ປະທານສະພາແຫ່ງຊາດ ຕ້ອນຮັບລັດຖະມົນຕີກະຊວງການຕ່າງປະເທດ ແລະ ການຮ່ວມມື ຕີມໍ-ເລສເຕ
11/06/2019

(ສພຊ) ຕອນບ່າຍວັນທີ 6 ມິຖຸນາ ຜ່ານມາ, ທີ່ສະພາແຫ່ງຊາດ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງທ່ານ ດີໂອນິຊີໂອ ດາ ຄອສຕາ ບາໂບ ໂຊອາເຣສ (Dionisio da Costa Babo Soareres) ລັດຖະມົນຕີກະຊວງການຕ່າງປະເທດ ແລະ ຮ່ວມມື ແຫ່ງສາທາລະນະລັດ ປະຊາທິປະໄຕ ຕີມໍ-ເລສເຕ ພ້ອມດ້ວຍຄະນະ ເນື່ອງໃນໂອກາດຢ້ຽມຢາມ ສປປລາວ ຢ່າງເປັນທາງການ ລະຫວ່າງວັນທີ 5-8 ມິຖຸນາ 2019.

          ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບທ່ານ ດີໂອນິຊີໂອ ດາ ຄອສຕາ ບາໂບ ໂຊອາເຣສ  ດ້ວຍຄວາມຈິງໃຈ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເຊິ່ງເປັນ​ການ​ເສີມ​ສ້າງສາ​ຍພົວພັນ ​ແລະ ການ​ຮ່ວມ​ມື​ລະຫວ່າງ​ສອງ​ປະ​ເທດລາວ ​ແລະ ຕີ​ມໍ​-ເລສ​ເຕ ​ໃຫ້​ມີ​ບາດກ້າວໃໝ່ ​ແລະ ຂະຫຍາຍຕົວ​ສູງ​ຂຶ້ນ​ຕື່ມ​ອີກ​ກ້າວໜຶ່ງ. ນອກຈາກນັ້ນ, ທ່ານປະທານສະພາແຫ່ງຊາດ ຍັງໄດ້ກ່າວຊົມເຊີຍຕໍ່ຜົນສໍາເລັດທີ່ກ່ອນໜ້ານີ້ ໄດ້ພົບປະເຮັດວຽກຮ່ວມກັບລັດຖະມົນຕີກະຊວງການຕ່າງປະເທດຂອງ ສປປລາວ ແລະ ຊົມເຊີຍຜົນສໍາເລັດທີ່ປະຊາຊົນ ສາທາລະນະລັດ ປະຊາທິປະໄຕ ຕີມໍ-ເລສເຕ ໄດ້ເລືອກທ່ານ ດີໂອນິຊີໂອ ດາ ຄອສຕາ ບາໂບ ໂຊອາເຣສ ເປັນລັດຖະມົນຕີກະຊວງການຕ່າງປະເທດ ແລະ ການຮ່ວມມື ເພາະວ່າທ່ານເປັນຜູ້ໜຶ່ງທີ່ມີຄວາມຮູ້ຄວາມສາມາດປະສົບການທາງດ້ານກົດໝາຍ ຫວັງວ່າທ່ານຈະເປັນຜູ້ໜຶ່ງທີ່ເຮັດໜ້າທີ່ເສີມຂະຫຍາຍສາຍພົວພັນລະຫວ່າງສອງປະເທດ ແລະ  ສໍາລັບຂໍ້ສະເໜີທີ່ຕີມໍ-ເລສເຕ ໃຫ້ ສປປລາວ ສະໜັບສະໜູນໃຫ້ໄດ້ເຂົ້າເປັນສະມາຊິກອາຊຽນ ກໍຄືສະມາຊິກໄອປານັ້ນ ແມ່ນຍິນດີສະໜັບສະໜູນເຕັມທີ່.  ທ່ານປະທານສະພາແຫ່ງຊາດ ຍັງໄດ້ເນັ້ນໃຫ້ລັດຖະມົນຕີກະຊວງການຕ່າງປະເທດ ແລະ ການຮ່ວມມື ຕີມໍ-ເລສເຕ ຈົ່ງສືບຕໍ່ຮ່ວມມືໃຫ້ຫລາຍຂຶ້ນກວ່າເກົ່າ ເປັນຕົ້ນແມ່ນສະເໜີໃຫ້ມີການເພີ່ມພົບປະແລກປ່ຽນຄະນະຜູ້ແທນໄປມາຢ້ຽມຢາມເຊິ່ງກັນ ແລະ ກັນ ແລະ ສະເໜີໃຫ້ນາຍົກລັດຖະມົນຕີທັງສອງປະເທດຄົ້ນຄວ້າລົງເລິກການຮ່ວມມືທຸກດ້ານ.

          ໃນການຢ້ຽມຂໍ່ານັບ, ທ່ານ ດີໂອນິຊີໂອ ດາ ຄອສຕາ ບາໂບ ໂຊອາເຣສ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານປະທານສະພາແຫ່ງຊາດ ແຫ່ງ ສປປລາວ ພ້ອມທັງລາຍງານຜົນການພົບປະກັບທ່ານລັດຖະມົນຕີກະຊວງການຕ່າງປະເທດ ສປປລາວ ແລະ ການເຂົ້າຢ້ຽມຂໍ່ານັບທ່ານນາຍົກລັດຖະມົນຕີ ແຫ່ງ ສປປລາວ ໃຫ້ຮັບຊາບໂດຍສັງເຂບ ເຊິ່ງການມາຢ້ຽມຢາມລາວໃນຄັ້ງນີ້ ເພື່ອມາສືບຕໍ່ຮ່ວມມືເສີມຂະຫຍາຍສາຍພົວພັນລະຫວ່າງສອງປະເທດ ແລະ ຂໍໃຫ້ ສປປລາວ ສະໜັບສະໜູນ ຕີມໍ-ເລສເຕເຂົ້າເປັນສະມາຊິກອາຊຽນ ກໍຄືໄອປາໃນໄວໆນີ້ ພ້ອມທັງກ່າວວ່າຍິນດີນໍາເອົາຄໍາແນະນໍາຂອງປະທານສະພາແຫ່ງຊາດລາວ ໄປລະດົມນັກທຸລະກິດທັງສອງປະເທດ ໃຫ້ມີການຮ່ວມມືກັນທາງດ້ານການລົງທຶນໃຫ້ຫລາຍຂຶ້ນ ແລະ ນໍາເອົາຄໍາຢື້ຢາມຖາມຂ່າວຂອງປະທານສະພາແຫ່ງຊາດລາວ ໄປຍັງປະທານລັດຖະສະພາແຫ່ງຊາດ ຕີມໍ-ເລສເຕ ໃຫ້ຮັບຮູ້, ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ຈະເປັນອີກແຮງໜຶ່ງທີ່ຈະກະຕຸກຊຸກຍູ້ສາຍພົວພັນຂອງ ລາວ ແລະ ຕີມໍ-ເລສເຕ ໃຫ້ເຂົ້າສູ່ລວງເລິກ.

(ສອນສັກ ວັນວິໄຊ)