ຮອງປະທານ ສພຊ ເຄື່ອນໄຫວຢູ່ແຂວງ ຫລວງພະບາງ
20/02/2019

(ສພຊ) ເພື່ອເປັນການເກັບກໍາຂໍ້ມູນໃຫ້ແກ່ກອງປະຊຸມໃຫຍ່ຄັ້ງທີ 7 ຂອງສະພາແຫ່ງຊາດຊຸດທີ VIII ພ້ອມທັງເປັນການຮັບປະກັນໃຫ້ແກ່ການເຄື່ອນໄຫວຕິດຕາມ, ກວດກາ, ເກັບຂໍ້ມູນ ແລະ ຊຸກຍູ້ການຈັດຕັ້ງປະຕິບັດ ລັດຖະທໍາມະນູນ, ກົດໝາຍ, ມະຕິກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII, ນິຕິກໍາໃຕ້ກົດໝາຍ ໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການຕ່າງປະເທດ ແລະ ວຽກງານຊົນເຜົ່າ-ສາສະໜາ ໃຫ້ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍ; ໃນວັນສຸກທີ 15 ກຸມພາ 2019 ທີ່ສະພາປະຊາຊົນແຂວງ (ສພຂ) ຫລວງພະບາງ, ນະຄອນຫລວງພະບາງ ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ ພ້ອມດ້ວຍຮອງປະທານກໍາມາທິການບັນດາເຜົ່າ, ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ຮອງປະທານກໍາມາທິການການຕ່າງປະເທດ ສະພາແຫ່ງຊາດ ພ້ອມດ້ວຍຄະນະ ໄດ້ເຮັດວຽກຮ່ວມກັບ ສພຂ ຫລວງພະບາງ ແລະ ບັນດາພະແນກການທີ່ກ່ຽວຂ້ອງຂອງແຂວງຫລວງພະບາງ.

ໃນການລົງເຄື່ອນໄຫວຄັ້ງນີ້, ໄດ້ຮັບຟັງການລາຍງານຈາກບັນດາພະແນກການຕ່າງໆຂອງແຂວງ ແລະ ທ່ານຮອງປະທານສະພາແຫ່ງຊາດ ໄດ້ມີຄໍາຖາມເຈາະຈີ້ມຕໍ່ບົດລາຍງານຕ່າງໆ ເຊິ່ງທ່ານໄດ້ສະເໜີໃຫ້ລາຍງານກ່ຽວກັບ ວຽກງານຊົນເຜົ່າ ແລະ ສາສະໜາ ວ່າມີບັນຫາໃດແດ່?, ວຽກງານສານ-ໄອຍະການ ການຕັດສິນຄະດີແລ້ວ ແລະ ການຈັດຕັ້ງປະຕິບັດຄໍາຕັດສິນຂອງສານຄືແນວໃດ?, ວຽກງານການຕ່າງປະເທດ ການເຂົ້າເມືອງຜິດກົດໝາຍໄດ້ມີມາດຕະການແກ້ໄຂຄືແນວໃດ?; ຈາກນັ້ນ, ບັນດາພະແນກການຂອງແຂວງໄດ້ລາຍງານໃຫ້ຊາບວ່າ: ຢູ່ແຂວງຫລວງພະບາງຍັງບໍ່ມີບັນຫາຂັດແຍ່ງດ້ານຊົນເຜົ່າ ແລະ ສາສະໜາ;   ມີການເຄື່ອນໄຫວກວດກາຊາຍແດນຢ່າງເປັນປົກກະຕິ ແຕ່ກໍຍັງມີການລັກເຂົ້າເມືອງຜິດກົດໝາຍຈໍານວນໜຶ່ງ, ​ເຈົ້າໜ້າທີ່ກ່ຽວຂ້ອງຍັງຂາດຄວາມເດັດຂາດໃນການແກ້ໄຂ; ຍັງມີຄວາມຫຍຸ້ງຍາກໃນການປ້ອງກັນຄວາມສະຫງົບ ໃນໂຄງການກໍ່ສ້າງເສັ້ນທາງລົດໄຟລາວ-ຈີນ ໂດຍສະເພາະການຄຸ້ມຄອງແຮງງານ; ປະຊາຊົນຈໍານວນໜຶ່ງຍັງຕັ້ງຖິ່ນຖານໃກ້ຊາຍແດນ, ຖາງປ່າຊະຊາຍ ສ້າງຄວາມຫຍຸ້ງຍາກໃນການກວດກາ, ປະຊາຊົນຈໍານວນໜຶ່ງຍັງລັກລ່າສັດປ່າ, ລັກຂ້າມຊາຍແດນເພື່ອຖາງປ່າເຮັດໄຮ່; ແລະ ຍັງມີປາກົດການຂ້າມແດນຜິດກົດໝາຍເພື່ອຕັ້ງພູມລໍາເນົາ.

ທ່ານ ແສງນວນ ໄຊຍະລາດ ໄດ້ມີຄໍາເຫັນໂອລົມຕໍ່ ສພຂ ແລະ ບັນດາພະແນກການຂອງແຂວງ; ເຊິ່ງທ່ານໄດ້ອະທິບາຍໃຫ້ຮູ້ເຖິງຄວາມສໍາຄັນຂອງແຂວງຫລວງພະບາງ ໂດຍສະເພາະນະຄອນຫລວງພະບາງ ເຊິ່ງເປັນເມືອງມໍລະດົກໂລກ ແລະ ເປັນເມືອງທ່ອງທ່ຽວທີ່ສໍາຄັນ;   ພ້ອມນັ້ນ, ທ່ານຍັງໄດ້ເນັ້ນໜັກໃຫ້ທຸກພາກສ່ວນເອົາໃຈໃສ່ ເພີ່ມທະວີວຽກງານສຶກສາອົບຮົມການເມືອງແນວຄິດ ໂດຍອີງໃສ່ແນວທາງຂອງພັກເປັນຫລັກ, ຕ້ອງໄດ້ເຂົ້າໃຈຕື່ມ ກ່ຽວກັບບັນຫາສາສະໜາ ເຊິ່ງເປັນສິ່ງທີ່ປາສະຈາກບໍ່ໄດ້, ສາສະໜາແມ່ນໜຶ່ງຂອງໂຄງບົນທາງດ້ານຈິດວິນຍານ ເປັນທີ່ເພິ່ງທາງດ້ານຈິດໃຈຂອງຄົນເຮົາ ທຸກໆສາສະໜາລ້ວນແລ້ວແຕ່ສຶກສາອົບຮົມໃຫ້ຄົນໄປທາງທີ່ດີ, ແຕ່ອາດມີບາງກໍລະນີທີ່ອາດມີການສວຍໃຊ້ສາສະໜາໄປໃນທາງທີ່ບໍ່ດີຂອງກຸ່ມຄົນຈຳນວນໜຶ່ງ ບັນຫາສາສະໜາເປັນບັນຫາລະອຽດອ່ອນທີ່ສຸດ; ສໍາລັບວຽກໄອຍະການປະຊາຊົນ ແລະ ປກຊ-ປກສ ກ່ຽວກັບການແກ້ໄຂປາກົດການຫຍໍ້ທໍ້ ເຮັດແນວໃດກໍຕ້ອງໄປຕາມຂະບວນການຍຸຕິທໍາ ຕາມລະບຽບກົດໝາຍ ຫລີກລ້ຽງຄວາມຜິດພາດ ລົງໂທດຄົນດີທີ່ບໍ່ມີຄວາມຜິດ; ວຽກ ປກຊ-ປກສ ຕ້ອງຮັບປະກັນໄດ້ຄວາມເປັນສະຖຽນລະພາບທາງດ້ານຄວາມສະຫງົບປອດໄພ ຄວາມເປັນລະບຽບຮຽບຮ້ອຍຂອງບ້ານເມືອງ ໂດຍສະເພາະການບໍລິການການທ່ອງທ່ຽວ; ວຽກງານຂອງອົງການແນວລາວສ້າງຊາດ ແມ່ນອົງການທີ່ມີຄວາມສໍາຄັນນັບແຕ່ສະໄຫມຕໍ່ສູ້ປົດປ່ອຍຊາດຈົນຮອດປັດຈຸບັນໃນການເຕົ້າໂຮມຄວາມສາມັກຄີ; ວຽກງານການຕ່າງປະເທດຕ້ອງຮັກສາໄດ້ຄວາມສາມັກຄີພິເສດ ແລະ ການຮ່ວມມືຮອບດ້ານ ກັບ ສສ.ຫວຽດນາມ ແຕ່ຕ້ອງກໍາໃຫ້ໄດ້ ແລະ ຈໍາກັດໃຫ້ໄດ້ການລະເມີດເຂົ້າເມືອງທີ່ຜິດກົດໝາຍ.

ໃນໂອກາດດຽວກັນນີ້,  ຄະນະຍັງໄດ້ຢ້ຽມຢາມສູນກັກຂັງຜາໂອ ເພື່ອຕິດຕາມກວດກາການປະຕິບັດໜ້າທີ່ຂ້ອງອ້າຍນ້ອງເຈົ້າໜ້າທີ່ກ່ຽວຂ້ອງ ແລະ ຊີວິດການເປັນຢູ່ຂອງບັນດາຜູ້ຫລົງຜິດຢູ່ບັນດາສູນດັ່ງກ່າວ.