ຫລາຍບົດລາຍງານຂອງລັດຖະບານ ເຂົ້າຜ່ານກອງປະຊຸມສະໄໝສາມັນ
20/10/2017

(ສພຊ) ອີງ​ຕາມ​ວາລະດຳ​ເນີນ​ກອງ​ປະຊຸມ​ສະ​ໄໝສາມັນເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ VIII, ​ລະຫວ່າງ​ວັນ​ທີ 17-18 ຕຸລາ​ຜ່ານ​ມາ, ​ທີ່​ຫ້ອງ​ປະຊຸມ​ສະພາ​ແຫ່ງ​ຊາດ​ຫລັກ 6 ​ໂດຍ​ການ​ເປັນ​ປະທານຂອງ​ທ່ານ ​ນາງ ປານີ ຢາ​ທໍ່ຕູ້ ປະທານ​ສະພາ​ແຫ່ງ​ຊາດ, ​​ເຂົ້າ​ຮ່ວມມີ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ, ບັນດາ​ທ່ານ​ລັດຖະມົນຕີ ​ແລະ ​ສະມາຊິກ​ສະພາ​​ແຫ່ງ​ຊາດ (ສສຊ) ຊຸດ​ທີ VIII ປະຈຳ​ 18 ເຂດ​ເລືອກ​ຕັ້ງ​ໃນ​ທົ່ວ​ປະ​ເທດເຂົ້າ​ຮ່ວມ.

        ​ຕາມ​ວາລະ​ຂອງ​ກອງ​ປະຊຸມ, ​ທ່ານ​ປະທານ​ສະພາ​ແຫ່ງ​ຊາດ ​ໃນ​ນາມ​ປະທານ​ກອງ​ປະຊຸມ​ໄດ້​ມີ​ຄຳ​ຄິດ​ຄຳ​ເຫັນ​ເຈາະ​ຈິ້ມ​ ​ແລະ ເນັ້ນໜັກ​ແຕ່​ລະ​ບັນຫາ​ຢ່າງ​ມີ​ຈຸດ​ສຸມ​ໃນ​ຂົງ​ເຂດ​ຕ່າງໆ ​ເພື່ອ​ເປັນ​ແນວທາງ​ໃຫ້​ແກ່​ການ​ປະກອບ​ຄຳ​ຄິດ​ຄຳ​ເຫັນ​ຂອງ​ບັນດາ ສສຊ ຍົກ​ໃຫ້​ເຫັນ​ດ້ານ​ຕັ້ງໜ້າ, ຜົນງານ​ທີ່​ເຮັດ​ໄດ້ ​ແລະ ​ບັນຫາ​ຫຍໍ້​ທໍ້​ທ້າ​ທາຍ​ຕ່າງໆທີ່​ເປັນ​ອຸປະສັກ​ຕໍ່ກັບ​ການ​ພັດທະນາ​ປະ​ເທດ​ຊາດ; ຫລັງ​ຈາກ​ນັ້ນ ບັນ​ດາ ສສຊ  ​​ໄດ້​ສຸມ​ໃສ່​ປະກອບ​ຄຳ​ຄິດ​ຄຳ​ເຫັນ​ຕໍ່ບົດ​ລາຍ​ງານຂອງ​ລັດຖະບານ​ກ່ຽວກັບ​ການຈັດ​ຕັ້ງ​ປະຕິ​ບັດ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ, ​ແຜນ​ເງິນຕາປະຈຳ​ປີ 2017 ​ແລະ ​ແຜນການ​ປະຈຳ​ປີ 2018; ​ແລະ ຊັກ​ຖາມ​ຂໍ້ສົງ​​ໄສ​ບັນຫາ​ຕ່າງໆຕໍ່ກະຊວງ ​ແລະ ອົງການ​ທີ່​ກ່ຽວຂ້ອງ​ທີ່​ເກີດ​ຂຶ້ນຢູ່​ສູນ​ກາງ ​ແລະ ທ້ອງ​ຖິ່ນ ​ໂດຍ​ສະ​ເພາະ​ກໍ​ແມ່ນ​ບັນຫາ​ທີ່​ພໍ່​ແມ່​ປະຊາຊົນ​ບັນດາ​ເຜົ່າ​ສະ​ເໜີຜ່ານ​ບັນດາ ສສຊ ​ແລະ ສສຂ ມາ​ເຖິງ​ລັດຖະບານ ​ແລະ ຂະ​ແໜງການ​ທີ່​ກ່ຽວຂ້ອງ ​ເພື່ອ​ຊ່ວຍ​ແກ້​ໄຂ ​ແລະ ຫາ​ທາງ​ອອກ​ທີ່​ເໝາະສົມ​ດ້ວຍ​ບັນ​ຍາ​ກາດ​ທີ່​ຟົດຟື້ນ ​ແລະ ມີ​ຄວາມ​ຮັບຜິດຊອບ​ສູງ​ຂອງບັນດາ ສສຊ, ​ບັນຫາ​ທີ່​ ສສຊ ມີ​ຄວາມ​ສົນ​ໃຈ ​ແລະ ຍົກ​ຂຶ້ນມາສະ​ເໜີ, ແລກປ່ຽນ ຫລາຍ​ທີ່​ສຸດ​ແມ່ນ​ຂົງ​ເຂດ​ເສດຖະກິດ, ການ​ເງິນ, ​ເງິນຕາ, ການຈັດ​ເກັບລາຍ​ຮັບ-ລາຍ​ຈ່າຍ ​ແລະ​ ການ​ນຳ​ໃຊ້​ງົບປະມານ, ​ການ​ຝ່າຝືນ ​ແລະ​ ລະ​ເມີດ​ລະບຽບການ​ເງິນ-​ເງິນຕາ​ມີ​ລັກສະນະ​ເພີ່ມ​ຂຶ້ນ; ການພັດທະ​ນາ​ການ​ລົງທຶນ, ການ​ພັດທະນາ​ຊົນນະບົດ ​ແລະ​ ການ​ແກ້​ໄຂ​ຄວາມທຸກ​ຍາກ, ການ​ສົ່ງ​ເສີມ​ການ​ຜະລິດ, ການ​ຍົກ​ສູງ​ຄຸນ​ນະພາ​ບການ​ສຶກສາ, ບັນຫາ​ສາ​ທາ​ລະນະ​ສຸກ ​ແລະ ພັດທະນາ​ພື້ນຖານ​ໂຄງ​ລ່າງ​ດ້ານ​ຄົມມະນາຄົມ ​ແລະ​ບັນຫາ​ອື່ນໆ; ພ້ອມ​ນີ້ ບັນດາ​ທ່ານ ສສຊ  ສະ​ເໜີ​ໃຫ້​ລັດຖະບານ, ກະຊວງ, ອົງການ ​ແລະ ອົງການ​ປ້ອງ​ຄອງ​ທ້ອງ​ຖິ່ນ ຈົ່ງ​ເປັນ​ເຈົ້າ​ການ​ໃນ​ການ​ເພີ່ມ​ທະວີ​ຄວາມ​ຮັບຜິດຊອບ​ ​ແລະ ສຸມ​ໃສ່​ຈັດ​ຕັ້ງ​ວຽກງານ​ດ້ານ​ຕ່າງໆ​ໃຫ້​ມີ​ຄວາມ​ເຂັ້ມ​ແຂງ, ຮັບປະກັນ​ຄວາມ​ໂປ່​ງ​ໃສ, ​ເພື່ອ​ເປັນ​ພື້ນຖານ​ອັນໜັກ​ແໜ້ນ​ໃນ​ການ​ປະກອບ​ສ່ວນ​ສຳຄັນ​ໃນ​ການສ້າງສາ​ພັດທະ​ນາ​ປະ​ເທ​ດຊາດ.

ຕາມ​ວາລະ​ດຳ​ເນີນ​ກອງ​ປະຊຸມ​ສະ​ໄໝສາມັນເທື່ອ​ທີ 4 ຂອງ ສພຊ ​ຊຸດ​ທີ VIII, ຄາດ​ວ່າຕອນ​ເຊົ້າ​ວັນ​ທີ 19 ຕຸລາ 2017 ຈະ​ສືບຕໍ່ປະກອບ​ຄຳ​ເຫັນ​ຕໍ່ບົດ​ລາຍ​ງານ​ຂອງ​ລັດຖະບານ​ກ່ຽວກັບ​ການຈັດ​ຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດ ​ແລະ ​ແຜ​ນ​ເງິນຕາ ປະຈຳ​ປີ 2017 ​ແລະ ​ແຜນການ ປະຈຳ​ປີ 2018; ສ່ວນ​ຕອນ​ບ່າຍ​ປະທານ​ກອງ​ປະຊຸມ​ຈະ​ໄດ້​ເຈາະ​ຈິ້ມ ​ແລະ ​ໃຫ້​ທິດ​ຊີ້ນຳ​ໃນ​ການ​ປະກອບ​ຄຳ​ຄິດ​ຄຳ​ເຫັນ​ຕໍ່ບົດ​ລາຍ​ງານ​ຂອງ​ອົງການ​ກວດ​ສອບ​​ແຫ່ງ​ລັດ ​ແລະ ບົດ​ລາຍ​ງານ​ຂອງ​ອົງ​ການກວດກາ​ລັດຖະບານ, ຈາກ​ນັ້ນ ບັນດາ​ທ່ານ ສສຊ ຈະ​ໄດ້​ປະກອບ​ຄຳ​ເຫັນ​ຕໍ່ບົດ​ລາຍ​ງານ​ດັ່ງກ່າວ.