ຄະນະຜູ້ແທນຂັ້ນສູງ ສພຊ ສຳເລັດການເຂົ້າຮ່ວມກອງປະຊຸມ ສະມັດຊາສະຫະພັນລັດຖະສະພາສາກົນ ຄັ້ງທີ 141
24/10/2019

(ສພຊ) ລະຫວ່າງວັນທີ 13-17 ຕຸລາ 2019 ຄະນະຜູ້ແທນຂັ້ນສູງຂອງສະພາແຫ່ງຊາດລາວ ນໍາໂດຍທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນ ຄັ້ງທີ 141 (The 141th Assembly of the Inter-Parliamentary Union Assembly) ທີ່ນະຄອນຫລວງເບວເກຣດ, ສ.ເຊີເບຍ. ກອງປະຊຸມຄັ້ງນີ້ ດຳເນີນໄປພາຍໃຕ້ຫົວຂໍ້: “ການສ້າງຄວາມເຂັ້ມແຂງໃຫ້ແກ່ກົດໝາຍສາກົນ: ບົດບາດ ແລະ ກົນໄກຂອງລັດຖະສະພາ ແລະ ການປະກອບສ່ວນຂອງການຮ່ວມມືໃນພາກພື້ນ (Strengthening International Law: Parliamentary Roles and Mechanisms, and the Contribution of Regional cooperation)”.  ກອງປະຊຸມດັ່ງກ່າວ ມີຄະນະຜູ້ແທນຈາກທົ່ວໂລກເຂົ້າຮ່ວມທັງໝົດ 140 ປະເທດ, ຄະນະຜູ້ແທນທີ່ນຳໂດຍລະດັບປະທານລັດຖະສະພາ 78 ທ່ານ ແລະ ຮອງປະທານລັດຖະສະພາ 60 ທ່ານ ແລະ ສະມາຊິກລັດຖະສະພາ 1.700 ກວ່າທ່ານ. ໃນນັ້ນ, ສະມາຊິກລັດຖະສະພາເພດຍິງກວມເອົາ 30% ແລະ ສະມາຊິກສະພາໜຸ່ມ ອາຍຸຕໍ່າກວ່າ 45 ປີ ກວມເອົາ 17%. ນອກນີ້, ຍັງມີຄະນະຜູ້ແທນຈາກອົງການສະຫະປະຊາຊາດ ແລະ ຕົວແທນຈາກອົງການລັດຖະສະພາຈາກພາກພື້ນຕ່າງໆຂອງໂລກເຂົ້າຮ່ວມຢ່າງຫລວງຫລາຍ.

ກອງປະຊຸມສະມັດຊາສະຫະພັນລັດຖະສະພາສາກົນ ຄັ້ງທີ 141 ໄດ້ຈັດຂຶ້ນໃນໂອກາດຄົບຮອບ 130 ປີ (1889-2019) ແຫ່ງການສ້າງຕັ້ງສະຫະພັນລັດຖະສະພາສາກົນ ເຊິ່ງຄະນະຜູ້ແທນເຂົ້າຮ່ວມກອງປະຊຸມທັງໝົດ ໄດ້ເຂົ້າຮ່ວມກັນສະເຫລີມສະຫລອງວັນສ້າງຕັ້ງດັ່ງກ່າວ ໂດຍປະທານໄອພີຢູ ໄດ້ລາຍງານຜົນສຳເລັດໂດຍຫຍໍ້ກ່ຽວກັບພາລະກິດຂອງໄອພີຢູ ໃນການສົ່ງເສີມສັນຕິພາບ, ປະຊາທິປະໄຕ, ສິດທິມະນຸດ, ຄວາມສະເໝີພາບຍິງ-ຊາຍ ແລະ ການປົກຄອງລັດດ້ວຍກົດໝາຍ.  ພ້ອມນັ້ນ ກໍໄດ້ມີການຈັດງານວາງສະແດງຮູບພາບການເຄື່ອນໄຫວ ແລະ ກິດຈະກຳທີ່ພົ້ນເດັ່ນຂອງໄອພີຢູ ກໍຄືຂອງລັດຖະສະພາສະມາຊິກໃຫ້ບຸກຄົນທົ່ວໄປໄດ້ມາຮ່ວມຊົມອີກດ້ວຍ.

       ໃນກອງປະຊຸມສະມັດຊາສະຫະພັນລັດຖະສະພາສາກົນ ຄັ້ງທີ 141, ທ່ານ ບຸນປອນ ບຸດຕະນະວົງ ໄດ້ກ່າວຄຳປາໄສຕໍ່ຫົວຂໍ້ “ການສ້າງຄວາມເຂັ້ມແຂງໃຫ້ແກ່ກົດໝາຍສາກົນ: ບົດບາດ ແລະ ກົນໄກຂອງລັດຖະສະພາ, ແລະ ການປະກອບສ່ວນຂອງການຮ່ວມມືໃນພາກພື້ນ ເຊິ່ງທ່ານໄດ້ຍົກໃຫ້ເຫັນເຖິງບົດບາດທີ່ສຳຄັນຂອງລັດຖະສະພາໃນການເສີມສ້າງ ແລະ ຄໍ້າປະກັນສັນຕິພາບ, ຄວາມໝັ້ນຄົງ ແລະ ຄວາມວັດທະນະຖາວອນຂອງພາກພື້ນ ແລະ ໂລກ ໂດຍການເຮັດໜ້າທີ່ຮັບຮອງເອົາກົດໝາຍທີ່ໃຫ້ຄວາມສະເໝີພາບກັບທຸກຄົນ ແລະ ທຸກພາກສ່ວນໃນສັງຄົມ, ສົ່ງເສີມການເຄົາລົບຕໍ່ກົດໝາຍສາກົນ ແລະ ການທູດລັດຖະສະພາ ເພື່ອເສີມສ້າງຄວາມສາມັກຄີ, ຄວາມເຂົ້າໃຈ ກໍຄືການສະໜັບສະໜູນການຮ່ວມມືສາກົນ. ທ່ານໄດ້ຍົກໃຫ້ເຫັນເຖິງພາລະບົດບາດຂອງສະພາແຫ່ງຊາດລາວ ໃນການພິຈາລະນາຮັບຮອງເອົາກົດໝາຍ ແລະ ຕົກລົງໃຫ້ສັດຕະຍາບັນແກ່ບັນດາສົນທິສັນຍາ ແລະ ສັນຍາສາກົນວ່າດ້ວຍບັນຫາຕ່າງໆ ພ້ອມທັງຊຸກຍູ້ໃຫ້ລັດຖະບານຫັນເອົາເນື້ອໃນຂອງສົນທິສັນຍາເຫລົ່ານັ້ນ ເຂົ້າໃນຂໍ້ກຳນົດກົດໝາຍພາຍໃນຂອງຕົນຢ່າງຄົບຖ້ວນ ແລະ ຮັດກຸມ. ພ້ອມນີ້, ທ່ານຍັງໄດ້ຮຽກຮ້ອງໄປຍັງສະມາຊິກສະຫະພັນລັດຖະສະພາສາກົນໃຫ້ຄວາມສຳຄັນຕໍ່ການສ້າງຄວາມເຂັ້ມແຂງໃຫ້ແກ່ກົດໝາຍສາກົນ, ຊຸກຍູ້ໃຫ້ອຳນາດລັດທຸກພາກສ່ວນຈັດຕັ້ງປະຕິບັດສິດ ແລະ ພັນທະທີ່ຊອບທໍາຂອງຕົນຕໍ່ໜ້າກົດໝາຍສາກົນ ແລະ ຢຶດຖືກົດໝາຍສາກົນ ເປັນບ່ອນອີງໃນການແກ້ໄຂຂໍ້ຂັດແຍ່ງລະຫວ່າງຊາດ ແລະ ບັນຫາສາກົນດ້ວຍສັນຕິວິທີ.

          ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກອງປະຊຸມຄະນະກຳມະການປະຈຳຕ່າງໆ ຂອງ ໄອພີຢູ ເຊັ່ນ: ກຳມາທິການປະຈໍາກ່ຽວກັບບັນຫາສັນຕິພາບ ແລະ ຄວາມໝັ້ນຄົງຂອງໂລກ, ກຳມາທິການປະຈໍາກ່ຽວກັບການພັດທະນາແບບຍືນຍົງ, ການເງິນ ແລະ ການຄ້າ, ກຳມາທິການກ່ຽວກັບບັນຫາປະຊາທິປະໄຕ ແລະ ສິດທິມະນຸດ, ກໍາມາທິການປະຈໍາ ກ່ຽວກັບກິດຈະການຂອງອົງການສະຫະປະຊາຊາດ, ເວທີປຶກສາຫາລືຂອງສະມາຊິກລັດຖະສະພາເພດຍິງ, ເວທີປຶກສາຫາລືຂອງສະມາຊິກລັດຖະສະພາໜຸ່ມ, ກອງປະຊຸມຂອງກຸ່ມລັດຖະສະພາຈາກບັນດາປະເທດອາຊຽນບວກ 3 ແລະ ກອງປະຊຸມກຸ່ມລັດຖະສະພາພາກພື້ນອາຊີ ແລະ ປາຊີຟິກ. ພ້ອມດຽວກັນນີ້, ຄະນະຜູ້ແທນລາວ ຍັງໄດ້ຖືໂອກາດພົບປະເຮັດວຽກແບບສອງຝ່າຍກັບຫົວໜ້າຄະນະຜູ້ແທນຫວຽດນາມ, ຮອງປະທານສະພາແຫ່ງຊາດ ສ.ເຊີເບຍ, ຄະນະຜູ້ແທນມຽນມາ ແລະ ອື່ນໆ ເພື່ອປຶກສາຫາລືກ່ຽວກັບບັນຫາຕ່າງໆທີ່ສອງຝ່າຍມີຄວາມສົນໃຈ.