ສະພາແຫ່ງຊາດສະຫຼຸບການເຄື່ອນໄຫວວຽກງານ ປະຈຳປີ 2018
11/02/2019

(ສພຊ) ໃນຕອນເຊົ້າວັນສຸກທີ 8 ກຸມພາຜ່ານມາ, ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະ​ຄອນ​ຫລວງ​ວຽງຈັນ ໄດ້ມີພິທີສະຫລຸບການເຄື່ອນໄຫວວຽກງານພາຍໃນສະພາແຫ່ງຊາດ (ສພຊ) ແລະ ຍ້ອງຍໍຜົນງານ ປະຈໍາປີ 2018; ພາຍໃຕ້ການເປັນປະທານຂອງທ່ານນາງ ປານີ ຢາທໍ່ຕູ້ ປະທານ ສພຊ; ເຂົ້າຮ່ວມມີບັນດາທ່ານຮອງປະທານ ສພຊ, ປະທານ-ຮອງປະທານກໍາມາທິການ, ຄະນະເລຂາທິການ, ຄະນະກົມ, ຄະນະພະແນກ ຕະຫລອດຮອດພະນັກງານລັດຖະກອນທັງໝົດພາຍໃນ ສພຊ.

          ໃນພິທີ, ໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານພາຍໃນຂອງສະພາແຫ່ງ ຊາດ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ເຊິ່ງເຫັນໄດ້ດ້ານດີ, ຜົນສໍາເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ; ຈາກນັ້ນ, ກໍໄດ້ວາງທິດທາງແຜນການ ເຄື່ອນໄຫວວຽກງານໃນປີ 2019 ເພື່ອຮັບປະກັນໃຫ້ການຈັດຕັ້ງປະຕິບັດໜ້າທີ່ວຽກງານຂອງບັນ ດາກົງຈັກການຈັດຕັ້ງພາຍໃນ ສພຊ ໃຫ້ມີຄຸນນະພາບສູງ ຈຶ່ງໄດ້ກໍານົດທິດທາງແຜນການເຄື່ອນ ໄຫວວຽກງານຂອງຕົນ ເຊິ່ງມີມາດຕະການຈັດຕັ້ງປະຕິບັດ ຄື: ເພີ່ມທະວີການສຶກສາອົບຮົມການ ເມືອງ-ແນວຄິດດ້ວຍຮູບການຕ່າງໆ ເປັນຕົ້ນການເຜີຍແຜ່ເອກະສານສໍາຄັນຂອງພັກ-ລັດ, ສະພາແຫ່ງຊາດ ແລະ ນິຕິກໍາກ່ຽວຂ້ອງທີ່ພົວພັນກັບການປະຕິບັດພາລະບົດບາດຂອງແຕ່ລະພາກສ່ວນພາຍໃນສະພາແຫ່ງຊາດ, ຕິດພັນກັບການດໍາເນີນຊີວິດການເມືອງ, ສ່ອງແສງລາຍງານເຄື່ອນໄຫວວຽກງານ, ຕໍານິ-ສົ່ງຂ່າວເຊິ່ງກັນ ແລະ ກັນ ໃຫ້ເປັນປົກກະຕິ; ເພີ່ມທະວີການຊີ້ນໍາ-ນໍາພາຂອງຄະ ນະພັກ, ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະເລຂາທິການ ແລະ ກົງຈັກທີ່ ຄະນະປະຈໍາສ້າງຕັ້ງ ຕໍ່ກົງຈັກເສນາທິການຂອງຕົນ ດ້ວຍການປັບປຸງຄຸນນະພາບການເຄື່ອນໄຫວ ວຽກງານ ເປັນຕົ້ນການກໍານົດແຜນການ, ຊຸກຍູ້, ຕິດຕາມກວດກາຕໍ່ວຽກງານທີ່ມອບໝາຍ ແລະ ເພີ່ມທະວີບົດບາດຂອງຄະນະກວດກາພັກ-ລັດ ສພຊ; ສືບຕໍ່ຄົ້ນຄວ້າ, ປັບປຸງກົງຈັກການຈັດຕັ້ງໃຫ້ມີຄວາມສອດຄ່ອງ ແລະ ສາມາດຈັດຕັ້ງປະຕິບັດໜ້າທີ່ການເມືອງຢ່າງມີປະສິດທິຜົນບົນຈິດໃຈກະທັດຮັດ, ປະຢັດ ແລະ ຫລີກລ້ຽງການຊໍ້າຊ້ອນສິດ-ໜ້າທີ່ເຊິ່ງກັນ ແລະ ກັນ; ເອົາໃຈໃສ່ ປັບປຸງການບໍລິການ-ບໍລິຫານຮັບໃຊ້ ໃຫ້ມີຄຸນນະພາບສູງຂຶ້ນ ເຊັ່ນ: ການນໍາໃຊ້ເຄື່ອງມືທີ່ທັນສະໄໝເຂົ້າໃນການຈັດຕັ້ງປະຕິບັດວຽກງານ ເພື່ອເປັນການປະຢັດງົບປະມານ, ອໍານວຍຄວາມສະດວກດ້ານຕ່າງໆໃຫ້ແກ່ການຈັດຕັ້ງປະຕິບັດວຽກງານໃນແຕ່ລະຂົງເຂດ; ເອົາໃຈໃສ່ປະຕິບັດລະບອບແບບແຜນວິທີເຮັດວຽກຕາມທີ່ໄດ້ກໍານົດໃນກົດໝາຍ ແລະ ນິຕິກໍາຕ່າງໆ ເປັນຕົ້ນກໍານົດໃນແຜນການເຄື່ອນໄຫວວຽກງານ, ການສະຫລຸບລາຍງານສ່ອງສອງ ແລະ ການປະສານງານພາຍໃນ ສພຊ ດ້ວຍກັນ ແລະ ລະຫວ່າງ ສພຊ ກັບພາກສ່ວນພາຍນອກ ເພື່ອສ້າງສິ່ງອໍານວຍຄວາມສະດວກໃນການເຮັດສໍາເລັດໜ້າທີ່ການເມືອງຂອງແຕ່ລະພາກສ່ວນ; ຈາກ​ນັ້ນ, ກອງປະຊຸມຍັງໄດ້ຮັບຟັງຄໍາຄິດຄໍາເຫັນຂອງບັນດາທ່ານພະນັກງານ-ລັດຖະກອນພາຍໃນ ສພຊ.

          ໃນໂອກາດດຽວກັນນີ້, ກອງປະຊຸມຍັງໄດ້ຮັບຟັງການຜ່ານມະຕິຂອງຄະນະປະຈໍາສະພາ​ແຫ່ງຊາດ ແລະ ຂໍ້ຕົກລົງ ຂອງຄະນະເລຂາທິການສະພາ​ແຫ່ງຊາດ ກ່ຽວກັບການຍ້ອງຍໍຜົນງານຂອງກົມກອງ ແລະ ບຸກຄົນ ພາຍໃນ ສພຊ ປະຈໍາປີ 2018 ເຊິ່ງລວມມີທັງຫມົດ 316 ທ່ານ ຍິງ 132 ທ່ານ; ໃນນີ້, ມີໃບຍ້ອງຍໍຂັ້ນຄະນະປະຈໍາສະພາແຫ່ງຊາດໃຫ້ແກ່ກົມກອງການຈັດຕັ້ງ ພາຍໃນ ສພຊ 8 ກໍາມາທິການ, ຄະນະເລຂາທິການ ແລະ 3 ກົງຈັກທີ່ຄະນະປະຈໍາສະພາແຫ່ງຊາດສ້າງຕັ້ງ; ໃບຍ້ອງຍໍຂັ້ນຄະນະປະຈໍາສະພາແຫ່ງຊາດ ໃຫ້ພະນັກງານ-ລັດຖະກອນ ທັງໝົດ 127 ທ່ານ ຍິງ 39 ທ່ານ; ໃບຍ້ອງຍໍຂັ້ນຄະນະເລຂາທິການສະພາແຫ່ງຊາດ ທັງໝົດ 175 ທ່ານ ຍິງ 87 ທ່ານ; ໃບຊົມເຊີຍຂັ້ນຄະນະເລຂາທິການສະພາແຫ່ງຊາດ ທັງໝົດ 14 ທ່ານ ຍິງ 6 ທ່ານ.

​ໃນຕອນທ້າຍ, ທ່ານ ນາງ ປານີ ຢາ​ທໍ່ຕູ້ ໄດ້ມີ​ຄຳ​ເຫັນໂອ້ລົມ ​ແລະ ສະເໜີບາງມາດຕະການເພີ່ມເຕີມ ເພື່ອເຮັດໃຫ້ການຈັດຕັ້ງປະຕິບັດທິດທາງໜ້າທີ່ວຽກງານຈຸດສຸມ ປະຈໍາປີ 2019 ໃຫ້ບັນລຸຕາມຄາດໝາຍທີ່ວາງໄວ້ ຄື: ສະເໜີໃຫ້ບັນດາກໍາມາທິການ, ຄະນະເລຂາທິການ ກວດກາຄືນບັນດາກົດໝາຍຂອງ ສພຊ ຍັງມີມາດຕາໃດທີ່ບໍ່ທັນໄດ້ອອກນິຕິກໍາໃຕ້ກົດໝາຍ ກໍໃຫ້ຮີບຮ້ອນຮ່າງນິຕິກໍາດັ່ງກ່າວ, ພ້ອມທັງປັບປຸງບັນດານິຕິກໍາຄຸ້ມຄອງວຽກງານພາຍໃນ ສພຊ ໃນດ້ານຕ່າງໆໃຫ້ເປັນລະບົບຂຶ້ນ; ສືບຕໍ່ປະຕິບັດການປະເມີນຜົນການປະຕິບັດໜ້າທີ່ວຽກງານຂອງພະນັກງານ-ລັດຖະກອນ ໃຫ້​ເຂັ້ມ​ແຂງກວ່າເກົ່າ ເປັນຕົ້ນແມ່ນພະນັກງານທີ່ດໍາລົງຕໍາແໜ່ງບໍລິຫານປະເພດ 1 ລົງມາ ໃຫ້ຊັດເຈນ, ສຸມໃສ່ການປະຕິບັດຂະບວນການແຂ່ງຂັນ “ຮັກຊາດ ແລະ ພັດທະນາ” ຕ້ອງໄດ້ມີມາດຖານ, ເງື່ອນໄຂເພື່ອຄັດເລືອກໄດ້ພະນັກງານຜູ້ທີ່ມີຜົນງານດີເດັ່ນ ແລະ ມີການຍ້ອງຍໍເປັນປົກກະຕິ ໃນແຕ່ລະປີ; ສືບຕໍ່ເພີ່ມທະວີກົນໄກການປະສານງານ ລະຫວ່າງບັນດາກໍາມາທິການດ້ວຍກັນ, ລະຫວ່າງບັນດາກໍາມາທິການ ກັບຄະນະເລຂາທິການ ຫລື ລະຫວ່າງບັນດາກົມ, ສູນ ໃນການແກ້ໄຂບັນດາຂໍ້ຄົງຄ້າງຜ່ານມາໃຫ້ຕົກໄປ.

(ສົມນຶກ ແກ້ວໄຊຍະຈັກ)