ສະພາແຫ່ງຊາດ ເຊື່ອມຊຶມມະຕິ 8 ສະໄໝທີ X ຂອງພັກ
09/08/2019

(ສພຊ) ​ເພື່ອ​ເປັນ​ການ​ຜັນ​ຂະຫຍາຍ​ເນື້ອ​​ໃນ​ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 8 ສະ​ໄໝທີ x ​ໃຫ້​ມີ​ຄວາມໝາຍຄວາມ​ສຳຄັນ ​ແລະ ມີ​ເນື້ອ​ໃນ​ເລິກ​ເຊິ່ງ ​ໄດ້​ຮັບ​ການ​ເຜີຍ​ແຜ່​ຢ່າງ​ກວ້າງ​ຂວາງ​ທົ່ວ​ເຖິງທຸກ​ເປົ້າໝາຍ; ໃນວັນ​ທີ 5 ກໍລະກົດ 2019​ ທີ່​ຫ້ອງ​ປະຊຸມ​ຄະນະ​ເລຂາທິການ​ສະພາ​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ ​ໄດ້​ມີ​ກອງ​ປະຊຸມ​ເຊື່ອມ​ຊຶມ​ມະຕິ​ກອງ​ປະຊຸມຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 8 ສະ​ໄໝທີ X ຂອງສະພາ​ແຫ່ງ​ຊາດ ​ໂດຍ​ການ​ເປັນ​ປະທານ​ຂອງສະ​ຫາຍ ແສງ​ນວນ ​ໄຊ​ຍະ​ລາດ ເລຂາທິການສູນກາງພັກ,  ເລຂາຄະນະບໍລິຫານງານພັກສະພາ ແຫ່ງຊາດ, ຮອງປະ​ທານສະພາ​ແຫ່ງ​ຊາດ; ​ເຂົ້າ​ຮ່ວມມີ​ສະຫາຍ​ ນາງ ສີ​ໃສ ລື​ເດດ​ມູນ​ສອນ ກໍາ​ມະ​ການ​ສູນ​ກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງ​ປະທານ​ສະພາ​ແຫ່ງ​ຊາດ; ມີບັນດາປະ ທານ-ຮອງ​ປະທານ​ກໍາມາ​ທິການ; ຫົວໜ້າ​-ຮອງ​ຫົວໜ້າກົມ, ຫົວໜ້າ​-ຮອງ​ຫົວໜ້າ​ພະ​ແນ​ກ ​ແລະ ສະ ມາຊິກ​ພັກ​ສົມບູນ-ສໍາຮອງ​ເຂົ້າ​ຮ່ວມ​ຢ່າງພ້ອມພຽງ.

        ທັງນີ້, ​ເພື່ອ​ເຮັດ​ໃຫ້​ສະມາຊິກ​ພັກ, ພະນັກງານ​ຫລັ​ກແຫ​ລ່ງຂອງ​ສະພາ​ແຫ່ງ​ຊາດ​ ໄດ້​ຮັບ​ຮູ້, ​ເຂົ້າ​ໃຈ​ແຈ້ງ ​ແລະ ​ເຫັນ​ໄດ້​ສະພາບ​ການ​ຂະຫຍາຍຕົວທາງດ້ານ​ເສດຖະກິດ-​ສັງຄົມ​ໃນ​ໄລຍະ​ຜ່ານ​ມາ; ​ເພື່ອ​ໃຫ້​ກໍາໄດ້​ບັນຫາ​ຂໍ້ຫຍຸ້ງຍາກ​ທາງ​ດ້ານ​ເສດຖະກິດ​ທີ່​ພວກເຮົາ​ປະ​ເຊີນ​ໃນ​ໄລຍະ​ຜ່ານ​ມາ ​ແລະ ວິທີ​​ການ​ແກ້​ໄຂ​ບັນຫາ​ຕ່າງໆ, ການຈັດ​ຕັ້ງ​ປະຕິບັດ​ວຽກງານ​ໃນ​ຕໍ່ໜ້າ ​ເພື່ອ​ຮັບປະກັນ​ໃນການ​ພັດທະນາ​ເສດຖະກິດ​-ສັງຄົມຂອງ​ຊາດ ​ໄດ້​ຮັບ​ການ​ປັບປຸງ​ແກ້​ໄຂ ​ແລະ ຂະ​ຫຍາ​ຍຕົວ​ເທື່ອ​ລະ​ກ້າວ ທັງ​ເປັນ​ການ​ຮັບປະກັນ​ເຮັດ​ໃຫ້ການ​ຈັດ​ຕັ້ງ​ແຜນການ​ເຊື່ອມ​ຊຶມ​ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 8 ສະ​ໄໝທີ X ​ໃຫ້ບັນລຸ​ຕາມ​ຄາດໝາຍ ​ແລະ ຈຸດປະສົງ​ທີ່​ວາງ​ໄວ້.

        ​ໃນ​ກອງ​ປະຊຸມ​, ຜູ້​ເຂົ້າ​ຮ່ວມ​ໄດ້ຮັບ​ຟັງມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 8 ສະ​ໄໝທີ X ຈາກ​ສະຫາຍ ນາງ ສີ​ໃສ ລື​ເດດ​ມູນ​ສອນ; ພ້ອ​ມນັ້ນ​, ຍັງໄດ້​ຮັບ​ຟັງ​ການ​ໂອ້​ລົມ​ຈາກ​ສະຫາຍ ແສງ​ນວນ​ ໄຊ​ຍະ​ລາດ ​ເຊິ່ງສະຫາຍ​ໄດ້ມີຄໍາເຫັນຕໍ່ກອງປະຊຸມ​ວ່າ: ​ເພື່ອ​ສືບ​ຕໍ່​ຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 8 ສະ​ໄໝ​ທີ X ​ເຂົ້າ​ສູ່​ວຽກງານ​ຕົວ​ຈິງ ກໍ​ຄື​ຕໍ່​ການ​ປະຕິບັດ​ໜ້າ​ທີ່​ການ​ເມືອງ​ລວມຂອງ​ສະພາ​ແຫ່ງ​ຊາດ ຊຸດ​ທີ VIII ​ໃຫ້​ເປັນ​ຮູບ​ປະ​ທໍາ.

(ນາງ​ ອາ​ລິນ ສຸ​ພິມ​ມະ​ປະດິດ)