ຄະນະຜູ້ແທ່ນສະມາຄົມປະຊາຊົນຈີນ ຢ້ຽມຂຳນັບຮອງປະທານ ສພຊ
13/03/2019

(ສພຊ) ຕອນ​ບ່າຍ​ທີ 11 ມີນາ 2019 ທີ່​ຫ້ອງ​ຮັບ​ແຂກ​ສະພາ​ແຫ່ງ​ຊາດ (ສພຊ), ທ່ານ ສົມ​ພັນ ​ແພງ​ຄຳ​ມີ ກຳມະການສູນກາງພັກ, ຮອງ​ປະທານ​ສະພາ​ແຫ່ງ​ຊາດ ທັງເປັນປະທານ​ຄະນະ​ມິດຕະພາບ ​ແລະ​ ສາມັກ​ຄີ​ລາວ ​ໄດ້​ຕ້ອນຮັບ​ການ​​ຢ້ຽມຂ່ຳນັບ​ຂອງ​ຄະນະ​ຜູ້​ແທນ​ສະມາຄົມ​ປະຊາຊົນ​ຈີນ ​ເພື່ອ​ສັນຕິພາບ ​ແລະ ຫລຸດຜ່ອນ​ການ​ທະຫານ ນຳ​ໂດຍ​ທ່ານ ອານ ​ເຢ້ຈູ​ນ ​ເລຂາທິການ​ສະມາຄົມ​ປະຊາຊົນ​ຈີນ ​ເພື່ອ​ສັນຕິພາບ ​ແລະ ຫລຸດຜ່ອນ​ທາງ​ການ​ທະຫານ ​ໃນ​ໂອກາດ​ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປລາວ ລະຫວ່າງ​ວັນ​ທີ 9-12 ມີນາ 2019 ນີ້.

          ​ໂອກາດ​ນີ້, ທ່ານ ອານ ​ເຢ້ຈູ​ນ ​ໄດ້​ສະ​ແດງ​ຄວາມ​ຂອບ​ໃຈ​ຕໍ່ການ​ຕ້ອນຮັບ​ອັນ​ອົບ​ອຸ່ນ ​ແລະ ຕີ​ລາຄາ​ສູງ​ຕໍ່​ສາຍ​ພົວພັນ​ຮ່ວມ​ມື​ລະຫວ່າງ​ສອງ​ພັກ​, ສອງ​ລັດ ​ແລະ ປະຊາຊົນ​ສອງ​ປະ​ເທດ ພ້ອມ​ທັງ​ລາຍ​ງານການ​ເຄື່ອນ​ໄຫວ​ຢ້ຽມຢາມ​ ​ແລະ ​ເຮັດ​ວຽກ​ໃນ​ຄັ້ງ​ນີ້ ​ເຊິ່ງທ່ານ​ໄດ້​ໃຫ້​ຮູ້​ວ່າ: ສະມາ​ຄົມ​ປະຊາຊົນ​ຈີນ ​ເພື່ອ​ສັນຕິພາບ ​ແລະ ຫລຸດຜ່ອນ​ທາງ​ການ​ທະຫານ ​​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ປີ 2017 ​ແລະ ​ໃນ​ປີ 2018 ກໍ​ໄດ້​ຈັດ​ງານ​ສັບປະດາ​ສັນຕິພາບ​ໂລກ​ຂຶ້ນ ​ເຊິ່​ງມີ​ຜູ້​ຕາງ​ໜ້າ​ຈາກ 50 ປະ​ເທດ​ໃນ​ພາກ​ພື້ນ​ເຂົ້າ​ຮ່ວມ ​ໂດຍ​ມີ​ການ​ນຳ, ​ແຂກ​ທີ່​ມີ​ກຽດ ​ລວມ​ໄປ​ເຖິງ​ຜູ້ຕາງໜ້າ​ສະມາຄົມຈາກສະມາຄົມສະ​ພັນ​ມິດຕະພາບ​ຕ່າງໆຈາກ​ທົ່ວ​ໂລກ​ຫລາຍ​ກວ່າ 150 ຄົນ​ເຂົ້າ​ຮ່ວມ  ​ເຊິ​່ງສະມາຄົມ​ໄດ້​ອອກ​ເຫື່ອ​ເທ​ແຮງໂຄສະນາການປົກ​ປ້ອງ​ສັນຕິ​ພາບ​ໃນ​ທົ່ວ​ໂລກຢ່າງ​ສຸດ​ຄວາມ​ສາມາດ ແລະ ​ໃນ​ເດືອ​ນມິຖຸນາ ປີ 2018 ທີ່​ປັກ​​ກິ່​ງ ​ກໍ​ໄດ້​ຖື​ເອົາ​ຄວາມ​ພ້​ອມຄວາມ​ປອດ​ໄພ​ຂອງ​ອາຊີ​ປາຊີ​ຟິກ​ເປັນ​ຫົວ​ຂໍ້​ສຳຄັນ​ໃນ​ການ​ຈັດ​ກອງ​ປະຊຸມ​ວິຊາ​ການ​ຂຶ້ນ ​ເຊິ່ງຄາດ​ວ່າ​ໃນ​ປີ​ນີ້​ກໍ​ຈະ​ໄດ້​ມີ​ການ​ຈັດ​ກອງ​ປະຊຸມ​ວິ​ຊາ​ການ​ຄັ້ງ​ທີ 2 ວ່າ​ດ້ວຍ​ສະພາບຄວາມ​ປອດ​ໄພ​ລະຫວ່າງປະ​ເທດ​ຂຶ້ນ ​ເຊິ່ງຕົ້ນຕໍ​ກໍ​ແມ່ນ​ເວົ້າ​​ໃນ​ກອບການ​ປຶກສາ​ຫາລື​ຮ່ວມ​ມືການ​ຮັກ​ສາ​ຄວາມ​ປອດ​ໄພຂອງ​ພາກ​ພຶ້ນ ​ແລະ ສາກົນ ​ແລະ ​ໃນ​ທ້າຍ​ປີ​ນີ້ກໍ​ຈະ​ໄດ້​ມີ​ການ​ຈັດ​ກອງ​ປະຊຸມວິຊາ​ການ​ວ່າ​ດ້ວຍ​ຄວາມ​ປອດ​ໄພ​ລະຫວ່າງ​ຈີນ ​ແລະ ອາ​ເມ​ລິ​ກາ ​ໂດຍ​ສະ​ເພາະ​ແມ່ນ​ສະພາບ​ການ​ຕ່າງໆທີ່​ເກີດ​ຂຶ້ນ ລະຫວ່າງ​ຈີນ ​ແລະ ອາ​ເມ​ລິ​ກາ ​ເພື່ອ​ຮັກສາ​ຄວາມ​ປອດ​ໄພ ​ແລະ ຄວາມ​ສະຫງົບ; ພ້ອມ​ນັ້ນ, ທ່ານ​ຍັງ​ໄດ້​ເຊື້ອ​ເຊີນ​ໃຫ້​ຄະນະ​ມິດຕະພາບ ​ແລະ ສາມັກຄີ​ລາວ​ເຂົ້າ​ຮ່ວມ​ແລກປ່ຽນບົດຮຽນຢູ່​ທີ ສປຈີນ ອີກ​ດ້ວຍ.

          ​ໂອກາດ​ດຽວກັນ​ນີ້, ທ່ານ ສົມ​ພັນ​ ​ແພງ​ຄຳ​ມີ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ ​ພ້ອມ​ທັງຕີ​ລາຄາ​ສູງ​ຕໍ່​ການ​ມາ​ຢ້ຽມຢາມ​ຂອງ​ຄະນະ​ຜູ້​ແທນ​ຈີນ​ໃນ​ຄັ້ງ​ນີ້ ​ແລະ ສະ​ແດງ​ຄວາມ​ຊົມ​ເຊີຍ​ຕໍ່​ສາຍ​ພົວພັນ​ມິດຕະພາບ​ລາວ-ຈີນ ທີ່​ໄດ້​ປະກອບສ່ວນ​ຢ່າງ​ຕັ້ງໜ້າ​ໃນ​ການ​ເສີມ​ສ້າງສັນ​ຕິ​ພາບ​ໃນ​ພາກ​ພື້ນ ​ແລະ ​ໃນ​ໂລກ; ພ້ອມ​ນັ້ນ, ຍັງ​ໄດ້​ຕີ​ລາຄາ​ສູງ​ຕໍ່​ສາຍ​ພົວພັນ​ມິດຕະພາບ, ຄວາມ​ສາມັກຄີ​ອັນ​​​ເປັນ​ມູນ​ເຊື້ອ ​ແລະ ການ​ຮ່ວມ​ມື​ແບບ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ, ໝັ້ນຄົງ​ຍາວ​ນານ​ຂອງ​ສອງ​ພັກ, ສອງ​ລັດ ​ແລະ ຊາ​ຊົນ​ສອງ​ຊາດລາວ-ຈີນ​ ໃຫ້ນັບ​ມື້​ໄດ້​ຮັບ​ການ​ເສີມ​ຂະຫຍາຍ​ເຂົ້າ​ສູ່​ລວງ​ເລິກ ​ແລະ ​ເກີດ​ດອກ​ອອກ​ຜົນ​ຢ່າງ​ບໍ່​ຢຸດ​ຢັ້ງ.

(ນາງ ອາ​ລິນ ສຸ​ພິມ​ມະ​ປະດິດ)