ຊີແອວເອັມວີ ສ້າງຄວາມເຂັ້ມແຂງ ການຕິດຕາມກວດກາຂອງສະພາ
10/04/2019

(ສພຊ) ໃນຕອນເຊົ້າ ວັນທີ 9 ເມສານີ້ ທີ່ໂຮງແຮມ ຫຼວງພະບາງວິວ ນະຄອນ ຫຼວງພະບາງ ແຂວງຫຼວງພະ ບາງ ໄດ້ມີກອງປະຊຸມສໍາມະ ນາຮ່ວມ 4 ກຳມາທິການງົບ ປະມານສະພາແຫ່ງຊາດລາວ, ກຳປູເຈຍ, ມຽນມາ ແລະ ຫວຽດ ນາມ ຄັ້ງທີ 8 ພາຍໃຕ້ຫົວຂໍ້: ສ້າງຄວາມເຂັ້ມແຂງໃຫ້ແກ່ກໍາມາທິການໃນການຕິດຕາມກວດກາການຈັດຕັ້ງປະຕິບັດງົບປະມານແຫ່ງລັດ; ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ; ມີບັນດາທ່ານປະທານຮອງປະທານກໍາມາທິການແຜນການ, ການເງິນ ແລະ ການກວດສອບ, ຫົວໜ້າຄະນະຜູ້ແທນກໍາມາທິການແຜນການ, ການເງິນ ແລະ ການກວດສອບ, ຈາກສະພາແຫ່ງຊາດແຫ່ງ ລາຊະອານາຈັກກໍາປູເຈຍ, ສະຫະພາບມຽນມາ, ສສ ຫວຽດ ນາມ, ມີພາກສ່ວນກ່ຽວຂ້ອງເຂົ້າຮ່ວມ. ໃນກອງປະຊຸມ, ທ່ານປະທານສະພາແຫ່ງຊາດໄດ້ມີຄໍາເຫັນກ່າວເປີດວ່າ: ກອງປະຊຸມສໍາມະນາຮ່ວມ 4 ກໍາມາທິການງົບປະມານສະພາແຫ່ງຊາດ ກໍາປູເຈຍ, ມຽນມາ, ຫວຽດນາມ ແລະ ລາວ ແຕ່ລະຄັ້ງ ລ້ວນແຕ່ເປັນເວທີປຶກສາຫາລືທີ່ມີຄວາມໝາຍ, ຄວາມສຳຄັນຍິ່ງສໍາລັບລັດຖະສະພາຂອງບັນດາປະເທດ (Cambodia, Lao PDR, Myanmar and Vietnam) CLMV ຊຶ່ງເປັນສະມາຊິກອາຊຽນ, ພ້ອມ ທັງເຊື່ອໝັ້ນວ່າ ກອງປະຊຸມ ຄັ້ງນີ້ເປັນການສານຕໍ່ປະເພນີ ທີ່ພວກເຮົາເຄີຍໄດ້ປະຕິບັດຮ່ວມກັນຜ່ານມາ ແລະ ຖືໄດ້ວ່າເປັນອີກຂີດໝາຍສໍາຄັນອັນໜຶ່ງ ຕໍ່ຂະບວນການເຊື່ອມໂຍງປະຊາຄົມເສດຖະກິດອາຊຽນ (AEC); ວຽກງານຕິດຕາມກວດກາຂອງສະພາແຫ່ງຊາດ ແມ່ນໜຶ່ງໃນບົດບາດໜ້າທີ່ໆສຳຄັນຂອງອົງການຕົວແທນປະຊາຊົນ, ມັນບໍ່ພຽງແຕ່ເປັນເງື່ອນໄຂເພື່ອຮັບປະກັນໃຫ້ແກ່ການຕົກລົງບັນຫາພື້ນຖານສຳຄັນຂອງຊາດເທົ່ານັ້ນ, ຫາກຜົນຂອງການຕິດຕາມກວດ ກາ ຍັງເປັນບ່ອນອີງເພື່ອໃຫ້ສະພາແຫ່ງຊາດອອກຂໍ້ຕົກລົງທີ່ມີລັກສະນະສັດເຈນ ແລະປັບປຸງກົດໝາຍໃຫ້ເປັນລະບົບ ຄົບຖ້ວນດີຂຶ້ນ, ໃນນັ້ນ, ກໍາມາທິການງົບປະມານ ແມ່ນກົງຈັກ ເສນາທິການທີ່ສໍາຄັນຂອງສະພາແຫ່ງຊາດ ໃນການປະ ຕິບັດພາລະບົດບາດຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ກໍຄືມະຕິກອງປະຊຸມສະພາແຫ່ງຊາດກ່ຽວກັບແຜນພັດທະນາເສດຖະກິດສັງຄົມ ແລະ ງົບ ປະມານແຫ່ງລັດ; ໃນແຕ່ລະປະ ເທດ ອາດມີຊື່ເອີ້ນຕ່າງກັນ ແລະ ກຳມາທິການດັ່ງກ່າວມີພາລະບົດບາດຕ່າງກັນໃນບາງຈຸດ ແຕ່ອັນພື້ນຖານແລ້ວ ໜ້າທີ່ຕົ້ນຕໍຄ້າຍຄືກັນ ຊຶ່ງການຈັດຕັ້ງປະຕິ ບັດພາລະບົດບາດດັ່ງກ່າວ ໃນໄລຍະຜ່ານມາເຫັນວ່າມີຜົນສໍາເລັດຫຼາຍດ້ານ ສາມາດປະ ກອບສ່ວນໃນການພັດທະນາເສດຖະກິດສັງຄົມຂອງແຕ່ລະປະເທດ, ສາມາດຫັນວຽກງານດັ່ງກ່າວເຂົ້າສູ່ກົດໝາຍ, ຮັບປະກັນຄວາມໂປ່ງໃສ ແລະ ສາມາດກວດສອບໄດ້, ເພີ່ມທະວີການມີສ່ວນຮ່ວມຂອງປະຊາຊົນ ເຂົ້າໃນການຕິດຕາມກວດກາ, ຮັບປະກັນການບໍລິ ຫານ ແລະ ນໍາໃຊ້ງົບປະມານ ເຂົ້າໃນການພັດທະນາດ້ານຕ່າງໆ ຢ່າງມີຄຸນນະພາບ ແນ ໃສ່ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວຄຽງຄູ່ກັບຜົນສໍາເລັດດັ່ງກ່າວ, ພວກເຮົາຍັງສັງເກດເຫັນວ່າຍັງມີບາງດ້ານ ທີ່ເປັນສິ່ງທ້າທາຍໃນການ ຈັດຕັ້ງປະຕິບັດພາລະບົດບາດການຕິດຕາມກວດກາວຽກງານງົບປະມານ, ການເງິນ ແລະ ການກວດສອບ ໂດຍສະເພາະການສ້າງ, ປັບ ປຸງກົດໝາຍ ແລະ ນິຕິກໍາໃຕ້ກົດໝາຍ ໃນຂົງເຂດວຽກງານການເງິນ, ງົບປະມານ ແລະ ການກວດສອບ ຍັງບໍ່ທັນເປັນລະບົບຄົບຊຸດເທົ່າທີ່ຄວນ, ໂດຍສະເພາະກົດໝາຍ ທີ່ຕິດພັນກັບການຈັດເກັບລາຍຮັບ ແລະ ການຄຸ້ມຄອງລາຍຈ່າຍງົບປະມານ. ສະນັ້ນ, ກອງປະຊຸມໃນຄັ້ງນີ້ ຖືເປັນໂອກາດອັນດີທີ່ພວກເຮົາ ຈະໄດ້ຮ່ວມກັນຄົ້ນ ຄວ້າ, ປຶກສາຫາລື, ແລກປ່ຽນຄວາມຄິດເຫັນ, ຖອດຖອນບົດ ຮຽນ, ຊອກຫາກົນໄກ, ວິທີການ ແລະ ມາດຕະການທີ່ເໝາະສົມບົນພື້ນຖານກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ ເພື່ອຍົກສູງພາລະບົດບາດ ຂອງກໍາມາທິການງົບປະມານໃນການປະກອບສ່ວນແກ້ໄຂສິ່ງທ້າທາຍ ແລະ ຂໍ້ຄົງຄ້າງທີ່ກ່າວມານັ້ນ ໃຫ້ມີປະສິດທິພາບ ແລະ ມີປະສິດທິຜົນດີຂຶ້ນ ກວ່າເກົົ່າ. ໃນກອງປະຊຸມ, ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ ໄດ້ກ່າວວ່າ: ກອງປະຊຸມສໍາມະນາຮ່ວມ 4 ກໍາມາທິການສະພາແຫ່ງຊາດ ກໍາປູເຈຍ, ລາວ, ມຽນມາ ແລະ ຫວຽດນາມ ຈຸດ ປະສົງຕົ້ນຕໍ ແມ່ນຈະສຸມໃສ່ປຶກສາຫາລືແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນຮ່ວມກັນດັ່ງນີ້: ສິ່ງທ້າທາຍໃໝ່ຂອງກໍາມາທິການແຜນການ, ການເງິນ, ງົບປະມານ ແລະ ການກວດສອບ ຕໍ່ກັບການປະເຊີນກັບການປ່ຽນແປງໃໝ່ໃນໂລກ; ບົດຮຽນທີ່ດີຂອງອົງການກວດສອບແຫ່ງລັດ ໃນການສະໜັບສະໜູນກໍາມາທິການ; ບົດຮຽນທີ່ດີຂອງກະຊວງການເງິນໃນການສະໜັບສະໜູນກໍາມາທິການ; ທົບທວນຄືນຜົນສໍາເລັດໃນການຈັດຕັ້ງປະຕິບັດ ເນື້ອໃນກອງປະຊຸມເທື່ອທີ 7 ທີ່ຈັດຂຶ້ນຢູ່ນະຄອນຫຼວງພະນົມເປັນ ລາຊະອານາຈັກກຳປູເຈຍ ແລະ ຈະໄດ້ພ້ອມກັນກຳນົດທິດທາງແຜນການຮ່ວມມື ໃນ ຕໍ່ໜ້າຮອດປີ 2021 ໂດຍການເຊັນບົດບັນທຶກຄວາມຊ່ວຍຈຳ (MOU) ໃນທ້າຍກອງປະຊຸມ. ໃນວັນດຽວກັນ, ກ່ອນຈະເຂົ້າຮ່ວມກອງປະຊຸມສຳມະນາຄັ້ງນີ້, ບັນດາຄະນະຜູ້ແທນຂອງ 4 ປະເທດ ຍັງໄດ້ເຂົ້າຢ້ຽມຂໍ່ານັບທ່ານປະທານສະພາແຫ່ງຊາດອີກດ້ວຍ. (ຂ່າວ: ສົມນຶກ ແກ້ວໄຊຍະຈັກ)