ຮອງປະທ່ານສະພາແຫ່ງຊາດ ສືບຕໍ່ລົງເຄື່ອນໄຫວ ທີ່ແຂວງ ຜົ້ງສາລີ
27/02/2019

(ສພຊ) ວັນຈັນ 18 ກຸມພາຜ່ານມາ, ທີ່ສະພາປະຊາຊົນແຂວງ (ສພຂ) ຜົ້ງສາລີ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຮອງປະທານກໍາມາທິການບັນດາເຜົ່າ, ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ຮອງປະທານກໍາມາທິການການຕ່າງປະເທດ ສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຮັດວຽກຮ່ວມກັບທ່ານ ບົວທອງ ອຸແສງຄໍາ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ປະທານ ສພຂ  ແລະ ບັນດາພະແນກການທີ່ກ່ຽວຂ້ອງຂອງແຂວງຜົ້ງສາລີ.

ຈຸດປະສົງແມ່ນເພື່ອເປັນການເກັບກໍາຂໍ້ມູນໃຫ້ແກ່ກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ VIII ທັງເປັນການຮັບປະກັນໃຫ້ແກ່ການເຄື່ອນໄຫວຕິດຕາມ, ກວດກາ, ເກັບຂໍ້ມູນ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII, ນິຕິກໍາໃຕ້ກົດໝາຍ ໃນຂົງເຂດວຽກງານ ປກຊ-ປກສ, ວຽກງານການຕ່າງປະເທດ ແລະ ວຽກງານຊົນເຜົ່າ-ສາສະ ໜາ ໃຫ້ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍ.

ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານຈາກອົງການແນວລາວສ້າງຊາດແຂວງ, ອົງການໄອຍະການປະຊາຊົນແຂວງ, ກອງບັນຊາການປ້ອງກັນຄວາມສະຫງົບແຂວງ,  ກອງບັນຊາການທະຫານແຂວງ, ພະແນກອຸດສະຫະກໍາ ແລະ ການຄ້າ ແລະ ພະແນກການຕ່າງປະເທດແຂວງ ເຊິ່ງສັງລວມໄດ້ດັ່ງນີ້: ທົ່ວແຂວງຜົ້ງສາລີ ປະກອບມີ 15 ຊົນເຜົ່າ ແລະ 34 ແຊງ; ສະພາບການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມເປັນຕົ້ນແມ່ນບັນຫາຢາເສບຕິດ, ການລັກລອບປູກຝິ່ນ, ການລັກລອບໃຊ້ອາວຸດລ່າເນື້ອ, ການແຕ່ງງານກັບຄົນຕ່າງປະເທດ ເຊິ່ງປະຈຸບັນຄົນລາວແຕ່ງງານກັບຊາວຈີນບໍ່ຖືກກົດຫມາຍ 169 ຄົນ; ມີການເຂົ້າ-ອອກຕາມຊາຍແດນ, ການລັກລອບຕັດໄມ້ ແລະ ການທຳມາຫາກິນຂອງປະຊາຊົນຕາມແລວຊາຍແດນ, ການລວງລະເມີດກົດຫມາຍຊາຍແດນ, ການພັດທະນາເຂດ 3 ແຈປະເທດລາວ-ຫວຽດນາມ-ຈີນ ຢູ່ຈຸດຫລັກຫມາຍຫລັກເບີ 0 ໃຫ້ກາຍເປັນແຫລ່ງທ່ອງທ່ຽວ, ການຍົກຍ້າຍຕັ້ງພູມລຳເນົາມີສອງບ້ານຢູ່ເມືອງໃຫມ່ຄື: ບ້ານຫ້ວຍໄລ ແລະ ບ້ານນານ້ອຍ ຈຳນວນ 300 ຄົນ ແລະ ແຕ່ງງານບໍ່ຖືກຕ້ອງຈຳນວນ 175 ຄົນ; ປະຈຸບັນລັດຖະບານໄດ້ຕົກລົງໃຫ້ສັນຊາດ ແລະ ກໍາລັງຈັດສັນພູມລໍາເນົາໃຫ້ຈຳນວນດັ່ງກ່າວ ແລະ ພວມຄົ້ນຄວ້າເກັບກຳຂໍ້ມູນສືບຕໍ່ສະເຫນີລັດຖະບານອີກ 8 ຄົນ, ແຮງງານຕ່າງປະເທດຖືປື້ມຜ່ານແດນນັກທ່ອງທ່ຽວເຂົ້າມາແຂວງຜົ້ງສາລີ ແລ້ວມາອອກແຮງງານໂດຍບໍ່ມີວີຊາ (VISA); ສະພາບການດຳເນີນການແກ້ໄຂຄະດີ, ການສຳນວນຄະດີສັ່ງຟ້ອງຂື້ນສານ ປະຈຸບັນມີ 1 ຄະດີທີ່ພົບຄວາມຍຸ້ງຍາກຄື: ຄະດີຢາເສບຕິດທີຕັດສິນໄປແລ້ວແຕ່ປະຕິບັດບໍ່ທັນໄດ້; ການດຳເນີນການຕັດສິນຄະດີຂອງສານປະຊາຊົນແຂວງ ແລະ ສະພາບການຄ້າຊາຍແດນ.

ໂອກາດດຽວກັນນີ້, ທ່ານ ພົທ ແສງນວນ ໄຊຍະລາດ ໄດ້ເນັ້ນໜັກໃຫ້ແຂວງຜົ້ງສາລີ ສືບຕໍ່ເພີ່ມທະວີການຄ້າຊາຍແດນໃຫ້ເປັນຂະບວນຟົດຟື້ນກວ່າເກົ່າ ໂດຍຊ່ວຍປະຊາຊົນຊອກຕະຫລາດເພື່ອສົ່ງອອກສິນຄ້າໃຫ້ສະດວກ, ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອໃຫ້ປະຊາຊົນສາມາດສົ່ງອອກຜະລິດຕະພັນກະສິກໍາຜ່ານດ່ານຊາຍແດນລາວ-ຈີນ ເຊິ່ງປະຈຸບັນຝ່າຍຈີນບໍ່ອະນຸຍາດປະຊາຊົນລາວນໍາສິນຄ້າເຂົ້າຈີນຜ່ານດ່ານປະເພນີ; ສືບຕໍ່ປະສານສົມທົບກັບບັນດາພາກສ່ວນຕ່າງໆ ເພື່ອເຮັດໃຫ້ການຖືສາສະໜາຖືກຕ້ອງຕາມລະບຽບກົດໝາຍ; ຂົງເຂດການໄກ່ເກ່ຍແກ້ໄຂຄະດີ ຕ້ອງມີການປະສານງານກັນໃຫ້ແໜ້ນແຟ້ນຕື່ມເພື່ອຕັດສີນ ແລະ ປະຕິບັດຄະດີຕ່າງໆໃຫ້ເດັດຂາດກວ່າເກົ່າ.

ກ່ອນໜ້ານີ້, ຄະນະຍັງໄດ້ໄປຢ້ຽມຢາມດ່ານປາງຫົກ ເມືອງໃຫມ່ ແຂວງຜົ້ງສາລີ ເຊິ່ງມີຊາຍແດນຕິດກັບ ແຂວງເຊີນລາ ສສ.ຫວຽດນາມ, ດ່ານປ່າຄ່າ ເມືອງບຸນເໜືອ ແຂວງຜົ້ງສາລີ ເຊິ່ງເປັນຊາຍແດນຕິດກັບເມືອງຫລາ ແຂວງຢູນານ ສປຈີນ ແລະ ຢ້ຽມຢາມສູນຄຸມຂັງແຂວງຜົ້ງສາລີ ເພື່ອຕິດຕາມກວດກາການປະຕິບັດວຽກງານຂອງເຈົ້າໜ້າທີ່ໆກ່ຽວຂ້ອງ, ເກັບກໍາຂໍ້ມູນສະພາບຄວາມຫຍຸ້ງຍາກ ຕະຫລອດຮອດບັນຫາຕ່າງໆທາງດ້ານສາສະໜາ, ການເຂົ້າ-ອອກຊາຍແດນທີ່ອາດບໍ່ຖືກຕ້ອງຕາມກົດໝາຍ, ການລະເມີດເສັ້ນຊາຍແດນເພື່ອລັກລອບຫາເຄື່ອງປ່າຂອງດົງ, ການຄ້າຂາຍຢາເສບຕິດ, ການຄ້າມະນຸດ, ຊອກຮູ້ກ່ຽວຊີວິດການເປັນຢູ່ຂອງປະຊາຊົນຢູ່ບໍລິເວນຊາຍແດນ, ສະພາບພາຍໃນສູນຄຸມຂັງ ແລະ ບັນຫາອື່ນໆ ເພື່ອເປັນຂໍ້ມູນ ແລະ ນໍາໄປປະສານຕໍ່ພາກສ່ວນກ່ຽວຂ້ອງ ເພື່ອແກ້ໄຂບັນຫາຕ່າງໆຢ່າງສົມເຫດສົມຜົນ.

 

(ບຸນເກີດ ວົງໄຊຍາ)