ປະທານສະພາແຫ່ງຊາດ ເຄື່ອນໄຫວຢູ່ເມືອງລະມານ ແຂວງ ເຊກອງ
02/04/2019

(ສພຊ) ວັນທີ 28 ມີນາ 2019, ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາຢູ່ເມືອງລະມາມ ແຂວງເຊກອງ;​ ເຂົ້າຮ່ວມມີທ່ານ ວິໄລວົງ ບຸດດາຄໍາ ປະທານກໍາມາທິການແຜນການ ການເງິນ ແລະ ການກວດສອບ ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 16 ແຂວງເຊກອງ, ມີທ່ານ ພອນເພັດ ຄິວລາວົງ ປະທານຄະນະ ສສຊ ປະຈໍາເຂດເລືອກຕັ້ງ ທັງເປັນປະທານສະພາປະຊາຊົນແຂວງ (ສພຂ) ເຊກອງ, ບັນດາຮອງປະທານກໍາມາທິການ, ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ, ຫົວໜ້າກົມ, ຮອງຫົວໜ້າກົມ, ເລຂາ-ຮອງເລຂາທິການ ສພຂ, ສະມາຊິກສະພາປະຊາຊົນແຂວງ (ສສຂ), ເຈົ້າເມືອງ, ຕາງໜ້າບັນດາພະແນກການຂອງເມືອງ ຕະຫລອດຮອດພະນັກງານທີ່ກ່ຽວຂ້ອງເຂົ້າຮ່ວມ.

 ໃນໂອກາດນີ້, ທ່ານ ຂັນຕີ ສີລະວົງສາ ເຈົ້າເມືອງໆລະມາມ ໄດ້ລາຍງານສະພາບຈຸດພິເສດ ແລະ ການພັດທະນາເສດຖະກິດ-ສັງຄົມຂອງເມືອງ; ເມືອງລະມາມແມ່ນເມືອງເທສະບານແຂວງ ເປັນເມືອງສູນກາງທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ແລະ ດ້ານປ້ອງກັນຊາດ-ປ້ອງກັນຄວາມສະຫງົບ, ປະກອບມີ 7.888 ຄອບຄົວ, ມີພົນລະເມືອງ 31.850 ຄົນ,​ ຍິງ 18.823 ຄົນ, ​ມີ 10 ຊົນເຜົ່າ ທີ່ມີຮີດຄອງປະເພນີ-ວັດທະນະທໍາ ແລະ ການດໍາລົງຊີວິດທີ່ເປັນເອກະລັກແຕກຕ່າງກັນ;  ໃນໄລຍະໜຶ່ງປີຜ່ານມາ, ອັດຕາການຂະຫຍາຍຕົວແມ່ນເພີ່ມຂຶ້ນ 10,14%, ລວມຍອດຜະລິດຕະພັນພາຍໃນ 466,20 ຕື້ກີບ,​ ລາຍໄດ້ຕໍ່ຫົວຄົນບັນລຸໄດ້ 12,08 ລ້ານກີບ ຫລື ເທົ່າກັບ 1.510 ໂດລາສະຫະລັດຕໍ່ຄົນຕໍ່ປີ; ໃນນັ້ນ, ຂະແໜງກະສິກໍາ ເພີ່ມຂຶ້ນ 9,97%, ຂະແໜງອຸດສະຫະກໍາ ເພີ່ມຂຶ້ນ 12,08% ແລະ ຂະແໜງການບໍລິການ ເພີ່ມຂຶ້ນ 9,87%;  ປັດຈຸບັນ ທົ່ວເມືອງມີບ້ານພດທະນາທັງໝົດ 28 ບ້ານ ເທົ່າກັບ 65,11%, ມີຄອບຄົວພັດທະນາ 5.283 ຄອບຄົວ ເທົ່າກັບ 74,12%; ທາງເມືອງໄດ້ສຸມໃສ່ປັບປຸງ ແລະ ກໍ່ສ້າງພື້ນຖານໂຄງລ່າງຊົນນະບົດ ເປັນຕົ້ນແມ່ນຫົນທາງ, ໄດ້ຂະຫຍາຍລະບົບຊົນລະປະທານໄດ້ 17 ແຫ່ງ ເຊິ່ງສາມາດສະໜອງນໍ້າໃຫ້ເນື້ອທີ່ການຜະລິດກະສິກໍາໄດ້ 2.673 ເຮັກຕາ.  ຂະບວນການຜະລິດສິນຄ້າຂອງປະຊາຊົນໄດ້ເກີດມີໜໍ່ແໜງ ແລະ ມີຫລາຍຄອບຄົວໄດ້ກາຍເປັນຕົວແບບ, ໄດ້ມີການຕັ້ງກຸ່ມການຜະລິດສິນຄ້າຢູ່ 6 ບ້ານທົດລອງສາມສ້າງ ແລະ ໜຶ່ງບ້ານຈຸດສຸມຂອງລັດຖະບານ.

ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ອໍານາດການປົກຄອງເມືອງລະມາມ ເຊິ່ງທ່ານໄດ້ເນັ້ນໃຫ້ເອົາໃຈໃສ່ວຽກງານກໍ່ສ້າງຊັບພະຍາກອນມະນຸດ ເພື່ອຮອງຮັບການພັດທະນາເສດຖະກິດ-ສັງຄົມ; ໃຫ້ເອົາໃຈໃສ່ວຽກງານສາທາລະນະສຸກ ການເບິ່ງແຍງສຸຂະພາບຂອງປະຊາຊົນ, ການສ້າງນາງພະຍາບານໃຫ້ພຽງພໍ; ວຽກງານສຶກສາໃຫ້ເບິ່ງຄືນໃໝ່ໃນການວາງແຜນ ຕ້ອງເລີ່ມຈາກຄວາມຕ້ອງການຂອງຮາກຖານຂຶ້ນມາ; ສ່ວນທາງດ້ານຊັບພະຍາກອນທີ່ດິນນັ້ນ ຕ້ອງມີການຈັດສັນທີ່ດີ ເພື່ອດຶງດູດ ແລະ ອໍານວຍຄວາມສະດວກແກ່ການລົງທຶນ, ຕ້ອງວາງແຜນການພັດທະນາທີ່ດິນໃນ 5 ປີຕໍ່ໜ້າ ໃຫ້ສາມາດກໍານົດວ່າບ່ອນໃດເປັນບ່ອນລ້ຽງສັດ, ປູກຝັງ, ທ່ອງທ່ຽວ ແລະ ອື່ນໆ ເພື່ອດຶງດູດນັກລົງທຶນ; ດ້ານການຄຸ້ມຄອງບໍລິຫານລັດຕາມກົດໝາຍ ໃຫ້ເຊື່ອມຊຶມບັນດາກົດ  ໝາຍ ໂດຍສະເພາະກົດໝາຍວ່າດ້ວຍການລົງທຶນ, ແກ້ໄຂບັນດາສິ່ງກີດຂວາງຕ່າງໆຕໍ່ການລົງທຶນ ແລະ ອື່ນໆ.

ຈາກນັ້ນ, ທ່ານປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ຢ້ຽມຢາມບ້ານແກ້ງຫລວງ ເມືອງລະມາມ, ເຊິ່ງພາຍຫລັງໄດ້ຮັບຟັງການລາຍງານສະພາບໂດຍລວມຂອງບ້ານຈາກນາຍບ້ານໆແກ້ງຫລວງ ແລະ ທ່ານປະທານສະພາແຫ່ງຊາດ ໄດ້ມີຄໍາເຫັນໂອລົມປະຊາຊົນ ເຊິ່ງໄດ້ເນັ້ນໃຫ້ຮັກສາສຸຂະພາບ ດໍາລົງຊີດວິດໃຫ້ມີຫລັກອະນາໄມ, ຊຸກຍູ້ໃຫ້ລູກຫລານເຂົ້າເຖິງການສຶກສາ, ສົ່ງເສີມການຜະລິດຫັດຖະກໍາເປັນສິນຄ້າ, ເສີມຂະຫຍາຍທ່າແຮງການປູກຝັງລ້ຽງສັດເທິງທີ່ດິນທີ່ອຸດົມສົມບູນ ໂດຍມີການຈັດສັນທີ່ດິນທີ່ດີ,​ ຊ່ວຍເຫລືອຄອບຄົວທີ່ຍັງທຸກຍາກໃຫ້ພົ້ນທຸກໂດຍໄວ ໂດຍອີງໃສ່ທ່າແຮງຂອງແຕ່ລະຄອບຄົວ.

(ບຸນເກີດ ວົງໄຊຍາ)