ສພຊ ຈັດພິທີປະກາດຮັບອຸດໜູນບຳນານ ຂອງພະນັກງານ
13/02/2019

(ສພຊ) ອີງຕາມມະຕິຂອງຄະນະປະຈໍາສະພາແຫ່ງຊາດ (ສພຊ)  ສະບັບເລກທີ 142/ຄປຈ, 143/ຄປຈ, 144/ຄປຈ, 145/ຄປຈ, ລົງວັນທີ 21 ພະຈິກ 2018 ວ່າດ້ວຍອະນຸມັດໃຫ້ພະນັກງານອອກພັກການ-ຮັບເງິນອຸດໜູນບໍານານ; ໃນວັນທີ 8 ກຸມພາ 2018 ຜ່ານມາ ສພຊ ໄດ້ຈັດພິທີປະກາດຮັບອຸດໜູນບໍານານຂອງພະນັກງານຢູ່ທີ່ຫ້ອງປະຊຸມຄະນະເລຂາທິການ ສພຊ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທນສະພາແຫ່ງຊາດ; ມີບັນດາທ່ານຄະນະພັກ, ຄະນະນໍາ, ພະນັກງານຫລັກແຫລ່ງພາຍໃນສະພາແຫ່ງຊາດ ແລະ ພະນັກງານບໍານານຈໍານວນໜຶ່ງເຂົ້າຮ່ວມ.

          ໃນພິທີ, ຜູ້ເຂົ້າຮ່ວມໄດ້ຮັບຟັງການອ່ານມະຕິຂອງຄະນະປະຈໍາ ສພຊ ວ່າດ້ວຍການອະນຸມັດໃຫ້ພະນັກງານອອກການ-ຮັບອຸດໜູນບໍານານ (ຈໍານວນ 4 ສະບັບ) ແລະ ຮັບຟັງການປະກອບຄໍາເຫັນ ຂອງບັນດາພະນັກງານຜູ້ທີ່ໄດ້ຮັບອຸດໜູນບໍານານໃນການດໍາລົງຊີວິດການເມືອງປະກອບສ່ວນສໍາຄັນເຂົ້າໃນວຽກງານຕະຫລອດໄລຍະຜ່ານມາ. ເພື່ອໃຫ້ຮຸ່ນຫລັງໄດ້ຖອດຖອນເອົາເປັນແບບຢ່າງ ແລະ ຕາງໜ້າຄະນະນໍາໄດ້ມີຄໍາເຫັນຕໍ່ບັນດາພະນັກງານອອກການ-ຮັບອຸດໜູນບໍານານ.

          ໂອກາດດັ່ງກ່າວ, ທ່ານຮອງປະທານ ສພຊ ໄດ້ໃຫ້ທິດຊີ້ນໍາໂອ້ລົມຕໍ່ກອງປະຊຸມວ່າ:  ໃນນາມສ່ວນຕົວໄດ້ຖືກມອບໝາຍຈາກທ່ານປະທານ ສພຊ ຝາກຄວາມຂອບອົກຂອບໃຈຮູ້ບຸນຄຸນທີ່ 4 ສະຫາຍໄດ້ປະກອບສ່ວນບູລະນະກົງຈັກ ສພຊ ໃຫ້ນັບມື້ນັບໄດ້ຮັບຄວາມເຂັ້ມແຂງຂຶ້ນ ໂດຍທ່ານໄດ້ອີງຕາມກົດໝາຍພະນັກງານລັດຖະກອນມາດຕາ 70 ເວົ້າເຖິງການຮັບອຸດໜູນບໍານານ ເຖິງເວລາແລ້ວທີ່ບັນດາສະຫາຍທັງ 4 ໄດ້ປະກອບສ່ວນເຮັດສໍາເລັດໜ້າທີ່ ແລະ ນໍາໃຊ້ສະຕິປັນຍາເຂົ້າໃນການຄວາມຮັບຜິດຊອບການເມືອງສໍາເລັດ ພັກ-ລັດ ຈຶ່ງມີນະໂຍບາຍໃຫ້ອຸດໜູນບໍານານໃຫ້ ແລະ ມີຜົນງານຄຸນງາມຄວາມດີໄວ້ໃຫ້ເປັນບົດແກ່ພະນັກງານໜຸ່ມນ້ອຍລຸ້ນສືບທອດ ນອກນັ້ນທ່ານຍັງໄດ້ເນັ້ນໜັກໃຫ້ບັນດາພະນັກງານທີ່ໄດ້ຮັບອຸດໜູນບໍານານ ແລະ ບັນດາພະນັກງານພາຍໃນ ສພຊ ໃຫ້ມີການຮັກແພງສາມັກຄີຊ່ວຍເຫລືອກັນຄືເກົ່າ ເຖິງວ່າຈະອອກບໍານານໄປແລ້ວ ກໍຂໍໃຫ້ຖ່າຍທອດບົດຮຽນວິຊາການ, ໃຫ້ຄໍາປຶກສາຫາລືວຽກງານທີ່ພະນັກງານຫລຸ້ນຫລັງໃຫ້ຄວາມສົນໃຈ.

          ຜູ້ທີ່ໄດ້ຮັບການອຸດໜູນບໍານານໃນງວດທີ 1 ປີ 2019 ນີ້ ປະກອບມີ 4 ສະຫາຍຄື ສະຫາຍ ຄໍາປຸ່ນ ເພັງທິລາດ, ສະຫາຍ ບຸນຕອງ ອິນທິລາດ, ສະຫາຍ ລັດສະໝີ ຄອນສະຫວັນ, ສະຫາຍ ເຮີເຊັງ ເຢຍປາວເຮີ.

(ສອນສັກ ວັນວິໄຊ)