ປະທານ ສພຊ ອວຍພອນວັນຊາດ ຫວຽດນາມ
16/09/2019

(ສພຊ) ວັນ​ທີ  2 ກັນຍາ​ຜ່ານ​ມາ, ທີ່​ສະພາ​ແຫ່ງ​ຊາດ ສະຫາຍ ​ນາງ ປານີ ຢາ​ທໍ່​ຕູ້​ ກຳມະການ​ກົມ​ການ​ເມືອງ​ສູ​ນກາງ​ພັກ, ປະທານ​ສະພາ​ແຫ່ງ​ຊາດ ພ້ອມ​ດ້ວຍສະຫາຍ​ ສົມ​ພັນ ​ແພງ​ຄຳ​ມີ  ກຳມະ ການ​ສູນ​ກາງ​ພັກ ຮອງ​ປະທານ​ສະພາ​ແຫ່ງ​ຊາດ, ສະຫາຍ ນາງ ສວນ​ສະຫວັນ ວິ​ຍະ​ເກດ ກຳມະການ​ສຳຮອງ​ສູນ​ກາງ​ພັກ ​ເລຂາທິການ​ສະພາ​ແຫ່ງ​ຊາດ ພ້ອມ​ດ້ວຍຄະນະ​ ​ໄດ້​ເຂົ້າ​ອວຍພອນສະຫາຍ ຫງວຽນ ກວັກ ຢຸງ ຜູ້​ບັນຊາ​ການ​ແມ່ທັບ​ນ້ອຍ 11 ພ້ອມດ້ວຍຄະນະ ​ທີ່​ມາ​ປະຕິບັດ​ໜ້າ​ທີ່​ກໍ່ສ້າງ​ຫໍ​ສະພາ​ແຫ່ງ​ຊາດ​ຫລັງ​ໃໝ່ ເນື່ອງ​ໃນ​ວັນຊາດ​ຫວຽດນາມ​ ຄົບຮອບ 74 ປີ.

        ​ໃນ​ພິທີ, ສະຫາຍ​ນາງ ປານີ ຢາ​ທໍ່​ຕູ້ ​ໄດ້​ສະ​ແດງ​ຄວາມ​ຊົມ​ເຊີຍຕໍ່​ຜົນງານ​ຕະຫລອດ​ໄລຍະ 74 ປີຜ່ານ​ມາ ພາຍ​ໃຕ້ການ​ນຳພາ​ຂອງ​ພັກ​ກອມ​ມູນິດ​ຫວຽດນາມ ທີ່​ສາມາດ​ຍາດ​ໄດ້ຜົນ​ສຳ​ເລັດ​ອັນ​ຍິ່ງ​ໃຫຍ່​ໃນ​ພາ​ລະ​ກິດ​ປົກ​ປັກ​ຮັກສາ ​ແລະ ສ້າງ​ສາ​ປະ​ເທດ​ຊາດ ​ແລະ ຕີ​ລາຄາ​ສູງ​ຕໍ່​ການ​ປະຕິບັດ​ງານ​ຂອງ​ແມ່ທັບນ້ອຍ 11 ຕະຫລອດ​ໄລຍະການ​ກໍ່ສ້າງ​ຫໍ​ສະພາ​ແຫ່ງ​ຊາດລາວ​ຫລັງ​ໃໝ່ ​ໂດຍ​ສະ​ເພາະ​ແມ່ທັບ​ນ້ອຍ 11 ທີ່​ໄດ້​ມີ​ຄວາມ​ພະຍາຍາມ​ສຸມ​ເຫື່ອ​ແຮງ​ສະຕິ​ປັນຍາ ປະຕິບັດ​ໜ້າ​ທີ່​ວຽກງານ​ເຂົ້າ​ໃນ​ໜ້າທີ່ການ​ກໍ່ສ້າງ​ຫໍ​ສະພາ​ແຫ່ງ​ຊາດ​ລາວ​ຫລັງ​ໃໝ່ ​ເຊິ່ງ​ມາ​ຮອດ​ປັດຈຸບັນ ​ເຫັນ​ວ່າ​ໂຄງການ​ໄດ້​ສຳ​ເລັດ​ເປັນ​ສ່ວນ​ໃຫຍ່ ​ແລະ ​ເຊື່ອ​ໝັ້ນ​ວ່າ​ດ້ວຍ​ຄວາມ​ເອົາ​ໃຈ​ໃສ່ ​ແລະ ຮ່ວມ​ມື​ເຊິ່ງກັນ ​ແລະ ກັນ ລະຫວ່າງ​ສະຫາຍ​ຫວຽດນາມ ​ແລະ ລາວ​ ຈະ​ພ້ອມ​ກັນ​ຊຸກຍູ້ພາກສ່ວນ​ທີ່​ກ່ຽວຂ້ອງ​ຈັດ​ຕັ້ງ​ປະຕິບັດ, ອຳນວຍ​ຄວາມ​ສະດວກ​ໃຫ້​ແກ່​ການ​ກໍ່ສ້າງ​ຫໍ​ສະພາ​ແຫ່ງ​ຊາດ​ຫລັງ​ໃໝ່; ພ້ອມ​ທັງ​ອວຍພອນ​ໃຫ້​ສາຍ​ພົວພັນ​ມິດຕະ ພາບອັນ​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ລະຫວ່າງ​ສອງ​ພັກ-ສອງ​ລັດ ​ແລະ ປະຊາຊົນ​ສອງ​ຊາດລາວ-ຫວຽດນາມ ​ແລະ ຫວຽດນາມ-ລາວ ຈົ່ງ​ໝັ້ນຄົງ​ທະ​ນົງ​ແກ່ນ ​ແລະ ຈະ​ເລີ​ນງອກ​ງາມ​ຍິ່ງໆຂຶ້ນ​ຕະຫລອດ​ໄປ.

        ​ໂອກາດ​ດຽວກັນ, ສະຫາຍ ຫງວຽນ ກວັກ ຢຸງ ​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ຄວາມ​ເອົາ​ໃຈ​ໃສ່​ຂອງພັກ-ລັດຖະບານ ກໍ​ຄື​ສະພາ​ແຫ່ງ​ຊາດ​ລາວ ທີ່ມີ​ຕໍ່​​ແມ່ທັບ​ນ້ອຍ 11 ເຊິ່ງກຳລັງ​ປະຕິບັດ​ໜ້າ​ທີ່ຢູ່​ໃນ​ ສປປລາວ ​ແລະ ​ໄດ້​ກ່າວ​ວ່າ: ຈະ​ປະຕິບັດ​ໜ້າທີ່​ໃຫ້​ດີຕໍ່​ກັບ​ວຽກງານ​ທີ່​ໄດ້​ຮັບ​ມອບໝາຍ ​ໂດຍ​ໄດ້​ໃຫ້​ຄຳ​ໝັ້ນ​ສັນຍາ​ວ່າ ​ຈະ​ປະຕິບັດວຽກງານ​ໃຫ້​ໄດ້​ຮັບ​ຄຸນ​ນະພາ​ບ, ການຈັດຕັ້ງປະຕິບັດ​​ໃຫ້​ໄປ​ຕາມ​ແຜນ​, ຮັບປະກັນຄວາມ​ປອດ​ໄພ​ຂອງ​ການ​ກໍ່ສ້າງ, ຮັກສາ​ສິ່ງ​ແວດ​ລ້ອມ, ການ​ປະຊາ​ສຳພັນ ​ແລະ ​​ສະຫວັດດີ​ການແຮງ​ງານ​ ຈະ​ເປັນ​ໄປ​ຕາມ​ແຜນການ​ທີ່​ກຳນົດ​ໄວ້.