ສອງສະພາແຫ່ງຊາດລາວ-ຈີນ ແລກປ່ຽນບົດຮຽນການສ້າງ, ປັບປຸງກົດໝາຍ ແລະຕິດຕາມກວດກາ
18/01/2019

(ສພຊ) ວັນຈັນທີ 14 ມັງກອນ 2019, ທີ່ຫ້ອງປະຊຸມສະພາແຫ່ງຊາດ ໄດ້​ໄຂກອງປະຊຸມ ປາຖະກະຖາຂອງຄະນະຜູ້ແທນສະພາຜູ້ແທນປະຊາຊົນທົ່ວປະເທດຈີນ ໃຫ້ແກ່ບັນດາ​ທ່ານສະມາ ຊິກສະພາແຫ່ງຊາດ (ສສຊ)  ແລະ ສະມາຊິກສະພາປະຊາຊົນຂັ້ນແຂວງ (ສສຂ)  ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ແລະ ທ່ານ ສຸຍ ອ່ານ ປ່ຽວ ຄະນະປະຈໍາ, ກໍາມະການຄະນະກໍາມະການລັດຖະທໍາມະນູນ ແລະ ກົດໝາຍ, ຮອງຫົວໜ້າຄະນະກໍາມະການວຽກງານກົດໝາຍ ຂອງສະພາຜູ້ແທນປະຊາຊົນທົ່ວປະເທດຈີນ; ເຂົ້າຮ່ວມມີທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ບັນດາທ່ານ ສສຊ ແລະ ສສຂ, ຜູ້ແທນຈາກ ສປຈີນ, ເລຂາທິການ ສພຂ ພ້ອມດ້ວຍພາກສ່ວນທີ່ກ່ຽວຂ້ອງຂົ້າ​ຮ່ວມ.

        ກອງປະຊຸມປະຖາກະຖາຄັ້ງນີ້, ຈຸດປະສົງເພື່ອແລກປ່ຽນບົດຮຽນ, ປະສົບການໃນການຕິດ ຕາມກວດກາຂອງສະພາແຫ່ງຊາດ ຕໍ່ການແກ້ໄຂຜົນການກວດສອບຂອງລັດຖະບານ ເພື່ອແລກ ປ່ຽນບົດຮຽນ ແລະ ປະສົບການໃນການສ້າງ ແລະ ປັບປຸງກົດໝາຍ ໃຫ້ມີປະສິດທິຜົນຫລາຍຂຶ້ນ ກວ່າເກົ່າ ແລະ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງສະພາ ແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ.

ທ່ານປະທານກອງປະຊຸມ ໄດ້ມີຄໍາເຫັນກ່າວໄຂ ວ່າ: ການປາຖະກະຖາຂອງຄະນະຜູ້ແທນ ສະພາຜູ້ແທນປະຊາຊົນທົ່ວປະເທດຈີນ ນໍາພາໂດຍສະຫາຍ ສຸຍ ອ່ານ ປ່ຽວ ພ້ອມດ້ວຍຄະນະ ໃນຄັ້ງນີ້ ແມ່ນສ້າງເງື່ອນໄຂໃຫ້ບັນດາ ສສຊ ແລະ ສສຂ ໃນຂອບເຂດທົ່ວປະເທດ ໄດ້ຮັບຟັງບົດຮຽນ ດ້ານທິດສະດີ, ກົດໝາຍ ແລະ ພຶດຕິກໍາຂອງການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ໃນການສ້າງ ແລະ ປັບປຸງກົດໝາຍ; ການຕິດຕາມກວດກາຂອງສະພາແຫ່ງຊາດຕໍ່ກັບການແກ້ໄຂຜົນການກວດສອບ ​ເຊິ່ງວຽກງານດັ່ງກ່າວນັ້ນສໍາລັບສະພາແຫ່ງຊາດລາວ ເປັນພາລະໜ້າທີ່ໆສໍາຄັນ ແລະ ໄດ້ສູ້ຊົນຈັດຕັ້ງປະຕິບັດເປັນປົກກະຕິຕະຫລອດມາ ແຕ່ໝາກຜົນຂອງວຽກງານດັ່ງກ່າວ ບາງ ດ້ານຍັງບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງສະພາແຫ່ງຊາດ ໃນຖາ ນະທີ່ເປັນອົງການຕົວແທນຂອງປະຊາຊົນບັນດາເຜົ່າ; ສະນັ້ນ, ການປະຖະກະຖາຂອງຄະນະຜູ້ແທນສະພາຜູ້ແທນປະຊາຊົນທົ່ວປະເທດຈີນຄັ້ງນີ້ ຈະຊ່ວຍໃຫ້ບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງໄດ້ຮັບຮູ້ບົດຮຽນ, ຂັ້ນຕອນ, ວິທີການ ໃນວຽກງານດັ່ງກ່າວ ແລະ ນໍາໄປເປັນບົດຮຽນໃນການປັບປຸງວຽກງານຂອງຕົນ ໃຫ້ໄດ້ຮັບຜົນສໍາເລັດນັບມື້ນັບດີຂຶ້ນ; ທ່ານຍັງໄດ້ເນັ້ນໜັກຕື່ມວ່າ: ບັນດາເນື້ອໃນທີ່ນໍາມາປະຖະກະຖາຄັ້ງນີ້  ເປັນເນື້ອໃນທີ່ມີຄວາມສໍາຄັນ ແລະ ໄດ້ຮັບຄວາມເອົາໃຈໃສ່ກະກຽມຈາກຄະນະຜູ້ແທນສະພາຜູ້ແທນປະຊາຊົນທົ່ວປະເທດຈີນ ທີ່ມີຄວາມຮູ້ ​ແລະ ປະສົບປະການໃນວຽກງານດັ່ງກ່າວ. ສະນັ້ນ, ເພື່ອເຮັດໃຫ້ການດໍາເນີນກອງປະຊຸມປາຖະກະຖາໄດ້ຮັບຜົນດີ ສະເໜີໃຫ້ບັນດາທ່ານ ສສຊ,  ສສຂ ຈົ່ງໄດ້ສຸມເຫື່ອແຮງ, ສະຕິປັນຍາ ຕິດຕາມຮັບຟັງການສະເໜີບົດ, ຍົກເອົາບັນຫາທີ່ຍັງບໍ່ທັນເຂົ້າໃຈມາແລກປ່ຽນໃນກອງປະຊຸມ, ນໍາເອົາບັນຫາຄວາມຫຍຸ້ງຍາກທີ່ເກີດຂຶ້ນໃນການປະຕິບັດໜ້າທີ່ວຽກງານໃນຜ່ານມາ ແລກປ່ຽນກັບຄະນະຜູ້ແທນຂອງສະພາຜູ້ແທນປະຊາຊົນທົ່ວປະເທດຈີນ ເພື່ອຊອກຫາວິທີການແກ້ໄຂບັນຫາດັ່ງກ່າວ.

(ສົມນຶກ ແກ້ວໄຊຍະຈັກ)