ຄະນະຜູ້ແທ່ນຂັ້ນສູງ ສພຊ ຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການ
02/09/2019

    (ສພຊ) ເພື່ອຈັດຕັ້ງຜັນຂະຫຍາຍບົດບັນທຶກຊ່ວຍຈໍາ ວ່າດ້ວຍການຮ່ວມມື ລະຫວ່າງສະພາແຫ່ງຊາດ (ສພຊ) ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ. ຫວຽດນາມ ສະບັບລົງວັນທີ 6 ມີນາ 2017; ຄະນະຜູ້ແທນຂັ້ນສູງຂອງ ສພຊ ນຳໂດຍ ສະ​ຫາຍ ບຸນປອນ ບຸດຕະນະວົງ ກຳມະການສູນກາງພັກ, ຮອງປະທານ ສພຊ ແຫ່ງ ສປປລາວ ໄດ້ຢ້ຽມຢາມສັນຖະວະໄມຕີ  ສສ.ຫວຽດນາມ ຢ່າງເປັນທາງການ ໃນລະຫວ່າງວັນທີ 19-24 ສິງຫາ 2019 ໂດຍການຕ້ອນຮັບຂອງສະຫາຍ ດິງກົງສີ ກໍາມະການປະຈໍາກໍາມາທິການຕ່າງປະເທດສະພາແຫ່ງຊາດ ແຫ່ງ ສສ.ຫວຽດນາມ ທີ່ສະໜາມບິນສາກົນໂນ້ຍບ່າຍ ສສ.ຫວຽດນາມ.

ຈຸດປະສົງຂອງການຢ້ຽມຢາມຄັ້ງນີ້ ກໍເພື່ອເປັນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ເຂົ້າສູ່ລວງເລິກ ແລະ ເກີດດອກອອກຜົນຍິ່ງໆຂຶ້ນໄປ ທັງເປັນການຕີລາຄາຄືນໝາກຜົນຂອງການພົວພັນ ແລະ ຮ່ວມມືລະຫວ່າງ ສພຊ ລາວ ແລະ ສະພາແຫ່ງຊາດຫວຽດນາມ ຕາມເນື້ອໃນຈິດໃຈຂອງບົດບັນທຶກການຮ່ວມມື ລະຫວ່າງສອງສະພາແຫ່ງຊາດ ແລະ ການປຶກສາຫາລືທິດການພົວພັນ ແລະ ຮ່ວມມືໃນຕໍ່ໜ້າ; ພ້ອມດຽວກັນນັ້ນ ຍັງເປັນການແລກປ່ຽນບົດຮຽນການຍົກສູງຄຸນນະພາບ ການຈັດ ຕັ້ງປະຕິບັດພາລະບົດບາດຂອງສະພາແຫ່ງຊາດ ໃນຂົງເຂດນິຕິບັນຍັດ, ການຕົກລົງບັນຫາສຳຄັນຂອງຊາດ ແລະ ການຕິດຕາມກວດກາ; ແລກປ່ຽນບົດຮຽນ ແລະ ບັນດາທັດສະນະທີ່ສອງຝ່າຍມີຄວາມສົນໃຈ.

ວັນທີ 19 ສິງຫາ ຜ່ານມາ ສະຫາຍ ບຸນປອນ ບຸດຕະນະວົງ ພ້ອມດ້ວຍຄະນະ ໄດ້ເຂົ້າພົບປະເຮັດວຽກສອງຝ່າຍກັບສະຫາຍ ຟຸ່ງ ກວັກ ຮ້ຽນ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາຫວຽດນາມ-ລາວ ທີ່ຫໍສະພາແຫ່ງຊາດ ແຫ່ງ ສສ.ຫວຽດນາມ ນະຄອນຫລວງຮ່າໂນ້ຍ ສສ.ຫວຽດນາມ;  ທັງສອງຝ່າຍໄດ້ຕົກລົງເຫັນດີຮ່ວມກັນ ຄື: ສືບຕໍ່ຮ່ວມມືແລກປ່ຽນຄະນະຜູ້ແທນລະດັບສູງ, ລະດັບກໍາມາທິການ, ລະດັບວິຊາການ ຈາກສູນກາງ ແລະ ທ້ອງຖິ່ນ ແລະ ຈັດສໍາມະນາ ເພື່ອແລກປ່ຽນບົດຮຽນໃນຫົວຂໍ້ຕ່າງໆ ກ່ຽວກັບການຍົກສູງປະສິດທິພາບການຈັດຕັ້ງປະຕິບັດພາລະບົດບາດ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕາມເນື້ອໃນຈິດໃຈຂອງບົດບັນທຶກຄວາມເຂົ້າໃຈວ່າດ້ວຍການຮ່ວມມື ລະຫວ່າງສອງສະພາແຫ່ງຊາດ; ສືບຕໍ່ຈັດຕັ້ງປະຕິບັດທິດທາງຮ່ວມມືສອງຝ່າຍທີ່ສອງປະທານສະພາແຫ່ງຊາດ ລາວ-ຫວຽດນາມ ເປັນເອກະພາບກັນ ໃນເດືອນມີນາ 2019 ຜ່ານມາ; ສືບຕໍ່ຕິດຕັ້ງການປະຕິບັດການຕິດຕາມກວດກາຮ່ວມລະຫວ່າງສອງສະພາແຫ່ງຊາດ ເພື່ອຊຸກຍູ້ການຈັດຕັ້ງປະຕິບັດຂໍ້ຕົກລົງ ແລະ ສັນຍາທີ່ສອງລັດຖະບານໄດ້ຕົກລົງກັນໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ ເພື່ອຮັດແໜ້ນການພົວພັນຮ່ວມມືດ້ານການເມືອງ, ເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ ລະຫວ່າງສອງປະເທດ ແລະ ສືບຕໍ່ແລກປ່ຽນທັດສະນະ ແລະ ສະໜັບສະໜູນເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ສະພາແຫ່ງຊາດລາວສະໜັບສະໜູນຢ່າງເຕັມສ່ວນ ຕໍ່ສະພາແຫ່ງຊາດຫວຽດນາມ ໃນການເປັນເຈົ້າພາບໄອປາ ໃນປີ 2020 ນອກນີ້ ທັງສອງຝ່າຍຍັງໄດ້ຖອດຖອນ, ແລກປ່ຽນບົດຮຽນບາງບັນຫາທີ່ສອງຝ່າຍໃຫ້ຄວາມສົນໃຈ.

ສະຫາຍຮອງປະທານສະພາແຫ່ງຊາດ ຍັງໄດ້ຢ້ຽມຂໍ່ານັບສະຫາຍ ນາງ ຫງວຽນ ທິ ກີມ ເງິນ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ແຫ່ງ ສສ.ຫວຽດນາມ; ຢ້ຽມຢາມພົບປະກັບສະຫາຍຮອງນາຍົກລັດຖະມົນຕີ ແຫ່ງ ສສ.ຫວຽດນາມ ແລະ ພົບປະເຮັດວຽກກັບການນໍາຄະນະກໍາມະການ, ສະພາປະຊາຊົນນະຄອນດາໜັງ ຢ້ຽມຢາມບາງພື້ນຖານເສດຖະກິດ ແລະ ວັດທະນະທຳ, ການພັດທະນາຕົວເມືອງ, ການພັດທະນາເຂດທ່ອງທ່ຽວ ຢູ່ນະຄອນດາໜັງ.

(ສອນສັກ ວັນວິໄຊ)