ຮອງປະທານສະພາແຫ່ງຊາດ ເຂົ້າຮ່ວມພິທີໂຮມຊຸມນຸມສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ແຂວງບໍ່ແກ້ວ
18/01/2019

(ສພຊ) ຕອນເຊົ້າວັນອັງຄານ 15 ມັງກອນ 2019, ທ່ານ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ  ພ້ອມດ້ວຍຄະນະ ໄດ້ເຂົ້າຮ່ວມພິທີໂຮມຊຸມນຸມສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ  ທີ່ເດີ່ນກິລາປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ,​ ເຂົ້າຮ່ວມມີທ່ານ ບົວຄົງ ນາມມະວົງ ກໍາມະການສໍາຮອງສູນກາງພັກ ເລຂາຄະນະບໍລິການງານພັກແຂວງ ເຈົ້າແຂວງໆບໍ່ແກ້ວ; ມີບັນດາການນໍາຂອງແຂວງ, ບັນດາຄະນະພັກ-ຄະນະບັນຊາການກອງບັນຊາການທະຫານແຂວງບໍ່ແກ້ວ, ບັນດານາຍ ແລະ ພົນທະຫານ, ນາຍ ແລະ ພົນຕໍາຫລວດ, ຜູ້ຊົງຄຸນວຸດທິ, ອົງການປົກຄອງທ້ອງຖິ່ນ, ພະນັກງານນັກຮົບ, ບັນດານ້ອງນັກຮຽນ ຊາວໜຸ່ມ ເຍົາວະຊົນ, ຕະຫລອດຮອດພໍ່ແມ່ປະຊາຊົນທົ່ວແຂວງບໍ່ແກ້ວເຂົ້າຮ່ວມ ຢ່າງພ້ອມພຽງ.

ທ່ານ ບົວຄົງ ນາມມະວົງ ໄດ້ກ່າວຄໍາປາໄສຕໍ່ພິທີໂຮມຊຸມນຸມ ມີບາງຕອນສໍາຄັນວ່າ: ກອງທັບປະຊາຊົນລາວ ໄດ້ກໍາເນີດ ແລະ ເຕີບໃຫຍ່ພາຍໃຕ້ການຊີ້ນໍານໍາພາຂອງພັກປະຊາຊົນປະຕິວັດລາວ, ໄດ້ຮັບການສຶກສາອົບຮົມຈາກພັກ, ຍິ່ງຕີກໍຍິ່ງໄດ້ຮັບໄຊຊະນະ, ຍິ່ງຕໍ່ສູ້ກໍຍິ່ງເຕີບໃຫຍ່ເຂັ້ມແຂງ, ການປະຕິວັດກ້າວຂຶ້ນຮອດບ່ອນໃດ ກອງທັບເຮົາກໍຂະຫຍາຍຕົວຮອດບ່ອນນັ້ນ, ເປັນກໍາລັງຫລັກແຫລ່ງ ຂອງຂະບວນການຕໍ່ສູ້ຂອງປະຊາຊົນ, ເພື່ອຄວາມເອກະລາດແຫ່ງຊາດ, ເພື່ອຄວາມສົມບູນພູນສຸກ ແລະ ຄວາມວັດ ທະນະຖາວອນຂອງປະເທດຊາດຢ່າງແທ້ຈິງ; ຕະຫລອດໄລຍະ 70 ປີ ກອງທັບປະຊາຊົນລາວ ໄດ້ປະຕິບັດໜ້າທີ່ປ້ອງ ກັນຊາດທົ່ວປວງຊົນຮອບດ້ານຂອງພັກ, ອອກແຮງກໍ່ສ້າງປັບປຸງກໍາລັງໃຫ້ເຕີບໃຫຍ່ເຂັ້ມແຂງໃນທຸກດ້ານ, ສ້າງຕັ້ງກອງພັນນ້ອຍ ກອງພັນໃຫຍ່ ກອງພົນ ແລະ ເຫລົ່າຮົບຕ່າງໆຂຶ້ນ ຫລາຍກົມກອງຢ່າງຕໍ່ເນື່ອງ, ພ້ອມກັນນັ້ນ ກໍໄດ້ສ້າງຕັ້ງວິທະຍາຄານ ໂຮງຮຽນ ເປັນບ່ອນຍົກລະດັບຂອງພະນັກງານນັກຮົບໃຫ້ມີຄວາມຮູ້ທີ່ແນ່ນອນ, ກໍາລັງທ້ອງຖິ່ນກໍໄດ້ຮັບການຍົກສູງຄຸນນະພາບທຸກດ້ານໃຫ້ໜັກແໜ້ນເຂັ້ມແຂງຂຶ້ນເປັນກ້າວໆ ສາມາດປົກປັກ ຮັກສາປະເທດຊາດໄວ້ຢ່າງໝັ້ນຄົງ, ເດັ່ນກວ່າໝູ່ແມ່ນຕ້ານການບຸກໂຈມຕີບຽດຢຶດຂອງພວກປະຕິການຢູ່ໃໝ່ ບ້ານກາງ ບ້ານສະຫວ່າງ ເມືອງປາກລາຍ ແລະ ເມືອງບໍ່ແຕນ ແຂວງໄຊຍະບູລີໃຫ້ປະລາໄຊ, ຕ້ານ ແລະ ສະກັດກັ້ນ ກົນອຸບາຍບຽດຢຶດຊາຍແດນໃຫ້ສິ້ນສຸດລົງ ສາມາດປົກປັກຮັກສາສະຖຽນລະພາບທາງດ້ານການເມືອງໄວ້ໄດ້ ຢ່າງໝັ້ນຄົງ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ; ນອກຈາກນັ້ນ ກອງທັບເຮົາໄດ້ປະຕິບັດ ທີ່ຕັ້ງຍຸດທະສາດຂອງພັກ ໃນການຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮັບດ້ານ ແລະ ປະກອບສ່ວນເຂົ້າໃນການແກ້ໄຂຄວາມທຸກຍາກຂອງປະຊາຊົນ ເປັນແບບຢ່າງໃນການເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ, ພ້ອມກັນນັ້ນ ກໍຮັກສາສາຍສໍາພັນ ສາມັກຄີພິເສດອັນເປັນມູນເຊື້ອ ໃນການຮ່ວມມືຮອບດ້ານກັບຫວຽດນາມ ກັບກອງທັບບັນດາປະເທດສັງຄົມນິຍົມ ຢ່າງແໜ້ນແຟ້ນ, ຕັ້ງໜ້າພົວພັນກັບກອງທັບບັນດາປະເທດອາຊຽນ ແລະ ກອງທັບບັນດາປະເທດເພື່ອນມິດອື່ນໆ ດ້ວຍຄວາມຊື່ສັດບໍລິສຸດຕໍ່ພັກ ຮັບໃຊ້ປະຊາຊົນຢ່າງສຸດໃຈຂອງກອງທັບ; ປະທານ ໄກສອນ ພົມວິຫານ ຜູ້ກໍ່ຕັ້ງ ກອງທັບປະຊາຊົນລາວ ໄດ້ເວົ້າວ່າ “ເວລາໃດ ກອງທັບກໍນໍາໜ້າທຸກວຽກງານ ເດັດດ່ຽວໜຽວແໜ້ນ ຜ່ານຜ່າທຸກອຸປະສັກສໍາເລັດທຸກໜ້າທີ່ ຕີຊະນະສັດຕູສຸກໂຕ ສົມແລ້ວທີ່ເປັນກໍາລັງແກ່ນສານທີ່ເຂັ້ມແຂງ ຂອງການປະຕິວັດ ເປັນເຄື່ອງມືອັນແຫລມຄົມຂອງພັກ”; ສໍາລັບກໍາລັງທະຫານແຂງບໍ່ແກ້ວ ກໍໄດ້ຕັ້ງໜ້າເຮັດສໍາເລັດ ໜ້າທີ່ການເມືອງຂອງຕົນຕະຫລອດມາ ເປັນຕົ້ນ: ໄດ້ປະກອບສ່ວນຕະຫລອດໄລຍະ 70 ປີ ແຫ່ງການຕໍ່ສູ້ກູ້ຊາດ ແລະ ກໍ່ສ້າງປັບປຸງກອງທັບ ກໍຄືໄລຍະ 43 ປີ ແຫ່ງການປະຕິບັດ 2 ໜ້າທີ່ຍຸດທະສາດ ໃນການປົກປັກຮັກສາ ແລະ ສ້າງສາ ພັດທະນາປະເທດຊາດ ກໍຄືແຂວງບໍ່ແກ້ວ, ເຖິງວ່າສັດຕູໄດ້ໃຊ້ທຸກກົນອຸບາຍ ທຸກເລ່ຫລ່ຽມເລິກແລບແນບນຽນ ແຕ່ພາຍໃຕ້ການນໍາພາໂດຍກົງຂອງຄະນະພັກແຕ່ລຂັ້ນ ກອງທັບກໍຄືກໍາລັງປະກອບອາວຸດ ໄດ້ພ້ອມກັບອໍານາດການປົກຄອງ ກໍາລັງກອງຫລອນປ້ອງກັນຕົວ ແລະ ປະຊາຊົນບັນດາເຜົ່າຊາວແຂວງບໍ່ແກ້ວ ໄດ້ເຊີດຊູມູນເຊື້ອພິລາດອາດຫານຂອງຊາດລາວວິລະຊົນ ກໍາລັງປະກອບອາວຸດຂອງແຂວງບໍ່ແກ້ວ ປະສານສົມທົບກັບກໍາລັງຫລວງບັນດາແຂວງອ້ອມຂ້າງ ແລະ ກອງຫລອນ ປກສ ເຄື່ອນໄຫວຕີສັດຕູ ໄດ້ຮັບໄຊຊະນະອັນໃຫຍ່ຫລວງໃນຫລາຍຂະບວນການ ຈັບສັດຕູ ແລະ ຢຶດອາວຸດທຸກຊະນິດຂອງສັດຕູໄດ້ຈໍານວນຫລວງຫລາຍ, ຂົນຂວາຍພາກສ່ວນເກາະຫ້ອຍ ແລະ ດໍາລົງຊີວິດເລື່ອນລອຍຢູ່ປ່າ ມາເປັນພົນລະເມືອງດີ, ເລີກຮື້ກຸ່ມຄົນບໍ່ດີທີ່ມີແຜນການກໍ່ຄວາມບໍ່ສະຫງົບ ແລະ ກຸ່ມເຄືອຂ່າຍຢາເສບຕິດຫລາຍຄັ້ງ ຢຶດຂອງກາງໄດ້ຈໍານວນຫລາຍ, ດໍາເນີນຄະດີຕາມລະບຽບກົດໝາຍ ປົກປັກຮັກສາຊີວິດຊັບສິນ ເຮືອນຊານບ້ານຊ່ອງ ແລະ ຜືນແຜນດິນອັນຄົບຖ້ວນ ອໍານາດອາທິປະໄຕ ໄວ້ໄດ້ຢ່າງໝັ້ນຄົງ.

ທ່ານ ແສງນວນ ໄຊຍະລາດ ຕາງໜ້າການນໍາຂັ້ນສູງກໍໄດ້ມີຄໍາເຫັນຕໍ່ພິທີໂຮມຊຸມນຸມ; ທ່ານໄດ້ສະແດງຄວາມພາກພູມໃຈ ເປັນຢ່າງຍິ່ງ ທີ່ໄດ້ຕາງໜ້າໃຫ້ສູນກາງພັກ ສະພາແຫ່ງຊາດ ລັດຖະບານ ເຂົ້າຮ່ວມພິທີສະເຫລີມສະຫລອງ ວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ທີ່ແຂວງບໍ່ແກ້ວ ເຊິ່ງເປັນວັນທີ່ສໍາຄັນຍິ່ງໃນປະຫວັດສາດຂອງຊາດລາວເຮົາ; ການສະເຫລີມສະຫລອງວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ໃນຕັ້ງນີ້ ແມ່ນດໍາເນີນໄປໃນບັນຍາກາດ ທົ່ວພັກ ທົ່ວກອງທັບ ແລະ ປວງຊົນເຮົາພວມເບີກບານມ່ວນຊື່ນຕໍ່ຜົນສໍາເລັດກອງສະໄໝ ແຫ່ງການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ມີຜົນສໍາເສັດໃນຫລາຍດ້ານທີ່ໜ້າຊື່ນຊົມ; ທ່ານຍັງໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ຄວາມສາມັກຄີຮັກແພງອັນສະໜິດສະໜົມຈາກສູນກາງພັກ ສະພາແຫ່ງຊາດ ລັດຖະບານມາຍັງບັນດາສະຫາຍ ພະນັກງານນັກຮົບ ແລະ ຜ່ານບັນດາສະຫາຍໄປຍັງຄອບຄົວຜູ້ເສຍຊີວິດ ຜູ້ບາດເຈັບ ເຈັບປ່ວຍ ບັນດາຄອບຄົວນາຍ ແລະ ພົນທະຫານ ທີ່ກໍາລັງປະຕິບັດໜ້າທີ່ຢູ່ເຂດທຸລະກັນດານ ແລະ ບັນດາສະຫາຍທີ່ອອກພັກຜ່ອນບໍານານ; ຂໍສະແດງຂໍ່ານັບຊົມເຊີຍ ແລະ ຍ້ອງຍໍສັນລະເສີນມາຍັງບັນດາສະຫາຍພະນັກງານນັກຮົບໃນທົ່ວກົມກອງ ທີ່ໄດ້ພ້ອມກັນເຮັດສໍາເລັດໜ້າທີ່ອັນມີກຽດສະຫງ່າຂອງຕົນ ຢ່າງສຸດອົກສຸດໃນ.

 

ໃນໂອກາດດັ່ງກ່າວ, ທ່ານຮອງປະທານສະພາແຫ່ງຊາດຍັງໄດ້ຕິດຕາມກວດກາ ການຕໍ່ເຕີມອາຄານ ສະພາປະຊາຊົນແຂວງບໍ່ແກ້ວ ແລະ ຢ້ຽມຢາມ ກອງບັນຊາການທະຫານແຂວງບໍ່ແກ້ວ ພ້ອມທັງມອບເຄື່ອງ ໃຫ້ກອງບັນຊາການທະຫານແຂວງບໍ່ແກ້ວ ປະກອບດ້ວຍ ເຄື່ອງຄອມພິວເຕີ 2 ຊຸດ, ຜ້າຫົ່ມກັນໜາວ ແລະ ອຸປະກອນກິລາຈໍານວນໜຶ່ງ ເພື່ອມອບໃຫ້ກອງບັນຊາການ ນໍາໄປແຈກຢາຍຕໍ່ໃຫ້ບັນດາກົມກອງກໍາລັງປ້ອງກັນຊາດ ພາຍໃນ ແຂວງບໍ່ແກ້ວ.