ເຖິງຄະດີຈະໄດ້ຮັບການແກ້ໄຂ ແຕ່ການເຮັດວຽກຂອງພະນັກງານ ຈຳນວນໜຶ່ງຍັງບໍ່ມີຄວາມໂປ່ງໃສ
22/11/2019

ປປຊ. ການປະກອບຄຳເຫັນໃສ່ ບົດລາຍງານກ່ຽວກັບການເຄື່ອນ ໄຫວວຽກງານ ປະຈຳປີ 2019 ແລະ ທິດທາງໜ້າທີ່ວຽກງານຈຸດສຸມປີ 2020 ຂອງອົງການໄອຍະການປະຊາຊົນສູງສຸດ ແລະ ຂອງສານປະຊາຊົນສູງສຸດ, ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ໃນວັນທີ 21 ພະຈິກນີ້ ໂດຍການເປັນປະທານຂອງທ່ານນາງ ສີໃສ ລືເດດມູນສອນ ຮອງປະທານສະພາແຫ່ງຊາດ. ການປະກອບຄຳເຫັນຂອງສະມາຊິກສະພາແຫ່ງຊາດໂດຍລວມແລ້ວກໍເຫັນດີເປັນເອກະພາບສູງຕໍ່ການລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ເຫັນວ່າມີຫຼາຍຄະດີໄດ້ຮັບການແກ້ໄຂແລະ ກໍຍັງມີບາງປະກົດການຈຳນວນໜຶ່ງ ໂດຍສະເພາະກ່ຽວກັບຈັນຍາບັນ, ຈັນຍາທຳຂອງພະນັກງານ ແລະ ກົນໄກການປະສານງານ ຫຼື ກົນໄກການແລກປ່ຽນແຜນວິທີເຮັດວຽກຍັງບໍ່ທັນຮັດກຸ່ມ ເຖິງວ່າມີການແກ້ໄຂຄະດີ ຫຼື ຄວາມຮັບຜິດຊອບໄດ້ດີກໍຕາມ ແຕ່ຍັງມີພະນັກງານຈຳນວນໜຶ່ງທີ່ເຫັນວ່າ ເຮັດວຽກຍັງບໍ່ມີຄວາມໂປ່ງໃສ ໂດຍສະເພາະກ່ຽວກັບການເກັບກຳຂໍ້ມູນ ຫຼື ການວິເຄາະວິໄຈ ຕໍ່ບັນຫາດັ່ງກ່າວ ຈຶ່ງເຮັດໃຫ້ມີການອຸທອນ ໂດຍສະເພາະຢູ່ສານຂັ້ນຕົ້ນ ສະນັ້ນຢູ່ໃນທິດທາງກໍໄດ້ກຳນົດກ່ຽວກັບການແກ້ໄຂ ແຕ່ຢາກໃຫ້ເບິ່ງການວິເຄາະບັນຫາ ກ່ຽວກັບກົນໄກການປະສານງານຢູ່ນຳພາກສ່ວນໃດ, ເປັນນຳກົນໄກນິຕິກຳຕ່າງໆ ຫຼື ເປັນນຳພະແນກການ, ບຸກຄົນ ຢາກໃຫ້ມີຈຸດສຸມລົງເລິກໃສ່ບັນຫາດັ່ງກ່າວຢ່າງຈິງຈັງ ນອກນີ້ບັນດາສະມາຊິກສະພາແຫ່ງຊາດສະເໜີໃຫ້ສານປະຊາຊົນສູງສຸດ, ອົງການໄອຍະການສູງສຸດ ຕ້ອງເອົາໃຈໃສ່ໃນການປັບປຸງເຮັດວຽກງານການເມືອງແນວຄິດຢ່າງຊັດເຈນ ຕໍ່ກັບຜູ້ພິພາກສາຂັ້ນຕ່າງໆ ເລັ່ງປັບປຸງແກ້ໄຂ ເພື່ອເຮັດໃຫ້ລະບຽບການ ແລະ ກົດໝາຍ ເປັນຮູບປະທຳຍິ່ງຂຶ້ນ. ທ່ານ ຄຳສານ ສຸວົງ ຫົວໜ້າອົງການໄອຍະການ ປະຊາຊົນສູງສຸດ ກໍໄດ້ຂຶ້ນໃຫ້ຄວາມກະຈ່າງແຈ້ງ ຕໍ່ຄຳຊັກຖາມການປະກອບຄຳເຫັນຂອງສະມາຊິກສະພາແຫ່ງຊາດ ໃນຫຼາຍບັນຫາ ເປັນຕົ້ນບັນຫາການກັກຂັງເກີນກຳນົດ, ການປະຕິບັດຄຳຕັດສິນຂອງສານ, ການຕິດຕາມກວດກາ ຂອງອົງການສືບສວນ-ສອບສວນ ແລະ ອື່ນໆ ໂດຍສະເພາະ ບັນຫາການປິ່ນປົວຜູ້ຍິງຖືພາໃນຄ້າຍຄຸມຄັງ ທີ່ ສສຊ ຍົກຂຶ້ນມາຊັກຖາມ ໂດຍໄດ້ຮັບການຊີ້ແຈງວ່າ: ຕໍ່ກັບບັນຫາດັ່ງກ່າວ ໄດ້ແບ່ງອອກເປັນ 2 ກໍລະນີ ຄື: ກໍລະນີເຈັບປ່ວຍກະທັນຫັນ ແລະ ປົກກະຕິ ສຳລັບປ່ວຍກະທັນຫັນ ແມ່ນໜ້າທີ່ຂອງເຈົ້າໜ້າທີ່ຄ້າຍຄຸມຄັງ ຖ້າຫາກວ່າບໍ່ສາມາດປິ່ນປົວໄດ້ ແມ່ນໃຫ້ສົ່ງໄປໂຮງໝໍຂອງລັດໂດຍກົງ ຫຼື ສົ່ງໄປສະຖານທີ່ສະເພາະ ມາຮອດເດືອນກັນຍາ 2019 ມີແມ່ຍິງຖືພາຢູ່ຄ້າຍຄຸມຄັງອອກໄປປິ່ນປົວ ຈຳນວນ 211 ຄົນ. ຈາກນັ້ນ ທ່ານຮອງຫົວໜ້າກອງເລຂາກອງປະຊຸມ ກໍໄດ້ຂຶ້ນຜ່ານຮ່າງມະຕິຂອງກອງປະຊຸມ ເພື່ອໃຫ້ ສສຊ ໄດ້ລົງຄະແນນສຽງຮັບຮອງເອົາດ້ວຍຄະແນນສຽງສ່ວນຫຼາຍ.