ຮອງປະທານສະພາແຫ່ງຊາດ ເຮັດວຽກຢູ່ແຂວງຄຳມ່ວນ
06/05/2019

(ສພຊ) ໃນລະຫວ່າງວັນທີ 4-5 ເມສາ ຜ່ານມາ, ທ່ານ ສົມພັນ ແພງຄໍາມີ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງຄຳມ່ວນ ເຊິ່ງໄດ້ພົບປະກັບທ່ານ ພົມມາ ພັນທະລັງສີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງຄຳມ່ວນ ແລະ ໄດ້ແຈ້ງຈຸດປະສົງໃນການລົງເຄື່ອນໄຫວເຮັດວຽກຢູ່ແຂວງຄຳມ່ວນ; ຈາກນັ້ນ, ໄດ້ສະເໜີບົດຄົ້ນຄວ້າກົງຈັກການຈັດຕັ້ງ ແລະບຸກຄະລາກອນຂອງສະພາປະຊາຊົນແຂວງ(ສພຂ) ຊຸດທີ II ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງຊຸດທີ IX.

ໃນການເຄື່ອນໄຫວເຮັດວຽກຄັ້ງນີ້, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຮັດວຽກຮ່ວມກັບ ສພຂ ຄໍາມ່ວນ ເຊິ່ງມີທ່ານ ສົມໃຈ ເພັດສີນວນ ປະທານ ສພຂ ພ້ອມດ້ວຍບັນດາທ່ານຄະນະປະຈຳສະພາປະຊາຊົນແຂວງ, ບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ຄະນະເລຂາທິການ ສພຂ ແລະ ສະມາຊິກ ສພຂພ້ອມດ້ວຍພະນັກງານ-ລັດຖະກອນທີ່ກ່ຽວຂ້ອງເຂົ້າຮ່ວມ; ກອງປະຊຸມໄດ້ຮັບຟັງບົດລາຍງານຫຍໍ້ກ່ຽວກັບການເຄື່ອນໄຫວວຽກງານຂອງ ສພຂ ແລະ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ລາຍງານກ່ຽວກັບວຽກງນຂອງຂະແໜງຊ່ວຍວຽກ ສພຂ  ແລະ ໜ່ວຍ ສສຂ ປະຈໍາເຂດເລືອກຕັ້ງເມືອງ ແລະກ່ຽວກັບການສ້າງນິຕິກຳທີ່ສຳຄັນຂອງທ້ອງຖິ່ນ ແລະ ນິຕິກຳ 5 ສະບັບ ຂອງ ສພຂ; ຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ແລກປ່ຽນບັນດາຄໍາຄິດເຫັນຕ່າງໆເປັນຕົ້ນວຽກງານຈັດຕັ້ງພະນັກງານ-ລັດຖະກອນເພື່ອໃຫ້ສົມຄູ່ກັບໜ້າວຽກໂຕຈິງ ທັງນີ້ກໍເພື່ອຮັບປະກັນໃຫ້ໜ້າວຽກຕ່າງໆຂອງ ສພຂ ໃຫ້ມີຄຸນະພາບ.  ພາຍຫລັງສຳເລັດການປະກອບຄຳເຫັນຕ່າງໃນກອງປະຊຸມແລ້ວ ທ່ານຮອງປະທານສະພາແຫ່ງຊາດ ກໍໄດ້ມີທິດຊີ້ນຳໃນຫລາຍດ້ານ ໂດຍສະເພາະການຄັດເລືອກພະນັກງານ-ລັດຖະກອນ ແມ່ນຕ້ອງໃຫ້ສົມຄູ່ກັບໜ້າວຽກ ຖ້າຫາກຄົນບໍ່ພ້ອມກໍບໍ່ຄວນສ້າງຂະແໜງການໃໝ່; ນອກນັ້ນ, ທ່ານຍັງໄດ້ໃຫ້ທິດຊີ້ນຳຕໍ່ການວຽກງານຂອງ ສພຂ ເພື່ອຮັບປະກັນບັນດາໜ້າວຽກໃຫ້ໄດ້ຮັບຜົນສູງສຸດ.

 (ບອຍ ຮຸ່ງເຮືອງ)