ ຈອມວິສານ ໄດ້ລາຍງານສະພາບລວມການເຄື່ອນໄຫວວຽກງານຂອງ ສພຂ ໄຊສົມບູນ ໃນໄລຍະຜ່ານມາ,​ ທ່ານ ພົທ. ແສງນວນ ໄຊຍະລາດ ໄດ້ມີຄໍາຖາມເຈາະຈີ້ມ ກ່ຽວກັບປາກົດການຫຍໍ້ທໍ້ທາງດ້ານສາສະໜາໃນໄລຍະຜ່ານມາ, ຜົນການຈັດຕັ້ງປະຕິບັດການເຜີຍແຜ່ດໍາລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປລາວ ເລກທີ 315/ລບ; ການແກ້ໄຂຄະດີ ແລະ ການປະຕິບັດຕາມຄໍາຕັດສິນຂອງສານ ຮວມທັງການປະຕິບັດຕໍ່ຜູ້ຖືກຫາໃນຄ້າຍກັກຂັງຄື; ການຄຸ້ມຄອງການເຂົ້າ-ອອກເມືອງ ຫລື ຍົກຍ້າຍຂອງປະຊາຊົນ ແລະ ອື່ນໆ.

ຕາງໜ້າອົງການແນວລາວສ້າງຊາດແຂວງ ໄດ້ລາຍງານວ່າ: ໄລຍະຜ່ານມາໄດ້ເຕົ້າໂຮມຄວາມສາມັກຄີ ບັນດາເຜົ່າ ໂດຍການສຶກສາອົບຮົມດ້ານການເມືອງ-ແນວຄິດ ໃຫ້ສາມັກຄີພ້ອມພຽງກັນສ້າງສາພັດທະນາບ້ານເມືອງ,​ ບໍ່ໃຫ້ເຄື່ອນໄຫວສາສະໜາທີ່ຂັດຕໍ່ແນວທາງນະໂຍບາຍຂອງພັກ-ລັດ; ທົ່ວແຂວງມີປະຊາຊົນນັບຖືສາສະໜາພຸດ 27%, ສາສະໜາຄຣິດ 16%, ເຊື່ອຖືບັນພະບູລຸດ (ຜີ) 62%; ໄລຍະຜ່ານມາ ເຫັນວ່າບັນດາຜູ້ສອນສາສະໜາ ເຂົ້າໃຈກ່ຽວກັບແນວທາງນະໂຍບາຍຂອງພັກ-ລັດ ເປັນຢ່າງດີ; ການເຜີຍແຜ່ດໍາລັດ ເລກທີ 315/ລບ ແມ່ນສາມາດ ປະຕິບັດໄດ້ໃນບັນດາບ້ານທີ່ເຂົ້າເຖິງໄດ້ສະດວກ ແລະ ບັນດາບ້ານທີ່ຢູ່ຫ່າງໄກສອກຫລີກແມ່ນຍັງປະຕິບັດບໍ່ໄດ້, ມີຄວາມຫຍຸ້ງຍາກຂາດເຂີນງົບປະມານໃນການເຄື່ອນໄຫວເຜີຍແຜ່.  ຕາງໜ້າພະແນກພາຍໃນແຂວງ ໄດ້ລາຍງານວ່າ: ປາກົດການຫຍໍ້ທໍ້ທາງສາສະໜາ ແມ່ນການສ້າງຕັ້ງວັດ, ໂບດ ທີ່ບໍ່ໄດ້ຮັບການອະນຸຍາດ;​ ການລະດົມຊວນເຊື່ອເພື່ອລະດົມທຶນຕ່າງໆ; ມາດຕະການແກ້ໄຂ ແມ່ນໄດ້ມີການສຶກສາອົບຮົມການເມືອງ-ແນວຄິດ.  ຕາງໜ້າອົງການໄອຍະການປະຊາຊົນແຂວງ, ພະແນກຍຸຕິທໍາແຂວງ ແລະ ກອງບັນຊາການປ້ອງກັນຄວາມສະຫງົບ ກໍໄດ້ລາຍງານວ່າ: ການແກ້ໄຂຄະດີໃນໄລຍະຜ່ານມາ ກໍຄືການຈັດຕັ້ງປະຕິບັດຕາມຄໍາຕັດສິນຂອງສານ ແມ່ນໄດ້ເອົາໃຈໃສ່ໃຫ້ຖືກຕ້ອງ; ໄດ້ມີການປະສານສົມທົບກັນລະຫວ່າງອົງການໄອຍະການປະຊາຊົນແຂວງ,  ກອງບັນຊາການປ້ອງກັນຄວາມສະຫງົບ (ປກສ) ແລະ ອົງການຈັດຕັ້ງຂັ້ນທ້ອງຖິ່ນຂອງແຂວງຂອງເມືອງ; ໃນຈໍານວນ 147 ຄະດີ,​ ປິດຄະດີແລ້ວ 14 ເລື່ອງ,​ ປະຕິບັດໄດ້ 95% ຂອງແຜນການປີ.

ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ເນັ້ນໃຫ້ແຕ່ລະພະແນກການ ເພີ່ມທະວີຄວາມຮັບຜິດຊອບໜ້າທີ່ການເມືອງຂອງຕົນ; ໃຫ້ເອົາໃຈໃສ່ເພີ່ມທະວີຄວາມສາມັກຄີພາຍໃນເປັນປຶກແຜ່ນ  ໂດຍສະເພາະຄວາມສາມັກຄີເປັນເອກະພາບພາຍໃນພັກ, ສຶກສາອົບຮົມດ້ານການເມືອງ-ແນວຄິດ, ບົນພື້ນຖານຄວາມສະເໝີພາບບັນດາເຜົ່າ; ສໍາລັບວຽກງານສາສະໜາ ໃຫ້ມີການສຶກສາອົບຮົມດ້ານການເມືອງ-ແນວຄິດ; ສາສະໜາແມ່ນທີ່ເພິ່ງທາງດ້ານຈິດວິນຍານຂອງຄົນເຮົາ, ແຕ່ບໍ່ໃຫ້ເຄື່ອນໄຫວທາງສາສະໜາ ທີ່ຂັດຕໍ່ລັດຖະທໍາມະນູນ ແລະ ກົດໝາຍ, ການສຶກສາອົບຮົມຕ້ອງດ້ວຍຄວາມນຸ້ມນວນ, ຄ່ອງແຄ້ວ ແລະ ດ້ວຍເຫດດ້ວຍຜົນ; ເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າເພື່ອແກ້ໄຂຊີວິດການເປັນຢູ່ຂອງປະຊາຊົນ ໂດຍອີງໃສ່ສະພາບທ່າແຮງບົ່ມຊ້ອນຄວາມເປັນຈິງຂອງທ້ອງຖິ່ນ ໂດຍສະເພາະການປູກຝັງ ແລະ ລ້ຽງສັດ ຫລື ການຜະລິດຫັດຖະກໍາເປັນສິນຄ້າ; ໃຫ້ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການສ້າງຮາກຖານປະຊາຊົນບັນດາເຜົ່າ, ຕ້ອງຄຸ້ມຄອງ ແລະ ຕ້ອງກໍາໃຫ້ໄດ້ຄົນເຂົ້າ-ອອກເມືອງຜິດກົດໝາຍ ຕະຫລອດຮອດການໄປສ້າງຄອບຄົວກັບຄົນແຂວງອື່ນ ຫລື ຕ່າງປະເທດ ແລະ ການເຄື່ອນຍ້າຍມາຕັ້ງຖິ່ນຖານໃໝ່; ສືບຕໍ່ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກ ໃຫ້ຟົດຟື້ນກວ່າເກົ່າ.

ໃນໂອກາດນີ້, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ຢ້ຽມຢາມ ແລະ ມອບເຄື່ອງບໍລິໂພກຈໍານວນໜຶ່ງ ໃຫ້ນາຍ ແລະ ພົນທະຫານ ກອງບັນຊາການທະຫານແຂວງໄຊສົມບູນ ເພື່ອເປັນກໍາລັງໃຈໃນການປະຕິບັດໜ້າທີ່.