ປະທານ ສພຊ ຕ້ອນຮັບຮອງປະທານກຳມາທິການສື່ມວນຊົນ ແລະ ການສື່ສານ ລຸກຊຳບວກ
16/09/2019

          (ສພຊ) ຕອນເຊົ້າວັນທີ 11 ກັນຍາ 2019, ທີ່ສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ Lydia Mutsch ຮອງປະທານກໍາມາທິການສື່ວນຊົນ ແລະ ການສື່ສານ ແຫ່ງຣາຊະອານາຈັກລຸກຊໍາບວກ ພ້ອມດ້ວຍຄະນະ ເນື່ອງໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປລາວ.

          ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ນາງ  Lydia Mutsch ທັງຕີລາຄາສູງຕໍ່ການເດີນທາງມາຢ້ຽມຢາມເຮັດວຽກຢູ່ ສປປລາວ ໃນຄັ້ງນີ້ ເປັນການຢືນຢັນສືບຕໍ່ການຮ່ວມມືໃຫ້ມີປະສິດທິຜົນ; ພ້ອມທັງໄດ້ໃຫ້ຮູ້ກ່ຽວກັບສິດ, ໜ້າທີ່ ແລະ ພາລະບົດບາດຂອງສະພາແຫ່ງຊາດ ສປປລາວ ສິດ ແລະ ໜ້າທີ່ຂອງຄະນະປະຈໍາ, ການປະຕິບັດສິດສະເໝີພາບຍິງ-ຊາຍຂອງ ສປປລາວ, ການດໍາເນີນກອງປະຊຸມສະໄໝສາມັນຂອງສະພາແຫ່ງຊາດຜ່ານມາ, ສະພາບການພັດທະນາເສດຖະກິດ-ສັງຄົມຂອງລາວ ແລະ ບັນຫາອື່ນໆ ທີ່ຮອງປະທານກໍາມາທິການສື່ມວນຊົນ ແລະ ການສື່ສານ ພ້ອມດ້ວຍຄະນະ ໃຫ້ຄວາມສົນໃຈ.

ທ່ານ ນາງ Lydia Mutsch ກໍໄດ້ກ່າວສະແດງຄວາມຂອບໃຈຕໍ່ສະຫາຍ ນາງ ປານີ ຢາທໍ່ຕູ້ ທີ່ໄດ້ເສຍສະຫລະເວລາອັນມີຄຸນຄ່າໃຫ້ການຕ້ອນຮັບອັນອົບອຸ່ນ ເຊິ່ງການມາຢ້ຽມຢາມ ສປປລາວ ໃນຄັ້ງນີ້ ກໍເພື່ອສືບຕໍ່ສາຍພົວພັນການຮ່ວມມືຂອງສອງປະເທດໃຫ້ມີປະສິດທິຜົນເພີ່ມຂຶ້ນ ແລະ ຍັງໄດ້ລາຍງານກ່ຽວກັບສະພາບການໂດຍຫຍໍ້ຂອງຣາຊະອະນາຈັກລຸກຊໍາບວກ ໃຫ້ຮັບຮູ້ ແລະ ຈະສືບຕໍ່ຮ່ວມມືລະຫວ່າງສອງປະເທດໃຫ້ດີຂຶ້ນເລື້ອຍໆ.