ປະທານສະມາຄົມມິດຕະພາບ ຫວຽດນາມ-ລາວ ເຂົ້າຢ້ຽມຂຳນັບປະທານສະພາແຫ່ງຊາດ.
07/06/2019

(ສພຊ) ຕອນເຊົ້າວັນທີ 31 ພຶດສະພາ 2019 ທີ່ສະພາແຫ່ງຊາດ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ໃຫ້ການຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເຈີນ ວັນ ຕຸ໋ຍ ກຳມະການສູນກາງພັກກອມມູນິດກວຽດນາມ, ຄະນະປະຈຳສະພາແຫ່ງຊາດ, ຮອງຫົວໜ້າຄະນະຈັດຕັ້ງສູນກາງພັກ, ປະທານສະມາຄົມມິດຕະພາບຫວຽດນາມ-ລາວ ຂັ້ນສູນກາງ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ ສປປລາວ ລະຫວ່າງວັນທີ 30 ພຶດສະພາ-30 ມິຖຸນາ 2019.

ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ສະແດງຄວາມຊົມເຊີຍ ພ້ອມທັງຕີລາຄາສູງຕໍ່ການມາຢ້ຽມຢາມ ສປປລາວ ຢ່າງເປັນທາງການໃນຄັ້ງນີ້ ທັງເປັນການສະແດງໃຫ້ເຫັນເຖິງສາຍພົວພັນມິດຕະພາບ ໃນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ທີ່ມີມູນເຊື້ອແຕ່ດົນນານແລ້ວນັ້ນໃຫ້ນັບມື້ນັບແໜ້ນແຟ້ນ ແລະ ຈະເລີນງອກງາມຍິ່ງຂຶ້ນ ພ້ອມນັ້ນ, ຍັງໄດ້ສະແດງຄວາມຊົມເຊີຍໃນການພົບປະລະຫວ່າງສອງຄະນະຜູ້ແທນລາວ-ຫວຽດນາມ ການພົວພັນຮ່ວມມືສືບຕໍ່ມູນມໍລະດົກອັນລໍ້າຄ່າໃຫ້ນັບມື້ຈະເລີນງອກງາມຂຶ້ນເລື້ອຍໆ.

ຈາກນັ້ນ, ສະຫາຍ ເຈິນ ວັນ ຕຸ໋ຍ ໄດ້ລາຍງານການເຄື່ອນໄຫວການພົບປະຂອງສອງຄະນະ ຫວຽດນາມ-ລາວ ເຊິ່ງທັງສອງຝ່າຍໄດ້ຕົກລົງເປັນເອກະພາບແຜນງານເປັນອັນລະອຽດ  ກໍຄືວຽກງານຈຸດສຸມໃນຕໍ່ໜ້າ. ພ້ອມນັ້ນ, ທາງສະມາຄົມຍັງແຈ້ງໃຫ້ຊາບຕື່ມກ່ຽວກັບການປຸກລະດົມຂົນຂວາຍຊຸກຍູ້ທຶນຮອນຊ່ວຍເຫລືອຜູ້ປະສົບໄພຈາກຄູກັ້ນນໍ້າເຂື່ອນໄຟຟ້າເຊປຽນ ເຊນໍ້ານ້ອຍແຕກຢູ່ແຂວງອັດຕະປື ເຊິ່ງການຊ່ວຍເຫລືອແມ່ນຄືກັນກັບຊ່ວຍປະຊາຊົນຫວຽດນາມຖືກປະສົບໄພທຳມະຊາດນໍ້າຖ້ວມ.

ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ເນັ້ນໃຫ້ສືບຕໍ່ບັນດາເນື້ອໃນ ພ້ອມທັງເສີມຂະຫຍາຍໃຫ້ກວ້າງອອກ ໂດຍສະເພາະນໍ້າໃຈຂອງຄອບຄົວນັກປະຕິວັດ ທີ່ໄດ້ສົ່ງລູກຫລານມາເຮັດໜ້າທີ່ ເພື່ອປົດປ່ອຍປະເທດຊາດລາວທີ່ໄດ້ເສຍສະຫລະເລືອດເນື້ອໃນປາງສົງຄາມ   ແລະ ທ່ານຍັງສະເໜີ ໃຫ້ມີແຜນ ຢ້ຽມຢາມລະຫວ່າງຄອບຄົວວິລະຊົນທີ່ເສຍສະຫລະຊີວິດຢູ່ໃນລາວ ເພື່ອເປັນການສ້າງສາຍພົວພັນ ແລະ ສຶກສາອົບຮົມຮັກສາມູນເຊື້ອ ໃນການເຜີຍແຜ່ກ່ຽວກັບປະຫວັດສາດ ການເຄື່ອນໄຫວວິລະຊົນ ຂອງທະຫານອາສາສະໝັກຫວຽດນາມ ກໍຄືປະຊາຊົນຫວຽດນາມທີ່ເສຍສະຫລະເຂົ້າໃນການປະຕິວັດລາວ. ພ້ອມນັ້ນ, ໃຫ້ສອງສະມາຄົມຈັດສຳມະນາໃນຫົວຂໍ້ໃດໜຶ່ງ ໂດຍສະເພາະບັນດາບົດຮຽນໃນການຈັດຕັ້ງສະມາຄົມ ຫລື ການຈັດສຳມະນາລະດົມທຶນໃນການຊ່ວຍເຫລືອຜູ້ມີຄຸນງາມຄວາມດີຢູ່ໃນສອງປະເທດລາວ-ຫວຽດນາມ ທີ່ພົວພັນຊ່ວຍເຫລືອ ການຕໍ່ສູ້ໃນເມື່ອກ່ອນ.  ນອກຈາກນັ້ນ, ໃຫ້ທາງສະມາຄົມຊຸກຍູ້ໃຫ້ຜູ້ປະກອບການລົງທຶນຂອງຫວຽດນາມມາລົງທຶນ ຢູ່ ໃນ ສປປລາວ ໂດຍສະເພາະທາງດ້ານກະສິກຳສະອາດ ເຊິ່ງຈະເຮັດໃຫ້ ປະຊາຊົນໄດ້ຮັບຜົນປະໂຫຍດໃນການສ້າງລາຍຮັບໃນຄອບຄົວ.

ໃນຕອນທ້າຍ ສະຫາຍ ເຈີນ ວັນ ຕຸ໋ຍ ໄດ້ກ່າວສະແດງຄວາມຂອບໃຈຕໍ່ທ່ານປະທານສະພາແຫ່ງຊາດ ທີ່ໄດ້ເສຍສະຫລະເວລາອັນມີຄ່າໃນການຕ້ອນຮັບຄັ້ງນີ້ ເຊິ່ງຕະຫລອດໄລຍະຜ່ານມາ ກໍໄດ້ຮັບການເອົາໃຈໃສ່ຈາກສະຫາຍປະທານສະພາແຫ່ງຊາດ ຖືວ່າເປັນກຳລັງໃຈອັນໃຫຍ່ຫລວງຂອງສະມາຄົມຫວຽດນາມ ໃນການຕັດສິນໃຈສູງ ຕໍ່ການຈັດຕັ້ງປະຕິບັດວຽກງານຂອງສະມາຄົມ ແລະ  ຫວັງຢ່າງຍິ່ງວ່າຈະໄດ້ຮັບການສືບຕໍ່ຊຸກຍູ້ຈາກທ່ານປະທານສະພາແຫ່ງຊາດອີກຕໍ່ໄປ.

(ສົມສັກ ສຸບັນດິດ)

ກວດແລ້ວ, 9:54:08 AM, Wednesday, June 5, 2019

ບຸນເກີດ ວົງໄຊຍາ