ສະພາແຫ່ງຊາດ ເຊື່ອມຊືມມະຕິພັກ
11/02/2019

(ສພຊ) ​ເພື່ອ​ເປັນ​ການ​ຜັນ​ຂະຫຍາຍ​ເນື້ອ​ນ​ໃນ​ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 7 ສະ​ໄໝທີ X ​ໃຫ້​ມີ​ຄວາມໝາຍຄວາມ​ສຳຄັນ ​ແລະ ມີ​ເນື້ອ​ໃນ​ເລິກ​ເຊິ່ງ ​ໄດ້​ຮັບ​ການ​ເຜີຍ​ແຜ່​ຢ່າງ​ກວ້າງ​ຂວາງ​ທົ່ວ​ເຖິງທຸກ​ເປົ້າໝາຍ; ໃນວັນ​ທີ 7 ມັງກອນ​ຜ່ານ​ມາ ທີ່​ຫ້ອງ​ປະຊຸມ​ຄະນະ​ເລຂາທິການ​ສະພາ​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ ​ໄດ້​ມີ​ກອງ​ປະຊຸມ​ເຊື່ອມ​ຊຶມ​ມະຕິ​ກອງ​ປະຊຸມຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 7 ສະ​ໄໝທີ X. ​ໂດຍ​ການ​ເປັນ​ປະທານ​ຂອງສະ​ຫາຍ ພທ. ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະບໍລິຫານງານພັກສະພາ ແຫ່ງຊາດ, ຮອງ ປະ​ທານສະພາ​ແຫ່ງ​ຊາດ; ​ເຂົ້າ​ຮ່ວມມີ​ສະຫາຍ​ຮອງ​ປະທານ​ສະພາ​ແຫ່ງ​ຊາດ, ປະທານ​ກໍາມາທິການ, ບັນດາຄະນະກົມ, ຄະນະສູນ, ສະມາຊິກພັກສົມບູນ ແລະ ສຳຮອງ ຕະຫລອດຮອດພະ ນັກງານ-ລັດຖະກອນທັງຫມົດພາຍໃນສະພາແຫ່ງຊາດ.

​          ໃນ​ກອງ​ປະຊຸມ​ຄັ້ງ​ນີ້, ສະຫາຍ​ ພົທ. ແສງນວນ ໄຊຍະລາດ ໄດ້​ກ່າວ​ວ່າ: ຈຸດປະສົງ​ຂ​ອງການ​ເຜີຍ​ແຜ່​ກອງ​ປະຊຸມ​ຄັ້ງ​ນີ້ ກໍ​ເພື່ອເຮັດໃຫ້ສະມາຊິກພັກ-ພະນັກງານ, ລັດຖະກອນຂອງສະພາແຫ່ງຊາດ ໄດ້ຮັບຮູ້ ແລະ ເຂົ້າໃຈແຈ້ງກ່ຽວກັບສະພາບຄວາມຫຍຸ້ງຍາກ​ທາງດ້ານເສດຖະກິດ-ການເງິນ ຂອງປະ ເທດເຮົາທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ, ກໍາແໜ້ນ, ເຊື່ອມຊຶມ ແລະ ເປັນເອກະພາບຢ່າງສູງກັບທັດສະນະທິດທາງ, ວິທີການ ແລະ ມາດຕະການທີ່ສູນກາງພັກວາງອອກ, ສ້າງຄວາມຕັດສິນໃຈເດັດດ່ຽວແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນຕໍ່ໜ້າ; ທັງ ເປັນການຄົ້ນຄວ້າບັນດາມາດຕະການແທດເໝາະກັບຕົວຈິງ ແລະ ມີປະສິດທິຜົນສູງ ໃນການແກ້ໄຂ ສະພາບດັ່ງກ່າວ, ສ້າງຂະບວນການຈັດຕັ້ງປະຕິບັດຢ່າງແຂງແຮງ, ທົ່ວເຖິງກໍໃຫ້ເກີດມີການຫັນປ່ຽນ ຕົວຈິງທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງການພັດທະນາໃນດ້ານຕ່າງໆ ໃຫ້ ບັນລຸຄາດໝາຍທີ່ກອງປະຊຸມໃຫຍ່ ຄັ້ງທີ່ X ຂອງພັກວາງອອກ; ຍັງເປັນການແກ້ໄຂບັນຫາຄວາມ ຫຍຸ້ງຍາກທາງດ້ານເສດຖະກິດທີ່ຕິດພັນກັບການປັບປຸງຮາກຖານພັກ ໃຫ້ປອດໃສ, ເຂັ້ມແຂງ ແລະ ໜັກແໜ້ນ ກະກຽມເງື່ອນໄຂດ້ານຕ່າງໆ ເພື່ອດໍາເນີນກອງປະຊຸມໃຫຍ່ 3 ຂັ້ນຂອງພັກ.

          ​ໃນ​ກອງ​ປະຊຸມ​, ຜູ້​ເຂົ້າ​ຮ່ວມ​ໄດ້ຮັບ​ຟັງ​ 2 ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 7 ສະ​ໄໝທີ X ຄື: ມະຕິວ່າ​ດ້ວຍ​ການ​ເພີ່ມ​ທະວີ​ການ​ນຳພາ​ແກ້​ໄຂ​ຄວາມທຸກ​ຍາກ​ດ້ານ​ເສດຖະກິດ​-ການ​ເງິນ ​ແລະ ສ້າງ​ຄວາມ​ເຂັ້ມ​ແຂງ​ຂອງ​ການ​ຄຸ້ມ​ຄອງ​ມະຫາ​ພາກ ສະເໜີໂດຍ ສະຫາຍ ວິໄລວົງ ບຸດດາຄໍາ ກໍາມະການສູນກາງພັກ, ປະທານກໍາມາທິການ ເສດຖະກິດ ແຜນການ ແລະ ການລົງທຶນ ສະພາແຫ່ງຊາດ ​ແລະ ມະຕິ​ວ່າ​ດ້ວຍ​ການ​ປັບປຸງ​ຮາກ​ຖານ​ການ​ເມືອງຂອງ​ປະ​ບອບ​ປະຊາທິປະ​ໄຕ​ປະຊາຊົນ​ໃຫ້​ເຂັ້ມ​ແຂງ ​ແລະ ໜັກ​ແໜ້ນ ສະເໜີໂດຍ ສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງເລຂາຄະນະບໍລິຫານງານພັກ ສະພາແຫ່ງຊາດ ຮອງປະທານສະພາແຫ່ງຊາດ; ຫລັງ​ຈາກ​ນັ້ນ, ບັນດາຜູ້ເຂົ້າຮ່ວມກອງປະຊຸມ ໄດ້​ພ້ອມ​ກັນ​ປະກອບ​ຄຳ​ຄິດ​ຄຳ​​ເຫັນ​ຢ່າງ​ກົງ​ໄປ​ກົງ​ມາ, ພາວະ​ວິ​ໄສ ​ແລະ ຕົວ​ຈິງ​ຕໍ່​ບັນດາ​ມະຕິ​ດັ່ງກ່າວ ຕາມການເຈາະຈີ້ ແລະ ທິດຊີ້ນໍາຂອງປະທານກອງປະຊຸມ.

(ທຸງໄຊ ວິໄລພອນ)