ປະທານ ສພຊ ພົບປະຜູ້ມີສິດ ເລືອກຕັ້ງຢູ່ ແຂວງຫລວງພະບາງ
22/10/2019

(ສພຊ) ລະຫວ່າງວັນທີ 2-3 ຕຸລາ 2019 ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 6 ແຂວງຫລວງພະບາງ ໄດ້ພົບປະ ປະຊາຊົນ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ຢູ່ 2 ເມືອງ ຄື:ເມືອງໂພນໄຊ ແລະ ເມືອງພູຄູນ ແຂວງຫລວງພະບາງ;​ ເຂົ້າຮ່ວມມີທ່ານ ສີຈັນ ລັດສະໝີ ກໍາມະການພັກແຂວງ, ເຈົ້າເມືອງໆໂພນໄຊ ແລະ ທ່ານ ວຽງທອງ ຫັດສະຈັນ ກໍາມະການພັກແຂວງ, ເຈົ້າເມືອງໆພູຄູນ, ມີຮອງປະທານສະພາປະຊາຊົນແຂວງຫລວງພະບາງ, ພະນັກງານ-ລັດຖະກອນ ເລຂາໜ່ວຍພັກບ້ານ-ນາຍບ້ານ ຕະຫລອດຮອດພໍ່ແມ່ປະຊາຊົນເຂົ້າຮ່ວມຮັບຟັງຢ່າງພ້ອມພຽງ.

ພາຍຫລັງໄດ້ຮັບຟັງການລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງໂພນໄຊ ແລະ ເມືອງພູຄູນ; ທ່ານປະທານສະພາແຫ່ງຊາດ ໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ເຊິ່ງໄດ້ມີບັນດາເນື້ອໃນທີ່ສໍາຄັນດັ່ງນີ້: ມະ​ຕິ​​ ວ່າ​ດ້ວຍ​ການ​ຮັບ​ຮອງ​ບາງມາດຕະການເພີ່ມເຕີມ ເພື່ອສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ ແລະ ການດັດແກ້ແຜນງົບປະມານແຫ່ງລັດ 6 ເດືອນທ້າຍປີ 2019; ມະ​ຕິ​​ ວ່າດ້ວຍການຮັບຮອງເອົາການແຕ່ງຕັ້ງ ລັດຖະມົນຕີປະຈໍາສໍານັກງານນາຍົກລັດຖະມົນຕີ; ມະ​ຕິ​​​ ວ່າດ້ວຍການຮັບຮອງເອົາການເລືອກຕັ້ງ ປະທານສານປະຊາຊົນສູງສຸດ; ມະ​ຕິ​​​ ວ່າດ້ວຍການຮັບຮອງເອົາບົດລາຍງານຂອງລັດຖະບານ ຊີ້ແຈງຕໍ່ຄໍາຊັກຖາມຂອງສະພາແຫ່ງຊາດ ກ່ຽວກັບການຄຸ້ມຄອງການອອກໃບຕາດິນ, ການອອກໃບຕາດິນຊໍ້າຊອນ ໃນໄລຍະຜ່ານມາ ແລະ ມາດຕະການແກ້ໄຂໃນຕໍ່ໜ້າ; ມະ​ຕິ​​ ວ່າດ້ວຍການຮັບຮອງເອົາບົດລາຍງານຂອງລັດຖະບານ ຊີ້ແຈງຕໍ່ກັບຄໍາຊັກຖາມຂອງສະພາແຫ່ງຊາດ ກ່ຽວກັບການຟື້ນຟູປ່າ ແລະ ປູກໄມ້ ຕາມມະຕິຂອງສະພາແຫ່ງຊາດ; ມະ​ຕິ​​​ ວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຕິດຕາມກວດກາ ການຈັດຕັ້ງປະຕິບັດກົດໝາຍ ຂອງອົງການສືບສວນ-ສອບສວນ; ມະ​ຕິ​​ ວ່າດ້ວຍການພັດທະນາຊັບພະຍາກອນມະນຸດ ຕາມຂະແໜງການບຸລິມະສິດ ໃນສາຂາວິຊາການກະສິກຳ, ຄູ ແລະ ພະຍາບານ; ກອງປະຊຸມຍັງໄດ້ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 10 ສະບັບ, ໃນນັ້ນ ກົດໝາຍສ້າງໃໝ່ 5 ສະບັບຄື: ກົດໝາຍວ່າດ້ວຍອາກອນລາຍໄດ້, ກົດໝາຍວ່າດ້ວຍອາກອນຊົມໃຊ້, ກົດໝາຍວ່າດ້ວຍການຕອບໂຕ້ການທຸ້ມຕະຫລາດ ແລະ ການຊ່ວຍໜູນ, ກົດໝາຍວ່າດ້ວຍການຄຸ້ມຄອງໄພພິບັດ ແລະ ກົດໝາຍວ່າດ້ວຍເອກະສານ; ປັບປຸງກົດໝາຍ 5 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍຄ່າທໍານຽມສານ ແລະ ກົດໝາຍວ່າດ້ວຍອາຊີວະສຶກສາ. 

ໂອກາດທີ່ທ່ານ ປະທານສະພາແຫ່ງຊາດ ລົງມາເຜີຍແຜ່ໃນຄັ້ງນີ້; ທ່ານຍັງໄດ້ຢ້ຽມຢາມ ສູນບໍລິການເຕັກນິກດ້ານກະສິກໍາ, ໂຮງໜໍນ້ອຍ, ໂຮງຮຽນ ຢູ່ເມືອງໂພນໄຊ ແລະ ລົງເພື່ອຕິດຕາມຄວາມຄືບໜ້າ ໂຄງການບຸກເບີກສະຖານທີ່ຈັດສັນທີ່ຢູ່ອາໄສໃຫ້ແກ່ຄອບຄົວປະຊາຊົນ ເມືອງພູຄູນ ທີ່ຖືກຜົນກະທົບຈາກໄພພິບັດທຳມະຊາດ ປີ 2018 ເຊິ່ງໂຄງການດັ່ງກ່າວໄດ້ເລີ່ມຈັດຕັ້ງປະຕິບັດຕັ້ງແຕ່ເດືອນມີຖຸນາເປັນຕົ້ນມາ ມີເນື້ອທີ່ທັງໝົດ 54.960 ຕາແມັດ ມູນຄ່າ 3 ຕື້ 600 ລ້ານກີບ ເຊິ່ງເປັນທຶນຂອງລັດຖະບານ ໂດຍແມ່ນ ບໍລິສັດ ລີຊື້ຄຳມວນ ກໍ່ສ້າງຈຳກັດ ເປັນຜູ້ຮັບເໝົາກໍ່ສ້າງ, ມາເຖິງປັດຈຸບັນ ການບຸກເບີກສໍາເລັດແລ້ວ 60%. ຈາກນັ້ນ, ຍັງໄດ້ລົງຢ້ຽມຊົມສວນຜັກກະລໍາປີຂອງປະຊາຊົນ ບ້ານລ້ອງໝ້ຽງ ແລະ ສວນຈໍາໜ່າຍເບ້ຍສະຕໍເບີຣີຂອງປະຊາຊົນ ບ້ານພູສູງ ເຊິ່ງເປັນພືດເສດຖະກິດ ທີ່ສາມາດສ້າງລາຍຮັບທີ່ດີໃຫ້ແກ່ປະຊາຊົນເມືອງພູຄູນ.