ປະທານສະພາແຫ່ງຊາດ ຢ້ຽມຢາມຜູ້ປະສົບໄພ ຢູ່ແຂວງອັດຕະປື
05/04/2019

(ສພຊ) ວັນທີ 30 ມີນາ 2019 ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍຄະນະ ໄດ້ສົບທົບກັບທ່ານ ເພັດແກ້ວ ເຮືອງປັນຍາ ປະທານຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 17 ​ແຂວງອັດຕະປື ທັງເປັນປະທານສະພາປະຊາຊົນແຂວງ (ສພຂ) ອັດຕະປື, ທ່ານ ເລັດ ໄຊຍະພອນ ເລຂາພັກແຂວງ ເຈົ້າແຂວງໆອັດຕະປື, ມີຮອງເຈົ້າແຂວງ, ສະມາຊິກສະພາປະຊາຊົນແຂວງ (ສສຂ), ຄະນະເລຂາທິການ ສພຂ ອັດຕະປື ແລະ ພະນັກງານທີ່ກ່ຽວຂ້ອງ ໄດ້ຢ້ຽມຢາມສູນຕະມໍ່ຢອດ-ຫີນລາດ ແລະ ສູນດົງບາກ ເມືອງສະໜາມໄຊ ເຊິ່ງເປັນສູນພັກຊົ່ວຄາວ ຈາກເຫດການຄູກັ້ນນໍ້າເຂື່ອນເຊປຽນ-ເຊນໍ້ານ້ອຍແຕກ ໃນວັນທີ 23 ກໍລະກົດ 2018 ຜ່ານມາ.

ຢູ່ສູນດົງບາກ, ທ່ານ ອຸນຫລ້າ ໄຊຍະສິດ ຮອງເລຂາພັກແຂວງ ຮອງເຈົ້າແຂວງໆອັດຕະປື ໄດ້ລາຍງານວ່າ: ຄູກັ້ນນໍ້າເຂື່ອນເຊປຽນ-ເຊນໍ້ານ້ອຍແຕກ ໃນຕອນແລງວັນທີ 23 ກໍລະກົດ 2018 ຜ່ານມມາ, ໄດ້ເປັນເຫດໃຫ້ເກີດ ໄພພິບັດອັນຮ້າຍແຮງ, ມວນນໍ້າມະຫາສານ 5 ລ້ານກວ່າແມັດກ້ອນ ໄດ້ຖອກເທລົງຕາມລ່ອງນໍ້າເຊປຽນ ເຮັດໃຫ້ຊີວິດ, ຊັບສິນ, ເຮືອນຊານ, ໄຮ່ນາ-ຮົ້ວສວນ ຕະຫລອດຮອດສັດລ້ຽງຂອງປະຊາຊົນ, ພື້ນຖານໂຄງລ່າງ ແລະ ລະບົບນິເວດສິ່ງແວດລ້ອມທໍາມະຊາດ ໃນຂອບເຂດ 19 ບ້ານ ໄດ້ຮັບຜົນກະທົບ; ໃນນັ້ນ, ໜັກກວ່າໝູ່ແມ່ນ 5 ບ້ານ ແລະ 1 ກຸ່ມບ້ານໃຫຍ່ ລວມມີ 4.425 ຄອບຄົວ, ພົນລະເມືອງ 18.754 ຄົນ, ຍິງ 9.347 ຄົນ; ກະທົບໜັກ ມີ 882 ຄອບຄົວ, ພົນລະເມືອງ 3.188 ຄົນ, ຍິງ 1.742 ຄົນ;  ມີຜູ້ເສຍຊີວິດ ແລະ ສູນຫາຍທັງໝົດ 71 ຄົນ.  ໃນການແກ້ໄຂຜົນກະທົບ ແມ່ນໄດ້ຊົດເຊີຍປົວແປງຈິດໃຈຄອບຄົວຍາດພິີ່ນ້ອງຜູ້ເສຍຊີວິດ ຈໍານວນ 71 ຄອບ​ຄົວ ມູນຄ່າ 710.000 ໂດລາ; ໄດ້ສົ່ງຂໍ້ມູນຜົນເສຍຫາຍໃຫ້ບໍລິສັດສ້າງເຂື່ອນ ເພື່ອຮຽກຮ້ອງຄ່າຊົດເຊີຍ.  ທ່ານຮອງເຈົ້າແຂວງຍັງໄດ້ສະເໜີຕໍ່ຂັ້ນເທິງ ຂໍທຶນຮອນສ້ອມແປງໂຮງຮຽນປະຖົມ, ກໍ່ສ້າງນໍ້າປະປາ ແລະ ສະເໜີໃຫ້ທະນາຄານນະໂຍບາຍ ປ່ອຍເງິນສິນເຊື່ອໃຫ້ບ້ານຕາມຄວາມເໝາະສົມ.

ຢູ່ສູນຕະມໍ່ຢອດ-ຫີນລາດ, ທ່ານ ສໍາລານ ພອຍພານິກ ຮອງນາຍບ້ານໆຫີນລາດ ທັງເປັນຫົວໜ້າສູນຕະມໍ໋ຢອດ ໄດ້ລາຍງານສະພາບລວມຂອງສູນ ເຊິ່ງສູນພັກຊົ່ວຄາວ ຕະມໍ່ຢອດ-ຫີນລາດ ແມ່ນມີ 2 ບ້ານທີ່ຂຶ້ນກັບຄື: ​ບ້ານຫີນລາດ ແລະ ບ້ານຕະມໍ່ຢອດ, ມີຜູ້ຫລົບໄພ 701 ຄົນ ຍິງ 368 ຄົນ, ມີທັງໝົດ 176 ຄອບຄົວ, ຄອບຄົວທຸກຍາກ 4 ຄອບຄົວ, ກໍາພ້າ 4 ຄົນ ຍິງ 3, ກໍາພອຍ ອາຍຸ 5 ​ປີ 3 ຄົນ; ສູນພັກຊົ່ວຄາວແຫ່ງນີ້ ສ້າງເປັນເຮືອນເຫລັກໃຫ້ແຕ່ລະຄອບຄົວ ເຊິ່ງໄດ້ຈັດສັນປະຊາຊົນຂຶ້ນຢູ່ເປັນແຕ່ລະໄລຍະ ແລະ ສໍາເລັດໝົດທຸກຄອບຄົວໃນວັນທີ 25 ມັງກອນ 2019; ທ່ານຫົວໜ້າສູນໄດ້ສະເໜີຂໍຄອມພິວເຕີ 1 ຊຸດ ເພື່ອນໍາໃຊ້ເຂົ້າໃນວຽກງານບໍລິຫານ, ສະເໜີໃຫ້ມີການຊົດເຊີຍຍານພາຫະນະ ທີ່ໄດ້ຮັບຄວາມເສຍຫາຍ ແລະ ສະໜອງເນື້ອທີ່ການຜະລິດໃຫ້ປະຊາຊົນໃຫ້ທັນລະດູການທີ່ຈະມາເຖິງ.

ທ່ານປະທານສະພາແຫ່ງຊາດ ໄດ້ມີຄໍາເຫັນໂອ້ລົມປະຊາຊົນ ເຊິ່ງທ່ານໄດ້ສະແດງຄວາມຊົມເຊີຍທີ່ພໍ່ແມ່ປະຊາຊົນໄດ້ເຊື່ອໝັ້ນຕໍ່ການຊີ້ນໍາ-ນຳພາ ຂອງພັກ-ລັດ ແລະ ໃຫ້ສືບຕໍ່ຜ່ານຜ່າຄວາມຫຍຸ້ງຍາກໃຫ້ໄດ້, ທ່ານໄດ້ສະ ເໜີໃຫ້ອໍານາດການປົກຄອງຂອງແຂວງ-ເມືອງ ກໍຄືຄະນະຮັບຜິດຊອບ ໃຫ້ອະທິບາຍຕໍ່ພໍ່ແມ່ປະຊາຊົນຢ່າງລະອຽດຈະແຈ້ງ ກ່ຽວກັບບັນດານະໂຍບາຍຕ່າງໆ ເຊັ່ນ:​ ກ່ຽວກັບທີ່ດິນປູກຝັງ ໃຫ້ອອກສິດນໍາໃຊ້ໃຫ້ປະຊາຊົນແຕ່ລະຄອບຄົວໂລດ ເພື່ອໃຫ້ເຂົາເຈົ້າມີກໍາລັງໃຈໃນການທໍາການຜະລິດ; ວຽກບາງອັນທີ່ບໍ່ໃຫຍ່ກໍໃຫ້ອໍານາດການປົກຄອງບ້ານຮ່ວມກັບປະຊາຊົນເຮັດໂລດ ເປັນຕົ້ນການອະນາໄມວັດບ້ານຫີນລາດ; ສ່ວນບັນຫາອື່ນທີ່ຍັງຄົງຄ້າງ ແມ່ນຈະນໍາໄປສະເໜີຕໍ່ພາກສ່ວນທີ່ກ່ຽວຂ້ອງເພື່ອພິຈາລະນາແກ້ໄຂຕາມຄວາມເໝາະສົມ.

ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ມອບເງິນຈໍານວນ 4 ລ້ານກີບ ທີ່ໄດ້ມາຈາກການ ອຸປະຖໍາຂອງບໍລິສັດ ໄໝຄໍາ ມອບໃຫ້ຄະນະສູນຕະມໍ່ຢອດ ເມືອງສະໜາມໄຊ ເພື່ອນໍາໄປຊື້ຄອມພິວເຕີ 1 ຊຸດ ມານໍາໃຊ້ເຂົ້າໃນວຽກງານບໍລິຫານຂອງສູນດັ່ງກ່າວ.

 

(ບຸນເກີດ ວົງໄຊຍາ)