ສພຊ ສະຫລຸບການສ້າງຮາກຖານພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2018 ແລະ ທິດທາງແຜນການເຄື່ອນໄຫວ ປະຈຳປີ 2019
26/03/2019

(ສພຊ) ສະພາ​ແຫ່ງ​ຊາດ (ສພຊ) ​ໄດ້​ສະຫລຸບການ​ສ້າງ​ຮາກ​ຖານ​ພັກ​ປອດໃສ, ​ເຂັ້ມ​ແຂງ, ໜັກ​ແໜ້ນ ປະຈຳ​ປີ 2018 ​ແລະ ວາງທິດ​ທາງ​ແຜນການ​ເຄື່ອນ​ໄຫວ ປະຈຳ​ປີ 2019 ​ ຂຶ້ນ​ໃນ​ວັນ​ທີ 25 ມີນາ 2019 ທີ່​ສະ​ພາ​ແຫ່ງ​ຊາດ (ຫລັກ 6) ນະຄອນຫລວງວຽງຈັນ, ​​ໂດຍ​ການ​ເປັນ​ປະທານ​ຂອງ​ສະຫາຍ ​ແສງ​ນວນ ​ໄຊ​ຍະ​ລາດ ​​ເລຂາທິການ​ສູນ​ກາງ​ພັກ, ​ເລຂາ​ຄະນະ​ບໍລິຫານ​ພັກ​ສະພາ​ແຫ່ງ​ຊາດ, ຮອງ​ປະທານ​ສະພາ​ແຫ່ງ​ຊາດ;​ ​ເຂົ້າ​ຮ່ວມ​ມີ​ບັນ​ດາ​ສະຫາຍ​ເລຂາ, ຮອງ​ເລຂາ, ກຳມະການຄະນະ​ພັກ​ຮາກ​ຖານ, ໜ່ວຍພັກ​ຮາກ​ຖານ ​ແລະ ໜ່ວຍພັກ​ທີ່​ຂຶ້ນກັບ​ຄະນະ​ພັກ​ຮາກ​ຖານ ທັງໜົດ 79 ສະຫາຍ ຍິງ 27 ສະຫາຍ.

ຈຸດປະສົງຂອງ​ການ​ຈັດ​ກອງ​ປະຊຸມ​ຄັ້ງ​ນີ້ ​ເພື່ອ​ເພີ່ມ​ຄວາມ​ຮັບ​ຮູ້​ກ່ຽວກັບ​ການ​ຍົກ​ສູງ​ຄຸນ​ນະພາ​ບ ສະມາຊິກ​ພັກ, ການ​ຈັດ​ຕັ້ງ​ພັກ​ໃຫ້​ປອດ​ໃສ ​ເຂັ້ມ​ແຂງ ໜັກ​ແໜ້ນ, ການ​ຕີ​ລາຄາ​ຄຸນ​ນະພາ​ບ, ​ແບ່ງ​ປະ​ເພ​ດສະມາຊິກ​ພັກ ​ແລະ ໜ່ວຍພັກ; ວຽກງານ​ປ້ອງ​ກັນ​ພັກ-ພະນັກງານ ​ແລະ ຄວາມ​ຮູ້​ພື້ນຖານ​ກ່ຽວກັບ​ວຽກງານ​ກວດກາ​ພັກ ​ແລະ ກວດກາ​ລັດ ​ໃຫ້​​ແກ່​ເລຂາ, ຮອງ​ເລຂາ ​ແລະ ຄະນະ​ຮາກ​ຖານ​ພັກ ​ແລະ ຜູ້​ຊ່ວຍ​ວຽກຂອງ​ຮາກ​ຖານ​ພັກ; ປັບປຸງ​ແບບ​ແຜນການ​ເປັນ​ເສນາ​ທິການ​ໂດຍ​ກົງ​ຮອບ​ດ້ານ​ຂອງ​ຮາກ​ຖານ​ພັກ ​ໃຫ້ມີ​ຄຸນ​ນະພາ​ບສູງ​ຂຶ້ນ, ເພື່ອຈັດ​ຕັ້ງ​ປະຕິບັດໃຫ້​ຖືກຕ້ອງ​ຕາມ​ກົດ​ລະບຽບພັກ ​ແລະ ​ເປັນ​ເອກະ​ພາບ​ພາຍ​ໃນ​ອົງການ​ຄະນະ​ພັກ​ສະພາ​ແຫ່ງ​ຊາດ; ຍົກ​ສູງ​ພາລະ​ບົດບາດ​ການ​ຕິດຕາມ​ກວດກາ​ຂອງ​ພັກ ​ເຮັດ​ໃຫ້ການ​ຈັດ​ຕັ້ງ​ພັກ, ສະມາຊິກ​ພັກ ມີ​ສະຕິ​ລະວັງ​ຕົວ, ຮູ້​ເຮັ​ດວຽກງານ​ປ້ອງ​ກັນ​ພັກ-ພະນັກງານ, ຮູ້​ສະກັດ​ກັ້ນ ​ແລະ ​ແກ້​ໄຂ​ປະກົດ​ການ​ຫຍໍ້​ທໍ້​ຕ່າງໆ ທີ່​ເກີດ​ກັບ​ສະມາ​ຊິກພັກ-ພະນັກງານ ​ແລະ ລັດຖະກອນ ພາຍ​ໃນ​ສະພາ​ແຫ່ງ​ຊາດ.

ກອງ​ປະຊຸ​ມ​ໄດ້​ຮັບ​ຟັງ​ບົດ​ສະຫລຸບ​ການ​ສ້າງ​ຮາກ​ຖານ​ພັກ​ປ​​ອດ​ໃສ, ​ເຂັ້ມ​ແຂງ, ໜັກ​ແໜ້ນ ປະຈຳ​ປີ 2018 ​ແລະ ທິດທາງ​ແຜນການ​ເຄື່ອນ​ໄຫວ ປະຈຳ​ປີ 2019 ຈາກ​ສະຫາຍ ສົມ​ພູ ດວງ​ສະຫວັນ ຄະນະ​ປະຈຳ​ພັກ, ​ເລຂາໜ່ວຍພັກ​ຮາກ​ຖານ​ກຳມາ​ທິການ​ວັດທະນະທຳ-ສັງຄົມ​ສະພາ​ແຫ່ງ​ຊາດ; ຮັບ​ຟັງ​ການ​ຜ່ານ​ມະຕິ​ຂອງ​ຄະນະ​ບໍລິຫານ​ງານ​ພັກ​ສະພາ​ແຫ່ງ​ຊາດ ສະບັບ​ເລກທີ 02/ຄພ.ສພຊ, ລົງ​ວັນ​ທີ 19 ມີນາ 2019 ວ່າ​ດ້ວຍ​ການ​ຮັບຮອງ​ປະ​ເພດໜ່ວຍພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ; ຈາກ​ສະຫາຍ ​ສຸບັນ ສະວະ​ບຸດ ກຳມະການ​ຄະນະ​ບໍລິຫານ​ງານ​ພັກ​ສະພາ​ແຫ່ງ​ຊາດ, ​ເລຂາ​ຄະນະ​ພັກ​ຮາກ​ຖານ​ຄະນະ​ເລຂາທິການ​ສະ​ພາ​ແຫ່ງ​ຊາດ.  ກອງປະຊຸມຍັງໄດ້​ມີ​ພິທີ​ມອບ-ຮັບ​ໃບ​ຢັ້ງຢືນ  ​ແລ​ະ ຕາງໜ້າຮາກ​ຖານ​ພັກຂຶ້ນຈັບ​ມື​ແຂ່ງຂັນ  ​ແລະ ກ່າວ​ຄຳ​ປະຕິຍານ​ຕໍ່ກອງ​ປະຊຸມ ​ເພື່ອ​ສືບຕໍ່​ແຂ່ງຂັນ​ໃນ​ປີ 2019.

ໄຊໂສພາພອນ ມິ່ງມຸງຄຸນ