ສຳເລັດການເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນ ຄັ້ງທີ 140
25/04/2019

(ສພຊ) ໃນລະຫວ່າງວັນທີ 4-12 ເມສາຜ່ານມາ, ຄະນະຜູ້ແທນຂັ້ນສູງຂອງສະພາແຫ່ງຊາດ ນໍາໂດຍທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມສະມັດຊາລັດຖະສະພາສາກົນ ຄັ້ງທີ 140 (The 140th Assembly of the Inter-Parliamentary Union Assembly) ທີ່ໂດຮາ ປະເທດກາຕ້າ; ເຊິ່ງກອງປະຊຸມຄັ້ງນີ້ດຳເນີນໄປພາຍໃຕ້ຫົວຂໍ້: ລັດຖະສະພາໃນຖານະເປັນເວທີເສີມສ້າງການສຶກສາ ເພື່ອສັນຕິພາບ, ຄວາມໝັ້ນຄົງ ແລະ ການປົກຄອງດ້ວຍກົດໝາຍ (Parliaments as platform to enhance education for peace, security and the rule of law) ມີຄະນະຜູ້ແທນຈາກທົ່ວໂລກເຂົ້າຮ່ວມທັງໝົດ 162 ປະເທດ, ຄະນະຜູ້ແທນທີ່ນໍາໂດຍລະດັບປະທານລັດຖະສະພາ 80 ທ່ານ ແລະ ຮອງປະທານລັດຖະສະພາ 40 ທ່ານ ແລະ ສະມາຊິກລັດຖະສະພາ 800 ກວ່າທ່ານ; ໃນນັ້ນ, ສະມາຊິກລັດຖະສະພາເພດຍິງກວມເອົາ 30% ແລະ ສະມາຊິກສະພາໜຸ່ມອາຍຸຕໍ່າກວ່າ 45 ປີ 19%; ນອກນີ້, ຍັງມີຄະນະຜູ້ແທນຈາກອົງການສະຫະປະຊາຊາດ ແລະ ຕົວແທນຈາກອົງການລັດຖະສະພາຈາກພາກພື້ນຕ່າງໆຂອງໂລກເຂົ້າຮ່ວມຢ່າງຫລວງຫລາຍ.

       ກອງປະຊຸມໃຫຍ່ສະຫະພັນລັດຖະສະພາສາກົນ ຄັ້ງທີ 140, ບັນດາທ່ານປະທານ-ຮອງປະທານລັດຖະສະພາ, ຫົວໜ້າຄະນະຜູ້ແທນຈາກບັນດາປະເທດສະມາຊິກໄອພີຢູ ໄດ້ຂື້ນກ່າວຄຳປາໃສພາຍໃຕ້ຫົວຂໍ້: ລັດຖະສະພາໃນຖານະເປັນເວທີເສີມສ້າງການສຶກສາເພື່ອສັນຕິພາບ, ຄວາມໝັ້ນຄົງ ແລະ ການປົກຄອງດ້ວຍກົດໝາຍ ໂດຍຜູ້ນຳລັດຖະສະພາສ່ວນໃຫຍ່ເຫັນດີເປັນເອກະພາບກັນວ່າ: ການສຶກສາເປັນປັດໄຈພື້ນຖານຂອງສັນຕິພາບ, ຄວາມໝັ້ນຄົງ ແລະ ການປົກຄອງດ້ວຍກົດໝາຍ ເຊິ່ງເປັນຈຸດມຸ່ງໝາຍອັນຍາວນານຂອງວົງຄະນະຍາດສາກົນ ທີ່ຈະຕ້ອງຮ່ວມກັນພັດທະນາຕໍ່ໄປ.

        ໃນໂອກາດດຽວກັນ, ທ່ານ ນາງ ສີໃສ ລືເດດມູນສອນ ໄດ້ຂື້ນກ່າວຄຳປາໃສຕໍ່ຫົວຂໍ້ດັ່ງກ່າວ ເຊິ່ງທ່ານໄດ້ຍົກໃຫ້ເຫັນເຖິງຄວາມສຳຄັນຂອງການສຶກສາ ທີ່ເປັນປັດໄຈສຳຄັນພື້ນຖານເພື່ອຄໍ້າປະກັນໃຫ້ແກ່ສັນຕິພາບ ແລະ ການປົກຄອງດ້ວຍກົດໝາຍ ໂດຍ  ເນັ້ນວ່າ: ສປປລາວ ໄດ້ຖືເອົາການສຶກສາເປັນຈຸດໃຈກາງຂອງການພັດທະນາຊັບພະຍາກອນມະນຸດ ເພື່ອເຮັດໃຫ້ພົນລະເມືອງລາວທຸກຄົນ ໄດ້ຮັບການສຶກສາທີ່ມີຄຸນນະພາບຢ່າງສະເໝີພາບ ແລະ ເທົ່າທຽມກັນ ສາມາດພັດທະນາຕົນເອງໃຫ້ກາຍເປັນພົນລະເມືອງທີ່ດີຂອງຊາດ, ມີຄຸນສົມບັດ, ມີສຸຂະພາບແຂງແຮງ, ມີຄວາມຮູ້, ຄວາມສາມາດສູງ ແລະ ມີຄວາມເປັນມືອາຊີບ ເພື່ອພັດທະນາປະເທດຊາດ ໃຫ້ມີຄວາມສີວິໄລຍືນຍົງ ແລະ ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ; ພ້ອມດຽວກັນນັ້ນ, ທ່ານຍັງໄດ້ກ່າວເຖິງແຜນຍຸດທະສາດການພັດທະນາລະບົບກົດໝາຍຂອງ ສປປລາວ  ທີ່ເນັ້ນຄວາມເປັນເອກະພາບ, ກົມກຽວ, ຈະແຈ້ງ, ເຊື່ອຖືໄດ້, ຄາດຄະເນໄດ້, ມີຄຸນນະພາບ ແລະ ຍຸຕິທຳ ທຸກຄົນສາມາດເຂົ້າເຖິງໄດ້ໂດຍຜ່ານຂະບວນການສ້າງກົດໝາຍທີ່ໂປ່ງໃສ ແລະ ມີສ່ວນຮ່ວມຂອງປະຊາຊົນ ເຊິ່ງມາຮອດປະຈຸບັນສະພາແຫ່ງຊາດລາວ ສາມາດຮັບຮອງເອົາການສ້າງ ແລະ ປັບປຸງກົດໝາຍ ທັງໝົດ 139 ສະບັບ ກວມທຸກຂົງເຂດວຽກງານໃນສັງຄົມ; ພ້ອມນີ້, ກໍຍັງໄດ້ພິຈາລະນາຮັບຮອງເອົາແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໂດຍສະເພາະການຈັດສັນງົບປະມານປະຈຳປີໃຫ້ຂະແໜງການສຶກສາເພື່ອນໍາໃຊ້ເຂົ້າໃນການບໍລິຫານ, ພັດທະນາພື້ນຖານໂຄງລ່າງດ້ານການສຶກສາ, ປັບປຸງຫລັກສູດການຮຽນ-ການສອນ ແລະ ຈັດຕັ້ງປະຕິບັດບັນດາຄາດໝາຍທີ່ຕິດພັນກັບເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດ.

          ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກອງປະຊຸມຄະນະກຳມະການປະຈຳຕ່າງໆ ຂອງໄອພີຢູເຊັ່ນ: ກຳມາທິການປະຈໍາກ່ຽວກັບບັນຫາສັນຕິພາບ ແລະ ຄວາມໝັ້ນຄົງຂອງໂລກ, ກຳມາທິການປະຈໍາກ່ຽວກັບການພັດທະນາແບບຍືນຍົງ, ການເງິນ ແລະ ການຄ້າ, ກຳມາທິການກ່ຽວກັບບັນຫາປະຊາທິປະໄຕ ແລະ ສິດທິມະນຸດ, ກໍາມາທິການປະຈໍາກ່ຽວກັບ ກິດຈະການຂອງອົງການສະຫະປະຊາຊາດ, ເວທີປຶກສາຫາລືຂອງສະມາຊິກລັດຖະສະພາເພດຍິງ, ເວທີປຶກສາຫາລືຂອງສະມາຊິກລັດຖະສະພາໜຸ່ມ, ກອງປະຊຸມຂອງກຸ່ມລັດຖະສະພາຈາກບັນດາປະເທດອາຊຽນ +3 ແລະ ກອງປະຊຸມກຸ່ມລັດຖະສະພາພາກພື້ນອາຊີ ແລະ ປາຊີຟິກ.