ສູນທອນພົດ ຂອງທ່ານ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ກ່າວໄຂກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII
20/10/2017

ບົດສູນທອນພົດ

ຂອງທ່ານ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ກ່າວໄຂກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII

ວັນທີ 16 ຕຸລາ 2017

-----------------------------------------------------

 

ຮຽນ: - ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ທີ່ເຄົາລົບ ແລະ ນັບຖື ຢ່າງສູງ!

-       ບັນດາທ່ານ ຜູ້ນໍາ, ອາດີດການນໍາຂັ້ນສູງ ຂອງພັກ-ລັດ ທີ່ນັບຖື,

-       ບັນດາທ່ານສະມາຊິກສະພາແຫ່ງຊາດ, ແຂກທີ່ມີກຽດທີ່ນັບຖື ແລະ ຮັກແພງ.

 

ອີງຕາມໜ້າທີ່ ແລະ ສິດ ຂອງສະພາແຫ່ງຊາດ ຊຶ່ງໄດ້ກໍານົດໃນລັດຖະທໍາມະນູນ ແລະ ກົດໝາຍວ່າດ້ວຍສະພາແຫ່ງຊາດ. ມື້ນີ້, ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດ, ທີ່ທົ່ວພັກ-ລັດ, ກໍາລັງປະກອບອາວຸດ ແລະ ປະຊາຊົນລາວທັງຊາດ ພວມສຸມໃສ່ຈັດຕັ້ງຜັນຂະ ຫຍາຍມະຕິ 4 ແລະ 5 ສະໄໝທີ X ຂອງພັກ ເຂົ້າສູ່ລ່ວງເລິກ ແລະ ສູ້ຊົນຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະ ມານແຫ່ງລັດ ແລະ ແຜນເງິນຕາປະຈໍາປີ 2017, ຕາມມະຕິກອງປະຊຸມສະໄໝສາມັນເທື່ອທີ 2 ແລະ 3 ຂອງສະພາແຫ່ງຊາດຊຸດທີ VIII ດ້ວຍຄວາມຮັບຜິດຊອບສູງ ແລະ ໄດ້ຮັບຜົນສໍາເລັດໃນຫຼາຍດ້ານ.

ກອງປະຊຸມ ຂໍສະແດງຄວາມຂໍານັບຊົມເຊີຍ ມາຍັງ ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ທີ່ໄດ້ໃຫ້ກຽດເຂົ້າຮ່ວມກອງປະຊຸມ ໃນຄັ້ງນີ້ ຢ່າງສຸດອົກສຸດໃຈ (ຂໍຊົມເຊີຍ).

ກອງປະຊຸມ ຂໍສະແດງຄວາມຊົມເຊີຍ ບັນດາທ່ານຜູ້ນໍາ, ອາດີດການນໍາຂັ້ນສູງຂອງພັກ-ລັດ, ບັນດາທ່ານນັກປະຕິວັດອາວຸໂສ, ຜູ້ຊົງຄຸນວຸດທິ, ບັນດາທ່ານສະມາຊິກສະພາແຫ່ງຊາດ, ອາດີດສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ ແລະ ອົງການຈັດຕັ້ງມະຫາຊົນ, ສະຖາບັນ, ນັກທຸລະກິດ ແລະ ທ່ານຜູ້ຕາງໜ້າຂອງພາກສ່ວນຕ່າງໆ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້ (ຂໍຊົມເຊີຍ).

 

ບັນດາທ່ານທີ່ນັບຖື ແລະ ຮັກແພງ!

ປີ 2017 ເປັນປີທີ 2 ຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ 5 ປີ ຄັ້ງທີ VIII, ຕະຫຼອດໄລຍະ 9 ເດືອນກວ່າຜ່ານມາ, ເຖິງວ່າ ສະພາບແວດລ້ອມຂອງພາກພື້ນ ແລະ ສາກົນ ມີທັງກາລະໂອກາດ, ສິ່ງທ້າທາຍ ຊຶ່ງ ໄດ້ສົ່ງຜົນກະທົບ ແກ່ການພັດທະນາເສດຖະກິດ-ສັງຄົມຂອງພວກເຮົາກໍ່ຕາມ, ແຕ່ດ້ວຍຄວາມເອົາໃຈໃສ່ຊີ້ນໍາ-ນໍາພາຂອງສູນກາງພັກ, ຄວາມຮັບຜິດຊອບ ຂອງບັນດາອົງການຈັດຕັ້ງພັກ-ລັດຂັ້ນຕ່າງໆ ແລະ ການເຂົ້າຮ່ວມຢ່າງຕັ້ງໜ້າຂອງປະຊາຊົນບັນດາເຜົ່າ ໃນທົ່ວປະເທດ, ໄດ້ເຮັດໃຫ້ປະເທດຊາດຂອງພວກເຮົາ ສືບຕໍ່ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບ, ມີຄວາມເປັນລະ ບຽບຮຽບຮ້ອຍ, ການພັດທະນາເສດຖະກິດ-ສັງຄົມ ສືບຕໍ່ຂະຫຍາຍຕົວຢ່າງຕໍ່ເນື່ອງ, ການຄຸ້ມຄອງ ແລະ ການບໍລິຫານລັດຕາມລະບຽບກົດໝາຍ ໄດ້ຮັບການປັບປຸງ, ໄດ້ຈັດຕັ້ງປະຕິບັດສໍາເລັດຫຼາຍເປົ້າໝາຍ ຂອງການພັດທະນາແບບຍືນຍົງ ທີ່ກໍານົດໄວ້ໃນແຜນ, ການພົວພັນຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນ ສືບຕໍ່ໄດ້ຮັບການເສີມຂະ ຫຍາຍ, ບົດບາດ ແລະ ອິດທິພົນຂອງ ສປປ ລາວ ນັບມື້ໄດ້ຮັບການເຊີດຊູຂຶ້ນ ໃນເວທີສາກົນ. ແຕ່ເຖິງຢ່າງໃດກໍ່ຕາມ, ພວກເຮົາ ຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍ ຈໍານວນໜຶ່ງເຊັ່ນ: ອັດຕາເຕີບໂຕທາງດ້ານເສດຖະກິດ ເຖິງວ່າໄດ້ມີການຂະຫຍາຍຕົວ, ແຕ່ຍັງບໍ່ທັນຮັບປະກັນຄວາມໝັ້ນທ່ຽງ ແລະ ຍືນຍົງເທື່ອ, ບາງຄາດໝາຍໃຫຍ່ທາງດ້ານເສດຖະ ກິດ-ການເງິນ-ສັງຄົມ ຍັງມີຄວາມສ່ຽງທີ່ອາດຈະບໍ່ບັນລຸຕາມແຜນການທີ່ວາງໄວ້, ການຜະລິດກະສິກໍາ, ອຸດສາຫະກໍາ ແລະ ການແກ້ໄຂໜີ້ສິນຂອງລັດ ຍັງປະສົບຄວາມຫຍຸ້ງຍາກ, ການລະເມີດກົດໝາຍ, ວິໄນແຜນການ-ການເງິນ ໃນການລົງທຶນຂອງລັດ, ການຄຸ້ມຄອງຊັບພະຍາກອນ, ບັນຫາສິ່ງແວດລ້ອມ, ການແກ້ໄຂປາກົດການຫຍໍ້ທໍ້ໃນສັງຄົມ ເຖິງວ່າໄດ້ມີຄວາມພະຍາຍາມ, ແຕ່ກໍ່ຍັງບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ແຫ່ງການພັດທະນາ ແລະ ຄວາມຄອງຄອຍຂອງປະຊາຊົນເທື່ອ.

ຢືນຕໍ່ໜ້າສະພາບການດັ່ງກ່າວ, ຮຽກຮ້ອງໃຫ້ທົ່ວພັກ-ລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ຈະຕ້ອງໄດ້ເພີ່ມທະວີຄວາມສາມັກຄີເປັນປຶກແຜ່ນ, ມີຄວາມເປັນເອກະພາບສູງທາງດ້ານມານະຈິດ ແລະ ການກະທໍາ, ສູ້ຊົນຜ່ານຜ່າຂໍ້ຫຍຸ້ງຍາກ, ເພື່ອສືບຕໍ່ຈັດຕັ້ງປະຕິບັດມະຕິ ກອງປະຊຸມໃຫຍ່ຄັ້ງທີ X ຂອງພັກ ໂດຍສະເພາະແມ່ນ ມະຕິ 4 ແລະ 5 ຂອງຄະນະບໍລິຫານງານສູນກາງພັກວາງອອກໃຫ້ບັນລຸຜົນສໍາເລັດ ເພື່ອສືບຕໍ່ສ້າງທ່ວງທ່າ ທີ່ໜັກແໜ້ນ ແລະ ຮອບດ້ານ ໃຫ້ແກ່ການພັດທະນາປະເທດຊາດໃນຊຸມປີຕໍ່ໜ້າ.

 

ບັນດາທ່ານທີ່ນັບຖື ແລະ ຮັກແພງ!

        ໃນກອງປະຊຸມຄັ້ງນີ້, ສະພາແຫ່ງຊາດ ຈະໄດ້ສຸມໃສ່ພິຈາລະນາ ແລະ ຕົກລົງບັນຫາສໍາຄັນຂອງຊາດດັ່ງນີ້:

  1. ພິຈາລະນາ ແລະ ຮັບຮອງ ບົດລາຍງານກ່ຽວກັບ ການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາປີ 2017 ແລະ ທິດທາງປີ 2018;
  2. ພິຈາລະນາ ແລະ ຮັບຮອງບົດລາຍງານ ກ່ຽວກັບການຈັດຕັ້ງປະຕິ ບັດແຜນການທ່ອງທ່ຽວໃນຊຸມປີຜ່ານມາ ແລະ ທິດທາງ ປີ 2018 ເພື່ອຮອງຮັບປີທ່ອງທ່ຽວລາວ;
  3. ພິຈາລະນາ ແລະ ຮັບຮອງ ບົດລາຍງານການຈັດຕັ້ງປະຕິບັດການ ເຄື່ອນໄຫວວຽກງານ ປະຈໍາປີ 2017 ແລະ ທິດທາງການເຄື່ອນ ໄຫວ ປີ 2018 ຂອງອົງການກວດສອບແຫ່ງລັດ ແລະ ຮັບຮອງ ບົດລາຍງານກ່ຽວກັບ ຜົນການກວດສອບບົດສະຫຼຸບຂາດຕົວການຈັດ ຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ແລະ ການແກ້ໄຂຜົນການກວດສອບງົບປະມານ ແລະ ການນໍາໃຊ້ຊັບສິນຂອງລັດ ສົກປີ 2013-2014 ແລະ 2014-2015 ຂອງອົງການກວດກາລັດຖະບານ;
  4. ພິຈາລະນາ ແລະ ຮັບຮອງ ບົດລາຍງານ ການຈັດຕັ້ງປະຕິບັດການ ເຄື່ອນໄຫວວຽກງານ ປະຈໍາປີ 2017 ແລະ ທິດທາງ ປີ 2018 ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ; 
  5. ພິຈາລະນາ ແລະ ຮັບຮອງ ບົດລາຍງານ ການຈັດຕັ້ງປະຕິບັດການ ເຄື່ອນໄຫວວຽກງານປະຈໍາປີ 2017 ແລະ ທິດທາງ ປີ 2018 ຂອງສະພາແຫ່ງຊາດ;
  6. ພິຈາລະນາ ແລະ ຮັບຮອງ ການສ້າງ ແລະ ປັບປຸງກົດໝາຍ ໃນຂົງ ເຂດເສດຖະກິດ-ສັງຄົມ ແລະ ຂົງເຂດປົກປ້ອງກົດໝາຍ ຈໍານວນ 16 ສະບັບ ໃນນັ້ນ:
  1. ກົດໝາຍສ້າງໃໝ່ມີ 9 ສະບັບຄື: 1). ຮ່າງກົດໝາຍວ່າດ້ວຍ ການປົກປ້ອງຜົນກະທົບຈາກການນໍາເຂົ້າສິນຄ້າ, 2). ກົດໝາຍວ່າດ້ວຍ ອຸຕຸນິຍົມ ແລະ ອຸທົກກະສາດ, 3). ກົດໝາຍວ່າດ້ວຍ ວຽກງານກາແດງລາວ, 4). ກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ, 5). ກົດໝາຍວ່າດ້ວຍ ການຖ່າຍທອດເຕັກໂນໂລຊີ, 6). ກົດໝາຍວ່າດ້ວຍ ລະບົບການຊໍາລະ, 7). ກົດໝາຍວ່າດ້ວຍ ການກັນ ແລະ ຄວບຄຸມພະຍາດຕິດຕໍ່, 8). ກົດໝາຍວ່າດ້ວຍ ຜູ້ພິພາກສາ ແລະ 9). ກົດໝາຍວ່າດ້ວຍ ການຈັດຊື້-ຈັດຈ້າງດ້ວຍທຶນຂອງລັດ.
  2. ກົດໝາຍປັບປຸງມີ 7 ສະບັບ ຄື: 1). ຮ່າງກົດໝາຍວ່າດ້ວຍ ການ ດໍາເນີນຄະດີອາຍາ, 2). ກົດໝາຍວ່າດ້ວຍ ການກວດກາລັດ, 3). ກົດໝາຍວ່າດ້ວຍ ຜັງເມືອງ, 4). ກົດໝາຍວ່າດ້ວຍ ສັນ ຊາດ, 5). ກົດໝາຍວ່າດ້ວຍ ອົງການກໍາມະບານລາວ, 6). ກົດໝາຍວ່າດ້ວຍ ແຮ່ທາດ, ແລະ 7). ກົດໝາຍວ່າດ້ວຍ ຊັບສິນທາງປັນຍາ.

ນອກຈາກນັ້ນ, ກອງປະຊຸມ ຍັງຈະໄດ້ຮັບຟັງການຊີ້ແຈງອະທິ ບາຍ ກ່ຽວກັບ ການປັບປຸງການບໍລິຫານລັດ ໃນທຸກຂັ້ນ ກໍ່ຄື ການຄຸ້ມຄອງແຮງງານລາວ ຢູ່ພາຍໃນ ແລະ ຢູ່ຕ່າງປະເທດ ຂອງລັດຖະບານ, ຮັບຟັງການລາຍງານຜົນການຕິດຕາມກວດກາ ຂອງສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ກັບການປະຕິບັດໜ້າທີ່ຂອງສະພາແຫ່ງຊາດ ກໍ່ຄື ສັງລວມຂໍ້ສະເໜີຂອງຜູ້ມີສິດປ່ອນບັດເລືອກຕັ້ງ ແລະ ຂອງປະຊາຊົນ ຕໍ່ກັບອົງການລັດບໍລິຫານ.

 

ບັນດາທ່ານທີ່ນັບຖື ແລະ ຮັກແພງ!

        ເນື້ອໃນທີ່ນໍາມາພິຈາລະນາໃນກອງປະຊຸມຄັ້ງນີ້ ແມ່ນມີຫຼາຍບັນ ຫາທີ່ສໍາຄັນ ແລະ ກວມເອົາໃນຫຼາຍຂົງເຂດວຽກງານ. ສະນັ້ນ, ບົນຈິດ ໃຈ ເສີມສ້າງຄວາມສາມັກຄີ, ດ້ວຍຄວາມຮັບຜິດຊອບ ແລະ ຄວາມມຸ່ງໝັ້ນຮັບໃຊ້ຜົນປະໂຫຍດຂອງຊາດ ແລະ ປະຊາຊົນ, ຕາງໜ້າໃຫ້ຄະນະປະຈໍາສະພາແຫ່ງຊາດ, ຂ້າພະເຈົ້າ ຮຽກຮ້ອງມາຍັງບັນດາທ່ານ ສະມາຊິກສະພາແຫ່ງຊາດ ຈົ່ງໄດ້ສຸມສະຕິປັນຍາ ແລະ ເສີມຂະຫຍາຍປະຊາທິປະ ໄຕ ເຂົ້າໃນການຄົ້ນຄວ້າ, ປະກອບຄວາມຄິດເຫັນ ຕໍ່ບັນດາເນື້ອໃນທີ່ນໍາມາພິຈາລະນາຢູ່ໃນກອງປະຊຸມຄັ້ງນີ້ ໃຫ້ມີຄຸນນະພາບ, ປະກອບສ່ວນເຮັດໃຫ້ກອງປະຊຸມ ບັນລຸຜົນສໍາເລັດ, ສະໜອງຕອບໄດ້ຄວາມຮຽກ ຮ້ອງຕ້ອງການຂອງການພັດທະນາ ແລະ ຂອງປະຊາຊົນ.

        ບົນຈິດໃຈດັ່ງກ່າວ, ຂ້າພະເຈົ້າ ປະກາດໄຂກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ຢ່າງເປັນທາງການນັບແຕ່ເວລານີ້ເປັນຕົ້ນໄປ.

(ຂໍຂອບໃຈ)