ສພຊ ມີຜົນສຳເລັດຫຼາຍດ້ານໃນການປະຕິບັດ ແຜນການເຄື່ອນໄຫວວຽກງານ ປະຈຳປິ 2019
06/12/2019

ປຊຊ: ທ່ານ ນາງ ສີໃສ ລືເດດ ມູນສອນ ຮອງປະທານສະພາ ແຫ່ງຊາດ ໄດ້ຂຶ້ນລາຍງານ ການຈັດຕັ້ງປະຕິບັດແຜນການ ເຄື່ອນໄຫວວຽກງານ ປະຈຳປີ 2019 ແລະ ແຜນການ ເຄື່ອນໄຫວວຽກງານ ປະຈຳປີ 2020 ຂອງສະພາແຫ່ງຊາດ ຕາມວາລະກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໃນວັນທີ 5 ທັນວານີ້ ໂດຍມີທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ເປັນປະທານກອງປະຊຸມ. ທ່ານ ນາງ ສີໃສ ລືເດດມູນສອນ ໄດ້ກ່າວລາຍງານບາງເນື້ອໃນສຳຄັນວ່າ: ດ້ານນິຕິບັນຍັດ ໄດ້ສຳເລັດການຮຽບຮຽງບັນດາກົດໝາຍທີ່ໄດ້ຮັບຮອງຢູ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ຈຳນວນ 10 ສະບັບ; ພິຈາລະນາ ແລະ ຮັບຮອງເອົາຮ່າງກົດໝາຍທີ່ສະ ເໜີ ຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໄດ້ 8 ສະບັບ ເທົ່າກັບ 61,53% ໃນຈຳນວນ 13 ສະບັບ ຂອງແຜນການສ້າງ ແລະ ປັບປຸງ ກົດໝາຍ ປະຈຳປີ 2019; ອອກ ມະຕິສະບັບເລກທີ 81/ຄປຈ ລົງວັນທີ 15/5/2019 ວ່າດ້ວຍການຕີລາຄາຄວາມໝາຍມາດຕາ 35 ຂໍ້ 2 ຂອງກົດໝາຍ ວ່າດ້ວຍສ່ວຍສາອາກອນ; ໃຫ້ສັດ ຕະຍາບັນແກ່ສົນທິສັນຍາ ແລະ ສັນຍາສາກົນທີ່ ສປປ ລາວ ເປັນພາຄີ ຕາມການສະເໜີຂອງລັດ ຖະບານ 7 ສະບັບ. ດ້ານການຕົກລົງບັນຫາສຳຄັນຂອງຊາດ ຄະນະປະຈຳສະພາແຫ່ງຊາດ ໄດ້ພິຈາລະນາບັນຫາສຳຄັນຕ່າງໆທັງໝົດ 114 ບັນຫາ ແລະ ຮັບຮອງເປັນມະຕິຂອງຄະນະປະຈຳສະພາແຫ່ງຊາດ 50 ສະບັບ, ໃນນີ້ ມະຕິວຽກງານລັດຖະບານ 6 ສະບັບ, ມະຕິວຽກງານອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ 33 ສະບັບ, ມະຕິວຽກງານອົງການກວດສອບແຫ່ງລັດ 4 ສະບັບ ແລະ ມະຕິວຽກງານສະພາແຫ່ງຊາດ 7 ສະບັບ, ໄດ້ປະກອບຄຳເຫັນຕໍ່ຮ່າງລັດຖະບັນຍັດຂອງປະທານປະເທດ ວ່າດ້ວຍຄ່າທຳນຽມ ແລະ ຄ່າບໍລິການ ເພື່ອມອບໃຫ້ພາກສ່ວນກ່ຽວຂ້ອງນຳໄປປັບປຸງ. ດ້ານການຕິດຕາມກວດກາ ໄດ້ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ມະຕິກອງປະຊຸມສະໄໝສາມັນເທື່ອທີ 6 ແລະ ເທື່ອທີ 7 ຂອງສະພາແຫ່ງຊາດ ຊຸດທີ VIII; ເອົາໃຈໃສ່ກວດກາ, ຄົ້ນຄວ້າ ແລະ ພິຈາລະນາຄຳ ຮ້ອງຂໍຄວາມເປັນທຳຂອງປະ ຊາຊົນ ມາຮອດເດືອນຕຸລາປະ ຕິບັດໄດ້ 392 ເລື່ອງ ເທົ່າກັບ 47,57% ຂອງຄຳຮ້ອງທັງໝົດ 824 ເລື່ອງ; ຕ້ອນຮັບ ແລະ ໃຫ້ຄຳປຶກສາແກ່ປະຊາຊົນກ່ຽວ ກັບຄຳຮ້ອງຂໍຄວາມເປັນທຳ ຈຳນວນ 220 ຄັ້ງ; ໄດ້ສັງລວມ ຄຳເຫັນຂອງສັງຄົມຜ່ານໂທ ລະສັບສາຍດ່ວນກອງປະຊຸມສະພາແຫ່ງຊາດ ສົ່ງໃຫ້ບັນດາ ອົງການລັດທີ່ກ່ຽວຂ້ອງຄົ້ນ ຄວ້າ, ພິຈາລະນາແກ້ໄຂຕາມລະບຽບການ. ດ້ານການສ້າງຄວາມເຂັ້ມແຂງໃຫ້ສະພາແຫ່ງຊາດໄດ້ສຳເລັດການສ້າງນິຕິກຳ ເພື່ອເປັນບ່ອນອີງໃຫ້ແກ່ການປະສານງານລະຫວ່າງສະ ພາແຫ່ງຊາດກັບພາກສ່ວນຕ່າງໆ ຈຳນວນ 2 ສະບັບ; ຈັດສຳມະນາ ແລະ ຝຶກອົບຮົມໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ເສ ນາທິການ ຈຳນວນ 36 ຄັ້ງ, ໃນນີ້ ສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ 9 ຄັ້ງ; ສ້າງຄວາມເຂັ້ມແຂງໃຫ້ແກ່ພະນັກງານ- ລັດຖະກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ 27 ຄັ້ງ; ລົງຕິດຕາມຊຸກຍູ້ ແລະ ເກັບກຳຂໍ້ມູນຂອງຄະນະເລຂາທິການສະພາແຫ່ງຊາດ, ຄະນະຮັບຜິດຊອບວຽກງານເຂດເລືອກຕັ້ງ ແລະ ສະຖາບັນຄົ້ນຄວ້ານິຕິກຳສະພາແຫ່ງຊາດ ຢູ່ທ້ອງຖິ່ນ ຈຳນວນ 8 ຄະນະ; ດຳເນີນການກໍ່ສ້າງພື້ນຖານໂຄງລ່າງຈຳນວນ 11 ແຂວງ ກໍຄືການກໍ່ສ້າງຕຶກສະ ພາຫຼັງໃໝ່ ແລະ ກໍ່ສ້າງຕຶກສະ ພາປະຊາຊົນຂັ້ນແຂວງໃນນີ້ ພວມດຳເນີນການກໍ່ສ້າງຢູ່ນະ ຄອນຫຼວງວຽງຈັນ ແລະ ແຂວງໄຊຍະບູລີ, ພວມສືບຕໍ່ດຳເນີນການຕໍ່ເຕີມ ຢູ່ແຂວງບໍ່ແກ້ວ ແລະ ພວມສຳຫຼວດ-ອອກແບບອີກ 8 ແຂວງ. ດ້ານການ ເຄື່ອນໄຫວຂອງຄະນະສະມາ ຊິກສະພາແຫ່ງຊາດ ປະຈຳເຂດເລືອກຕັ້ງໄດ້ສ້າງເງື່ອນໄຂໃຫ້ສະມາຊິກສະພາແຫ່ງຊາດ ປະຈຳເຂດເລືອກຕັ້ງໄດ້ພົບປະ ແລະ ເຜີຍແຜ່ຜົນກອງປະຊຸມສະໄໝສາມັນເທື່ອທີ 6 ແລະ ເທື່ອທີ 7 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນຂັ້ນແຂວງ ຊຸດທີ I ໃຫ້ປະຊາຊົນບັນດາເຜົ່າໄດ້ຈຳ ນວນ 2.605 ຈຸດ, ມີຜູ້ເຂົ້າຮ່ວມ ທັງໝົດຈຳນວນ 373.889 ຄົນ, ຍິງ 171.370 ຄົນ, ສະມາ ຊິກສະພາແຫ່ງຊາດໄດ້ເປັນເຈົ້າການລະດົມທຶນຮອນ ແລະ ວັດ ຖຸສິ່ງຂອງມອບໃຫ້ອົງການປົກ ຄອງທ້ອງຖິ່ນ ເພື່ອຊ່ວຍເຫຼືອປະຊາຊົນ ລວມມູນຄ່າ 2.497 ລ້ານກວ່າກີບ. ດ້ານການພົວ ພັນກັບອົງການອື່ນຂອງລັດ ໄດ້ປະສານສົມທົບກັບອົງການ ຈັດຕັ້ງພັກ-ລັດ ຈັດຕັ້ງປະຕິບັດ ບັນດາວຽກງານສຳຄັນຕາມ ກົດ ໝາຍ ແລະ ນິຕິກຳທີ່ກ່ຽວຂ້ອງ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກໃຫ້ບັນລຸຕາມຄາດໝາຍທີ່ວາງໄວ້. ດ້ານການເຄື່ອນໄຫວວຽກງານຕ່າງປະເທດໄດ້ສຳ ເລັດການເຄື່ອນໄຫວວຽກງານ ຕ່າງປະເທດ 112 ຄັ້ງ, ໃນນີ້ ການພົວພັນສອງຝ່າຍ, ຢ້ຽມ ຢາມ, ແລກປ່ຽນບົດຮຽນກັບບັນ ດາປະເທດເພື່ອນມິດ, ຕ້ອນ ຮັບບັນດາຄະນະຜູ້ແທນຈາກຕ່າງປະເທດ ລວມທັງທູຕານຸທູດ ແລະ ອົງການຈັດຕັ້ງສາກົນ 76 ຄັ້ງ; ການພົວພັນຫຼາຍຝ່າຍໄດ້ເຂົ້າຮ່ວມກອງປະຊຸມລະດັບຕ່າງໆ 36 ຄັ້ງ ແລະ ໄດ້ເປັນເຈົ້າພາບກອງປະ ຊຸມສຳມະນາຮ່ວມກັບບັນດາປະເທດ 5 ຄັ້ງ. ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ໄດ້ຂຶ້ນປະກອບຄຳເຫັນຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2019 ແລະ ແຜນ ການເຄື່ອນໄຫວວຽກງານປະ ຈຳປີ 2020 ຂອງສະພາແຫ່ງຊາດ ວ່າ: ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2019 ຂອງສະພາແຫ່ງຊາດມີຜົນສຳເລັດຫຼາຍດ້ານທີ່ພົ້ນເດັ່ນ, ແຕ່ຍັງມີບາງຂໍ້ຄົງຂ້າງທີ່ເປັນຫາງສຽງສະເໜີໃຫ້ສະພາແຫ່ງຊາດໄດ້ປະສານສົມທົບ ທັງຊຸກຍູ້ພາກສ່ວນກ່ຽວຂ້ອງພິຈາລະນາແກ້ໄຂ ເປັນຕົ້ນແມ່ນກົດໝາຍທີ່ສະພາໄດ້ຮັບຮອງລວມທັງກົດໝາຍສ້າງໃໝ່ ແລະ ກົດໝາຍສະບັບປັບປຸງ ມີທັງໝົດ 145 ສະບັບ ແຕ່ການໂຄສະນາ, ເຜີຍແຜ່ກົດໝາຍຂອງພາກສ່ວນກ່ຽວ ຂ້ອງ ເພື່ອເຮັດໃຫ້ທຸກຄົນໃນສັງຄົມມີຄວາມຮັບຮູ້ເຂົ້າໃຈ, ມີສະຕິເຄົາລົບ, ປະຕິບັດກົດໝາຍ ແມ່ນຍັງບໍ່ທັນກວ້າງຂວາງ. ການສ້າງ ແລະ ຮັບຮອງເອົານິຕິກຳລຸ່ມກົດໝາຍຢູ່ຂັ້ນກະຊວງ - ອົງການປົກຄອງທ້ອງຖິ່ນຂອງແຂວງ ຈຳນວນໜຶ່ງຍັງຊັກຊ້າບໍ່ທັນສະພາບການ ຫຼື ບໍ່ໄດ້ປະຕິບັດ. ການຕິດຕາມກວດກາແກ້ໄຂຜົນການກວດກາຍັງເຮັດບໍ່ໄດ້ດີເທົ່າທີ່ຄວນ, ເມື່ອມີການກວດສອບ - ກວດກາ ພົບເຫັນບັນຫາແລ້ວ ແຕ່ການແກ້ໄຂຍັງບໍ່ເດັດຂາດ, ກໍລະນີມີການປະຕິບັດວິໄນ ກໍບໍ່ທັນສົມເຫດສົມຜົນ, ບໍ່ທັນຊັດເຈນ. ພາຍຫຼັງທີ່ ທ່ານ ປະທານກອງປະຊຸມໄດ້ໃຫ້ຄຳເຈາະຈີ້ມ ແລະ ທິດຊີ້ນຳໃນການຄົ້ນຄ້ວາປະກອບຄຳຄິດຄຳເຫັນຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2019 ແລະ ແຜນ ການເຄື່ອນໄຫວວຽກງານປະ ຈຳປີ 2020 ຂອງສະພາແຫ່ງຊາດ, ບັນດາທ່ານ ສສຊ ກໍໄດ້ສຸມທຸກສະຕິປັນຍາ, ຄົ້ນຄວ້າ ແລະ ປະກອບຄຳຄິດຄຳເຫັນ ເພື່ອໃຫ້ບົດລາຍງານດັ່ງກ່າວ ມີເນື້ອໃນລະອຽດຖີ່ຖ້ວນສົມ ບູນ ແລະ ເຮັດໃຫ້ທິດທາງແຜນການເຄື່ອນໄຫວວຽກງານ ປະຈຳປີ 2020 ຂອງສະພາແຫ່ງຊາດ ອຸດົມສົມບູນ, ຮອບດ້ານ ແລະ ພາວະວິໄສຖືກຕ້ອງກັບ ສະພາບການຕົວຈິງຂອງປະ ເທດເຮົາ.