ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ປິດລົງດ້ວຍຜົນສຳເລັດອັນຈົບງາມ
09/12/2019

ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໄດ້ປິດລົງດ້ວຍຜົນສຳເລັດອັນຈົບງາມ ພາຍຫຼັງທີ່ດຳເນີນມາເປັນເວລາ 20 ວັນ ແຕ່ວັນທີ 7 ພະຈິກ - 6 ທັນວາ ນີ້ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະ ທານສະພາແຫ່ງຊາດ ໃຫ້ກຽດເຂົ້າຮ່ວມປິດກອງປະຊຸມມີທ່ານ ບຸນຍັງ ວໍລະຈິດ ປະທານປະເທດ ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີການນຳຂັ້ນສູງຂອງພັກ-ລັດ, ຄະນະລັດຖະບານ, ອົງການຈັດຕັ້ງພັກ-ລັດ, ພະນັກງານອາວຸໂສ ບຳນານ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
    ກອງປະຊຸມສະໄໝສາ ມັນ ເທື່ອທີ 8 ຂອງສະພາແຫ່ງຊາດຊຸດທີ VIII ໄດ້ພິຈາລະນາຮັບຮອງເອົາບັນຫາສຳຄັນ ພື້ນຖານຂອງປະເທດຊາດ ໂດຍໄດ້ອອກເປັນມະຕິກອງປະຊຸມ ຈຳນວນ 11 ສະບັບ ແລະ ພິຈາລະນາຮັບຮອງເອົາກົດໝາຍຈຳນວນ 8 ສະບັບຄື: ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການແຕ່ງຕັ້ງ ລັດຖະມົນຕີກະຊວງແຜນການ ແລະ ການລົງທຶນ; ການແຕ່ງຕັ້ງທ່ານ ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ; ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2019 ແລະ ທິດທາງແຜນການ ປະຈຳປີ 2020; ບົດສະຫຼຸບການເຄື່ອນໄຫວວຽກງານຂອງອົງການກວດສອບແຫ່ງລັດ ປະຈຳປີ 2019, ທິດທາງແຜນການເຄື່ອນໄຫວ ປະຈໍາປີ 2020, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ແລະ ບົດລາຍງານຂອງອົງ ການກວດກາລັດຖະບານ ກ່ຽວກັບຜົນການກວດກາ ຕາມຜົນການກວດສອບ ສົກປີ 2014-2015, 2015-2016 ແລະ ປີ 2017; ບົດລາຍງານຂອງລັດຖະບານ ກ່ຽວກັບການສະຫຼຸບຂາດຕົວການຈັດຕັ້ງປະຕິບັດງົບປະມານ ປະຈຳປີ 2018, ການຈັດຕັ້ງປະຕິບັດ ແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດໝົດປີ 2019 ແລະ ແຜນການປະຈໍາປີ 2020; ບົດລາຍງານຜົນການຕິດຕາມກວດກາ ຂອງຄະນະປະຈໍາສະພາແຫ່ງຊາດ ກ່ຽວກັບການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍ ທີ່ຕິດພັນກັບການສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທໍາ ຂອງປະຊາຊົນ; ນອກນີ້, ກອງປະຊຸມຍັງມີມະຕິຮັບຮອງເອົາບົດລາຍງານຜົນການຕິດຕາມ ການກວດກາ ຂອງຄະນະປະຈໍາສະພາແຫ່ງຊາດ ກ່ຽວກັບການຈັດຕັ້ງປະຕິບັດກົດໝາຍ ແລະ ນິຕິກໍາລຸ່ມກົດໝາຍ ທີ່ຕິດພັນກັບການຈັດເກັບລາຍຮັບ; ບົດລາຍງານຜົນການຕິດຕາມກວດກາ ຂອງຄະນະປະຈຳສະພາແຫ່ງຊາດ ກ່ຽວກັບການຈັດຕັ້ງປະຕິບັດນິຕິກໍາ ທີ່ພົວພັນກັບການເຊົ່າ ແລະ ສໍາປະທານທີ່ດິນ; ບົດລາຍງານການຈັດຕັ້ງປະຕິບັດ ການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການ ປະຈໍາປີ 2020 ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ການຈັດຕັ້ງປະເມີນຜົນການປະຕິບັດໜ້າທີ່ ຂອງບຸກຄະລາກອນດໍາລົງຕໍາແໜ່ງ ທີ່ສະພາແຫ່ງຊາດ ເລືອກຕັ້ງ ແລະ ຮັບຮອງເອົາການແຕ່ງ ຕັ້ງ ແລະ ມະຕິຮັບຮອງເອົາ ບົດລາຍງານການຈັດຕັ້ງປະຕິ ບັດການເຄື່ອນໄຫວວຽກງານ ປະຈໍາປີ 2019 ແລະ ແຜນ ການເຄື່ອນໄຫວວຽກງານ ປີ 2020 ຂອງສະພາແຫ່ງຊາດ.
    ກອງປະຊຸມ ໄດ້ຮັບຮອງເອົາການສ້າງ ແລະ ປັບປຸງກົດໝາຍ ຈຳນວນ 8 ສະບັບ ຄື: ກົດໝາຍວ່າດ້ວຍການອະນາໄມ ແລະ ສົ່ງເສີມສຸຂະ ພາບ; ກົດໝາຍ ວ່າດ້ວຍກິລາ-ກາຍຍະກຳ; ກົດໝາຍ ວ່າດ້ວຍການລົ້ມລະລາຍຂອງວິສາຫະກິດ; ກົດໝາຍ ວ່າດ້ວຍຫຼັກຊັບ; ກົດໝາຍ ວ່າດ້ວຍຄວາມສະເໝີພາບຍິງ-ຊາຍ; ກົດໝາຍ ວ່າດ້ວຍການປະກັນໄພ; ກົດໝາຍ ວ່າດ້ວຍຮູບເງົາ ແລະ ກົດໝາຍ ວ່າດ້ວຍການສົ່ງເສີມການລົງທຶນ. ສະພາແຫ່ງຊາດ ຊຸດທີ VIII ນີ້ ໄດ້ສະເໜີໃຫ້ບັນດາກະຊວງ, ອົງການກ່ຽວຂ້ອງຂຶ້ນຕອບຄໍາຖາມ ທີ່ພົວພັນກັບບັນຫາພົ້ນເດັ່ນຂອງສັງຄົມ ທີ່ສະມາຊິກສະພາແຫ່ງຊາດໄດ້ຍົກຂຶ້ນ ເປັນຕົ້ນແມ່ນຂົງເຂດການເງິນ, ກະສິກຳ ແລະ ປ່າໄມ້, ອຸດສາຫະກຳ ແລະ ການຄ້າ, ປ້ອງກັນຄວາມສະຫງົບ, ແຜນການ ແລະ ການລົງທຶນ, ໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່, ທະນາຄານແຫ່ງ ສປປ ລາວ, ອົງການກວດສອບແຫ່ງລັດ, ອົງການກວດກາລັດຖະບານ. ພ້ອມດຽວກັນນັ້ນ, ທ່ານ ນາຍົກລັດຖະມົນຕີ ໃນນາມຫົວໜ້າລັດຖະບານ ກໍໄດ້ມີຄຳເຫັນຕໍ່ກອງປະຊຸມສະພາແຫ່ງຊາດ ທັງເປັນການຊີ້ແຈງຕໍ່ຄຳຊັກຖາມທີ່ສະມາຊິກສະ ພາ ແຫ່ງຊາດຍົກຂຶ້ນດ້ວຍບັນ ຍາກາດທີ່ດີ ແລະ ສ່ອງແສງໃຫ້ເຫັນຄວາມຮັບຜິດຊອບຮ່ວມກັນຂອງ ສະພາແຫ່ງຊາດ ແລະ ລັດຖະບານທີ່ມີຕໍ່ປະຊາຊົນ.
ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ໃນໄລຍະດຳເນີນກອງປະຊຸມມີປະຊາຊົນ ສົ່ງຄຳຄິດຄຳເຫັນຜ່ານໂທລະສັບສາຍດ່ວນທັງໝົດຫຼາຍກວ່າ 721 ສາຍ, ມີ 113 ເລື່ອງ ມາຍັງກອງປະຊຸມສະພາແຫ່ງຊາດ ຊຶ່ງພົວພັນເຖິງການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ໃນນີ້ ບັນຫາທີ່ພົ້ນເດັ່ນ ແມ່ນພົວພັນເຖິງບັນຫາຢາກໃຫ້ຂຶ້ນເງິນເດືອນໃຫ້ພະນັກງານ, ບັນຫາບໍລິສັດພີເອັສ (PS), ບັນຫາຢາເສບຕິດ, ບັນຫາທີ່ດິນ, ບັນຫາກໍ່ສ້າງເສັ້ນທາງ, ບັນຫາການສຶກສາ ແລະ ນະໂຍບາຍ ຕໍ່ນັກຮົບເກົ່າ ຕໍ່ກັບບັນຫາທີ່ສົ່ງມາທາງໂທລະສັບສາຍດ່ວນດັ່ງກ່າວ ກອງເລຂາກອງປະຊຸມຈະໄດ້ສັງລວມມອບໃຫ້ກຳມາທິການທີ່ກ່ຽວຂ້ອງ ປະສານສົມທົບພາກສ່ວນຕ່າງໆຂອງລັດຖະບານຄົ້ນຄວ້າແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
   ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດປິດກອງປະຊຸມ ໂດຍຍົກໃຫ້ເຫັນບາງຕອນສຳຄັນ ກອງປະຊຸມຄັ້ງນີ້ ຊຶ່ງເປັນຄັ້ງທຳອິດທີ່ໄດ້ດຳເນີນການປະເມີນຜົນ ດ້ວຍການໃຫ້ຄະແນນ ຕໍ່ການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງ ທີ່ສະພາເລືອກຕັ້ງ ແລະ ຮັບຮອງເອົາການແຕ່ງຕັ້ງ ຈຳນວນ 69 ທ່ານ, ເປັນຍິງ 14 ທ່ານ. ຜ່ານການປະເມີນຕົວຈິງ ເຫັນວ່າບຸກຄະລາກອນດັ່ງກ່າວ ຍັງໄດ້ຮັບຄວາມໄວ້ວາງໃຈ ຈາກຕົວແທນຂອງປະຊາຊົນເປັນສ່ວນຫຼາຍ ແລະ ຫວັງຢ່າງຍິ່ງວ່າບຸກຄະລາກອນດັ່ງກ່າວ ຈະສືບຕໍ່ເສີມຂະຫຍາຍຜົນງານຂອງຕົນ ເພື່ອປັບປຸງ ແລະ ບຳລຸງສ້າງ ດ້ານຄຸນທາດການເມືອງ, ຄຸນສົມບັດ ສິນທຳປະຕິວັດ ແລະ ຍົກສູງຄວາມຮູ້ ຄວາມສາມາດ, ຄວາມຮັບຜິດຊອບການເມືອງ ກໍຄື ຄວາມເປັນເຈົ້າການນຳພາຈັດຕັ້ງປະຕິບັດວຽກງານຕົວຈິງ ໃນຂົງເຂດຕົນຮັບຜິດຊອບ ໃຫ້ເກີດດອກອອກຜົນຢ່າງເປັນຮູບປະທຳຫຼາຍຂຶ້ນກວ່າເກົ່າ ເພື່ອຕອບສະໜອງຄວາມຮຽກຮ້ອງຕ້ອງການ ຂອງການພັດທະນາເສດຖະກິດ - ສັງຄົມ ກໍຄືການເຊື່ອມໂຍງກັບພາກພື້ນ ແລະ ສາກົນຂອງປະເທດໃນໄລຍະໃໝ່.