ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໄດ້ໄຂຂຶ້ນຢ່າງເປັນທາງການ
05/06/2019

ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໄດ້ໄຂຂຶ້ນຢ່າງເປັນທາງການໃນຕອນເຊົ້າມື້ນີ້ທີ່ຫໍປະຊຸມສະພາແຫ່ງຊາດໂດຍການເປັນປະທານຂອງ ທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດ ເຊິ່ງກອງປະຊຸມດັ່ງກ່າວຈະດຳເນີນໄປຈົນຮອດວັນທີ 25 ມິຖູນາ 2019 ແລະ ຈະມີການຮັບຟັງການລາຍງານສະພາບການພັດທະນາເສດຖະກິດສັງຄົມໃນ 4 ເດືອນຜ່ານມາ, ຕົວເລກຄາດຄະເນສຳລັບ 6 ເດືອນຕົ້ນປີ ແລະ ແຜນການສຳລັບ 6 ເດືອນທ້າຍປີ.
ໃຫ້ກຽດເຂົ້າຮ່ວມພິທີເປີດກອງປະຊຸມໃນຄັ້ງນີ້ມີ ທ່ານ ບຸນຍັງ ວໍລະຈິດ, ປະທານປະເທດ ແລະ ທ່ານ ທອງລຸນ ສີສຸລິດ, ນາຍົກລັດຖະມົນຕີ, ບັນດາການນໍາພັກ-ລັດຜູ້ອື່ນໆ ພ້ອມດ້ວຍນັກປະຕິວັດອາວຸໂສ, ຜູ້ຊົງຄຸນວຸດທິ, ບັນດາສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສະຖາບັນ, ນັກທຸລະກິດ ແລະ ຕາງໜ້າພາກສ່ວນຕ່າງໆເຂົ້າຮ່ວມຢ່າງພ້ອມພຽງ.