ຮອງປະທານສະພາແຫ່ງຊາດ ເຄື່ອນໄຫວເຮັດວຽກຮ່ວມກັບ ສພຂ ສະຫວັນນະເຂດ
25/04/2019

(ສພຂ) ໃນລະຫວ່າງວັນທີ 3-4 ເມສາ 2019 ທ່ານ ສົມພັນ ແພງຄຳມີ ກຳມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຮ່ວມກັບສະພາປະຊາຊົນແຂວງ (ສພຂ) ສະຫວັນນະເຂດ ໂດຍການຕ້ອນຮັບຂອງທ່ານ ຄຳເຜີຍ ຜັນທະຈອນ ປະທານ ສພຂ ມີບັນດາທ່ານຄະນະປະຈຳສະພາປະຊາຊົນແຂວງ, ປະທານ-ຮອງປະທານຄະນະກຳມະການ, ຄະນະເລຂາທິການ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ (ສສຂ) ປະຈຳເມືອງ ພ້ອມດ້ວຍຫົວໜ້າ-ຮອງຫົວໜ້າຂະແໜງພາຍໃນ ສພຂ ເຂົ້າຮ່ວມ.

          ໃນການເຄື່ອນໄຫວເຮັດວຽກຄັ້ງນີ້, ຄະນະໄດ້ຮັບຟັງການລາຍງານສະພາບລວມໂດຍຫຍໍ້ ກ່ຽວກັບວຽກງານການເຄື່ອນໄຫວຂອງຄະນະ ສສຊ ປະຈຳເຂດເລືອກຕັ້ງ ແລະ ສພຂ; ກົງຈັກການຈັດຕັ້ງ ແລະ ບຸກຄະລາກອນຊ່ວຍວຽກຂອງຄະນະ ສສຊ ປະຈຳເຂດເລືອກຕັ້ງ ແລະ ສພຂ, ໜ່ວຍ ສສຂ ປະຈຳເຂດເລືອກຕັ້ງຂັ້ນເມືອງ,ນະຄອນ; ການສ້າງ ແລະ ປັບປຸງນິຕິກຳ ທີ່ສຳຄັນຂອງທ້ອງຖິ່ນ (ຂໍ້ຕົກລົງຂອງເຈົ້າແຂວງ) ແລະ ການຈັດຕັ້ງປະຕິບັດນິຕິກຳ;  ການສ້າງນິຕິກໍາພາຍໃນຂອງຄະນະ ສສຊ ປະຈໍາເຂດເລືອກຕັ້ງ ແລະ ສພຂ ໂດຍສະເພາະນິຕິກໍາ 5 ສະບັບ ເຊິ່ງຕະຫລອດໄລຍະຜ່ານມາແມ່ນໄດ້ເອົາໃຈໃສ່ຕໍ່ກັບການຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ໃນການຈັດຕັ້ງປະຕິບັດກົດໜາຍ ແລະ ພິຈາລະນາ, ຮັບຮອງເອົານິຕິກຳໃຕ້ກົດໝາຍ ຢູ່ຂັ້ນທ້ອງຖິ່ນຂອງຕົນ ເຊິ່ງໄດ້ມີຜົນສຳເລັດຫລາຍດ້ານ ແລະ ບາງຂໍ້ຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂ, ທີ່ປະຊຸມຍັງໄດ້ມີການປະກອບຄຳຄິດຄຳເຫັນຢ່າງກົງໄປກົງມາ ເຊິ່ງເປັນຖານຂໍ້ມູນອັນເປັນປະໂຫຍດເພື່ອນຳໄປສະເໜີຕໍ່ຂັ້ນເທິງ; ນອກຈາກນີ້, ຍັງໄດ້ມີການປຶກສາຫາລືກ່ຽວກັບກົງຈັກການຈັດຕັ້ງ ແລະ ບຸກຄະລາກອນຂອງ ສພຂ ຊຸດທີ II ແລະ ຄະນະ ສສຊ ຊຸດທີ IX ປະຈໍາເຂດເລືອກຕັ້ງຕື່ມອີກ.

ໃນຕອນທ້າຍ, ທ່ານ ສົມພັນ ແພງຄຳມີ ໄດ້ສະແດງຄວາມຍ້ອງຍໍຊົມເຊີຍ ແລະ ມີຄຳເຫັນໂດຍໄດ້ເນັ້ນໜັກໃຫ້ ຄະນະ ສສຊ ແລະ ສສຂ ຈົ່ງພ້ອມກັນເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າດ້ວຍຄວາມຮັບຜິດຊອບສູງ.

(ນາງ ຄອນສະຫວັນ ເມກສະຫວັນ)