ກອງປະຊຸມສະໄໝສາມັນເທື່ອທີ 4 ພິຈາລະນາ ແລະ ຕົກລົງຫຼາຍບັນຫາສຳຄັນຂອງຊາດ
20/10/2017

(ສພຊ) ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ (ສພຊ) ຊຸດທີ VIII ໄຂຂຶ້ນຢ່າງເປັນທາງການໃນຕອນເຊົ້າວັນຈັນ ທີ  16 ຕຸລາ 2017 ທີ່ຫ້ອງປະຊຸມສະພາແຫ່ງຊາດ (ຫລັກ 6), ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ; ມີທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ອະດີດການນຳຂັ້ນສູງຂອງພັກ-ລັດ, ບັນດານັກປະຕິວັດອາວຸໂສ, ຜູ້ຊົງຄຸນວຸດທິ, ສະມາຊິກສະພາແຫ່ງຊາດ (ສສຊ) ປະຈຳແຕ່ລະເຂດເລືອກຕັ້ງໃນທົ່ວປະເທດ, ອະດີດ ສສຊ, ຕາງໜ້າຈາກອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ ແລະ ອົງການຈັດຕັ້ງມະຫາຊົນ, ສະຖາບັນ, ນັກທຸລະກິດ, ຜູ້ຕາງໜ້າຂອງພາກສ່ວນຕ່າງໆ ແລະ ແຂກຖືກເຊີນເຂົ້າຮ່ວມ.

        ໃນວາລະດຳເນີນກອງປະຊຸມຕອນເຊົ້າ, ພາຍຫລັງທີ່ທ່ານ ນາງ ປານີ ຢາທໍ່ຕູ້ ກ່າວສູນທອນພົດໄຂກອງປະຊຸມຢ່າງເປັນທາງການ; ທ່ານ ທອງລຸນ ສີສຸລິດ ໄດ້ລາຍງານໂດຍສັງເຂບກ່ຽວກັບຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2017 ແລະ ທິດທາງແຜນການ ປະຈຳປີ 2018; ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2017 ແລະ ທິດທາງແຜນການ ປະຈໍາປີ 2018; ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ລາຍງານກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2017 ແລະ ທິດທາງແຜນການ ປະຈຳປີ 2018; ທ່ານ ສົມພາວ ໄຟສິດ ຜູ້ວ່າການທະນາຄານ ແຫ່ງ ສປປລາວ ລາຍງານການຈັດຕັ້ງປະຕິບັດແຜນເງິນຕາ ແລະທິດທາງແຜນການ ປະຈຳປີ 2018; ທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ລາຍງານການຈັດຕັ້ງປະຕິບັດແຜນການເຄື່ອນ ໄຫວວຽກງານ ປະຈຳປີ 2017 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2018 ຂອງອົງການກວດສອບແຫ່ງລັດ ແລະ ບົດລາຍງານກ່ຽວກັບຜົນການກວດສອບບົດສະຫລຸບຂາດຕົວ ການ ຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016; ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ ລາຍງານຜົນການກວດກາ ຕາມຜົນການກວດສອບການຈັດຕັ້ງປະຕິບັດ ແຜນງົບປະມານແຫ່ງລັດ ສົກປີ 2013-2014 ແລະ ສົກປີ 2014-2015.

ທ່ານ ບຸນປອນ ສີສຸລາດ  ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ ຕາງໜ້າ ຄປຈສພຊ ມີຄຳເຫັນຕໍ່ບັນດາບົດລາຍງານຂອງລັດຖະ ບານ. ຫລັງຈາກນັ້ນ, ປະທານກອງປະຊຸມມີຄໍາເຫັນເຈາະຈີ້ມ ແລະ ໃຫ້ທິດຊີ້ນໍາໃນການປະກອບຄໍາເຫັນຕໍ່ບົດລາຍງານຂອງລັດຖະບານ.

        ກອງປະຊຸມສະໄໝສາມັນເທື່ອທີ 4 ຂອງ ສພຊ ຊຸດທີ VIII ຈະໄດ້ດຳເນີນໄປເຖິງວັນທີ 17 ພະຈິກ 2017 ໂດຍຈະສຸມໃສ່ຮັບຟັງການລາຍງານ, ພິຈາລະນາ, ຮັບຮອງ ແລະຕົກລົງບັນຫາສຳຄັນຕ່າງໆ ຂອງບັນດາອົງການອຳນາດລັດ ເຊິ່ງປະກອບມີວຽກງານລັດຖະບານ, ສະພາແຫ່ງຊາດ, ອົງການກວດກາລັດຖະບານ, ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ, ພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ ໃນຂົງເຂດເສດຖະກິດ-ສັງຄົມ ແລະ ຂົງເຂດປົກປ້ອງກົດໝາຍ ຈຳນວນ 16 ສະບັບ; ນອກຈາກນັ້ນ, ກອງປະຊຸມຍັງຈະໄດ້ຮັບຟັງການຊີ້ແຈງອະທິບາຍກ່ຽວກັບການປັບປຸງການບໍລິຫານລັດໃນທຸກຂັ້ນ ກໍຄືການຄຸ້ມຄອງແຮງງານລາວ ຢູ່ພາຍໃນ ແລະ ຕ່າງປະເທດ ຂອງລັັດຖະບານ, ຮັບຟັງການລາຍງານຜົນການຕິດຕາມກວດກາ ຂອງສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ກັບການປະຕິບັດໜ້າທີ່ຂອງສະພາແຫ່ງຊາດ ກໍຄືສັງລວມຂໍ້ສະເໜີຂອງຜູ້ມີສິດປ່ອນບັດເລືອກຕັ້ງ ແລະ ຂອງປະຊາຊົນຕໍ່ກັບອົງການບໍລິຫານລັດ.