ພົບປະສອງຝ່າຍສະພາແຫ່ງຊາດ ລາວ-ຮົງກາລີ
28/01/2019

(ສພຊ) ວັນທີ 21 ມັງກອນຜ່ານມາ, ທີ່ສະພາແຫ່ງຊາດ ໄດ້ມີການພົບປະສອງຝ່າຍລະຫວ່າງສະພາແຫ່ງຊາດ ແຫ່ງ ສປປລາວ ກັບ ສະພາແຫ່ງຊາດ ແຫ່ງ ສ.ຮົງກາລີ ເຊິ່ງຝ່າຍລາວນໍາໂດຍທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ແຫ່ງ ສປປລາວ ແລະ ຝ່າຍຮົງກາລີນໍາໂດຍ ທ່ານ  ອິສທວານ ຈໍກອບ ຮອງປະທານສະພາແຫ່ງຊາດ ​ແຫ່ງ ສ. ຮົງ​ກາລີ ໃນໂອກາດທີ່ເດີນທາງມາຢ້ຽມຢາມຢ່າງ​ເປັນທາງການຢູ່ ສປປລາວ ໃນລະຫວ່າງວັນທີ 20-23 ມັງກອນ 2018.

            ໃນການເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ຂອງທ່ານຮອງປະທານສະພາແຫ່ງຊາດຮົງກາລີໃນຄັ້ງນີ້ ກໍເພື່ອເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີງາມລະຫວ່າງ ສປປລາວ ແລະ ສ.ຮົງກາຮີ; ເພື່ອພົບປະແລກປ່ຽນບົດຮຽນ ແລະ ປະສົບການໃນການປະຕິບັດໜ້າທີ່ຂອງອົງການນິຕິບັນຍັດ ລະຫວ່າງສະພາແຫ່ງຊາດ ສປປລາວ ແລະ ສະພາແຫ່ງຊາດ ສ.ຮົງກາລີ; ພ້ອມກັນນັ້ນ, ກໍເພື່ອຮັບຟັງ ແລະ ແລກປ່ຽນບົດຮຽນນະໂຍບາຍການສົ່ງເສີມວິສາຫະກິດຂະໜາດນ້ອຍ ແລະ ກາງ (SME) ໃນຂົງເຂດກະສິກຳ ແລະ ຮັບຟັງນະໂຍບາຍຂອງ ສ.ຮົງກາລີ.

          ໃນການພົບປະ, ທັງສອງຝ່າຍໄດ້ແຈ້ງສະພາບເສດຖະກິດ-ສັງຄົມ ແລະ ການເຄື່ອນໄຫວ ປະຕິບັດວຽກງານຂອງອົງການນິຕິບັນຍັດຂອງຕົນໃຫ້ກັນ ແລະ ກັນຊາບໂດຍສັງເຂບ ​ເຊິ່ງໃນໄລຍະຜ່ານມາເຫັນໄດ້ວ່າທັງສອງປະເທດໄດ້ສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນ ແລະ ການຮ່ວມມືທີ່ດີນໍາກັນຕະຫລອດມາ ໂດຍໄດ້ມີການແລກປ່ຽນການຢ້ຽມຢາມ ແລະ ໄປມາຫາສູ່ກັນຢ່າງເປັນປົກກະຕິ ນັບແຕ່ການນໍາຂັ້ນສູງຂອງສອງປະເທດຈົນຮອດລະດັບວິຊາການ, ແຕ່ສູນກາງຮອດທ້ອງຖິ່ນ ​ແລະ ໄດ້ມີການຮ່ວມມືກັນໃນຫລາຍຂົງເຂດວຽກງານ ອັນພົ້ນເດັ່ນກວ່າໜູ່ແມ່ນການຮ່ວມມືຂົງເຂດການສຶກສາ, ການພັດທະນາຊັບພະຍາກອນມະນຸດ, ການພັດທະນາກະສິກຳຮອບດ້ານ, ການບໍລິຫານຈັດການຊັບພະຍາກອນນໍ້າ ແລະ ການສະໜັບສະໜູນໂຄງການເງິນກູ້ດອກເບ້ຍຜ່ອນຜັນ; ນອກຈາກນີ້, ສປປລາວ ຍັງໄດ້ຮັບທຶນການສຶກສາ 15 ທຶນ (ໄລຍະຍາວ 10 ທຶນ ແລະ ໄລຍະສັ້ນ 5 ທຶນ) ໃນປີ 2014-2015  ແລະ ເລີ່ມແຕ່ສົກປີ 2016-2017 ເປັນຕົ້ນມາໄດ້ຮັບທຶນການສຶກສາ 50 ທຶນຕໍ່ສົກປີ; ສໍາລັບການ​ພົວພັນ ​ແລະ​ ການ​ຮ່ວມ​ມື ລະຫວ່າງສະພາແຫ່ງຊາດລາວ ແລະ ສະພາແຫ່ງຊາດຮົງກາລີ ສອງອົງການນິຕິບັນຍັດໄດ້ພົວພັນ ແລະ ຮ່ວມມືນໍາກັນຢ່າງເປັນປົກກະຕິ ແລະ ຕໍ່ເນື່ອງ ເຊິ່ງສະແດງອອກ​ໃຫ້​ເຫັນ ຄື: ສອງອົງການໄດ້ມີການແລກປ່ຽນຄະນະຜູ້ແທນນໍາກັນ ເປັນຕົ້ນແມ່ນປະທານສະພາແຫ່ງຊາດລາວ ໄດ້ພົບປະຢ້ຽມຢາມສັນຖະວະ​ໄມຕີຢ່າງເປັນທາງການທີ່ຮົງກາລີ ໃນປີ 2010 ແລະ ປີ 2018, ທ່ານປະທານສະພາແຫ່ງຊາດ ສ.ຮົງກາລີ ໄດ້ຢ້ຽມຢາມ ສປປລາວ ຢ່າງເປັນທາງການໃນປີ 2008 ແລະ ປີ 2015, ໄດ້ມີ​ການແລກປ່ຽນຄະນະຜູ້ແທນລະດັບກຳມາທິການ, ຄະນະມິດຕະພາບລັດຖະສະພາລາວ-ຮົງກາລີ, ຮົງກາລີ-ລາວ; ພ້ອມ​ກັນ​ນີ້, ຍັງ​ໄດ້​ມີ​ການ​ແລກປ່ຽນຂໍ້​ມູນ-​ຂ່າວສານກ່ຽວ​ກັບ​ການຈັດ​ຕັ້ງ​ປະຕິບັດ​ພາລະ​ບົດບາດ​ນິຕິ​ບັນຍັດ​ນຳ​ກັນ, ​ ໃຫ້ການ​ສະໜັບສະໜູນ ​ແລະ ​ຊຸກຍູ້​ສອງ​ລັດຖະບານໃນ​ການຈັດ​ຕັ້ງ​ປະຕິບັດ​ບັນດາສັນຍາທີ່​ກ່ຽວຂ້ອງ​ໃນ​ຂົງ​ເຂດ​ເສດຖະກິດ-ການ​ລົງທຶນ, ການ​ໃຫ້​ທຶນ​ສຶກສາ​​, ​ການ​ສະໜອງ​ເງິນກູ້ ​ເພື່ອ​ສົ່ງ​ເສີມ​ໂຄງການ​ຮ່ວມ​ມື​ລາວ-ຮົງ​ກາລີ ​ແລະ ​ຂະ​ແໜງ​ການ​ອື່ນໆ.

          ເພື່ອສືບຕໍ່ການພົວພັນຮ່ວມມືລະຫວ່າງສະພາແຫ່ງຊາດ ສປປລາວ ແລະ ສະພາແຫ່ງຊາດ ສ.ຮົງກາລີ ໃຫ້ມີບາດກ້າວໃໝ່, ຝ່າຍລາວຈຶ່ງຂໍສະເໜີທິດທາງຮ່ວມມືໃນຕໍ່ໜ້າດັ່ງນີ້: ສືບຕໍ່ແລກປ່ຽນການຢ້ຽມຢາມ ແລະ ຖອດຖອນບົດຮຽນນໍາກັນ ລະຫວ່າງຄະນະຜູ້ແທນຂອງສອງສະພາແຫ່ງຊາດ ສປປລາວ ແລະ ສ.ຮົງກາລີ ໃນທຸກລະດັບນໍາກັນ; ສະເໜີໃຫ້ສອງອົງການນິຕິບັນຍັດຈົ່ງສະໜັບສະໜູນ ແລະ ຊຸກຍູ້ໃຫ້ລັດຖະບານຂອງສອງປະເທດ ສືບຕໍ່ຈັດຕັ້ງປະຕິບັດບັນດາສັນຍາ, ບົດບັນທຶກຄວາມເຂົ້າໃຈວ່າດ້ວຍການຮ່ວມມືທີ່ສອງລັດຖະບານໄດ້ລົງນາມຮ່ວມກັນ ໃຫ້ເປັນຮູບປະທໍາ ແລະ ມີປະສິດທິຜົນດີກວ່າເກົ່າ; ສະເໜີໃຫ້ມີການແລກປ່ຽນຂໍ້ມູນ-ຂ່າວສານໃນການຈັດຕັ້ງປະຕິບັດພາລະບົດບາດນິຕິບັນຍັດ ລວມທັງການສ້າງ ແລະ ປັບປຸງກົດໝາຍ ກໍຄືການເຝິກອົບຮົມບຸກຄະລະກອນ, ການຢ້ຽມຢາມທັດສະນະສຶກສາດ້ານວຽກງານທີ່ກ່ຽວຂ້ອງນຳກັນ; ເພີ່ມທະວີການສະໜັບສະໜູນ ແລະ ການຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.

          ໃນໂອກາດນີ້, ທ່ານ ອິສທວານ ຈໍກອບ ພ້ອມດ້ວຍຄະນະ ກໍໄດ້ເຂົ້າຢ້ຽມຂໍ່ານັບທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ສົມດີ ດວງດີ ຮອງນາຍົກລັດຖະມົນຕີ ແລະ ໄດ້ເຂົ້າຮ່ວມກອງປະຊຸມປາຖະກະຖາໃນຫົວຂໍ້: ນະໂຍບາຍທີ່ດິນ ແລະ ການສົ່ງເສີມ SME ໃນຂົງເຂດກະສິກຳ, ພ້ອມທັງຢ້ຽມຢາມພື້ນຖານເສດຖະກິດ-ວັດທະນະທໍາຈຳນວນໜຶ່ງ ຢູ່ນະຄອນຫລວງວຽງຈັນ ແລະ ແຂວງຫລວງພະບາງ.

(ສົມນຶກ ແກ້ວໄຊຍະຈັກ)