ປະທານ ສພຊ ຕ້ອນຮັບການຂໍ່ານັບຂອງລັດຖະມົນຕີກະຊວງຍຸຕິທໍາແຫ່ງ ສສ. ຫວຽດນາມ
17/12/2019

          (ສພຊ) ຕອນບ່າຍ ວັນສຸກ ທີ 6 ທັນວາ 2019 ທີ່ສະພາແຫ່ງຊາດ (ສພຊ) ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດລາວ (ສພຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເລ ແທັງ ລ່ອງ ກໍາມະການສູນກາງພັກຄອມມູນິດຫວຽດນາມ, ລັດຖະມົນຕີກະຊວງຍຸຕິທໍາແຫ່ງ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມ ສປປລາວ ໃນວັນທີ 5-7 ທັນວາ 2019.

ໃນໂອກາດນີ້, ສະຫາຍ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ສະຫາຍ ເລ ແທັງ ລ່ອງ ທັງຕີລາຄາສູງຕໍ່ການເດີນທາງມາຢ້ຽມຢາມ ສປປລາວ ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ເປັນມູນເຊື້ອ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ; ແລະ ຊົມເຊີຍຕໍ່ຜົນສໍາເລັດຂອງການພົບປະລະຫວ່າງສອງລັດຖະມົນຕີກະຊວງຍຸຕິທໍາລາວ-ຫວຽດນາມ.  ພ້ອມນັ້ນ, ຍັງໄດ້ສະເໜີໃຫ້ທັງສອງກະຊວງສືບຕໍ່ຖອດຖອນບົດຮຽນແລກປ່ຽນຄະນະຜູ້ແທນເຊິ່ງກັນ ແລະ ກັນ ເປັນຕົ້ນແມ່ນໃຫ້ກະຊວງຍຸຕິທໍາ ຖອດຖອນບົດຮຽນໃນການປັບປຸງ ແລະ ສ້າງກົດໝາຍຕ່າງໆ ນໍາກະຊວງຍຸຕິທໍາແຫ່ງ ສສ. ຫວຽດນາມທີ່ໄດ້ຮັບຄວາມສຳເລັດ.

ສະຫາຍ ເລ ແທັງ ລ່ອງ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ນາງ ປານີ ຢາທໍ່ຕູ້ ທີ່ໄດ້ເສຍສະຫລະເວລາອັນມີຄຸ່ນຄ່າໃຫ້ການຕ້ອນຮັບອັນອົບອຸ່ນ ພ້ອມທັງໄດ້ລາຍງານຜົນຂອງການພົບປະຂອງພົບປະລະຫວ່າງສອງລັດຖະມົນຕີກະຊວງຍຸຕິທໍາ ລາວ-ຫວຽດນາມ, ການເຂົ້າຢ້ຽມຂໍ່ານັບປະທານປະເທດ ແລະ ນາຍົກລັດຖະມົນຕີ ສປປລາວ ແລະ ຍັງກ່າວວ່າພ້ອມທີ່ຈະສືບຕໍ່ຮ່ວມມືກັບກະຊວງຍຸຕິທໍາລາວ ຕາມການແນະນໍາຂອງປະທານສະພາແຫ່ງຊາດລາວ.