ສສຊ ພິຈາລະນາ-ຮັບຮອງ 3 ຮ່າງມະຕິ ການເຄຶ່ອນໄຫວວຽກງານ ສະພາແຫ່ງຊາດ
21/12/2018

ຂປລ. ວັນສຸດ​ທ້າຍ ຂອງ​ການ​ດຳ​ເນີນ​ ກອງ​ປະ​ຊຸມ​ສະ​ໄໝສາມັນ ​ເທື່ອ​ທີ 6 ຂອງ​ສະພາ​ແຫ່ງ​ຊາດ ​ຊຸດ​ທີ VIII ​ໃນຕອນ​ເຊົ້າ​ຂອງ​ວັນ​ທີ 21 ທັນວາ 2018, ບັນດາ​ສະມາຊິກ​ ສະພາ​ແຫ່ງ​ຊາດ ສສຊ ​ໄດ້​ສຸມ​ໃສ່​ປະກອບຄຳ​ຄິດ​ຄຳ​ເຫັນ​ໃສ່​ 3 ຮ່າງ​ມະຕິ​ ຄື: ການ​ເຄື່ອນ​ໄຫວ​ວຽກງານ​ ກາງ​ສະ​ໄໝ ຂອງ​ສະພາ​ແຫ່ງຊາດ 2016-2018, ​ແຜນວຽກຈຸດ​ສຸມ ປີ 2019 ​ແລະ ທິດ​ທາງ​ແຜນການ ​ຮອດ​ປີ 2020; ການ​ປະຕິບັດ​ແຜນ​ສ້າງ ​ແລະ ປັບປຸງ ກົດໝາຍ ​ໄລຍະ 3 ປີຜ່ານ​ມາ ​ແລະ ​ແຜນການ 2 ປີ​ທ້າຍ​ສະ​ໄໝ ສະພາ​ແຫ່ງ​ຊາດ​ ຊຸດ​ທີ VIII 2019-2020; ການ​ປະຕິບັດ​ສິດ ​ແລະ ໜ້າທີ່ ​ໃນ​ການ​ຕິດ ຕາມ​ກວດກາ 3 ປີ ຜ່ານມາ ​ແລະ ​ແຜນການ ປີ 2019 ຂອງ​ສະພາ​ແຫ່ງ​ຊາດ.

      ​​ເຖິງ​ວ່າໃນ​ໄລຍະ 3 ປີຜ່ານມາ ສະພາ​ແຫ່ງ​ຊາດ ​ໄດ້​ເອົາ​ໃຈ​ໃສ່​ ​​ເຄື່ອນ​ໄຫວ​ວຽກງານ​ຕ່າງໆ ​​ໂດຍ​ສະ​ເພາະ ການ​ຕົກລົງ​ບັນຫາ​ສຳຄັນ​ ພື້ນຖານ​ຂອງ​ປະ​ເທດ​ຊາດ, ລວມທັງ​ການ​ປະຕິບັດແຜນສ້າງ ​ແລະ ປັບປຸງ​ກົດໝາຍ ​ໃນ​ຂົງ​ເຂດ​ຕ່າງໆ​ ບັນລຸ 60%; ປະຕິບັດ​ສິດ ​ແລະ ໜ້າທີ່ ໃນ​ການ​ຕິດຕາມ​ກວດກາ ຢູ່​ໃນ​ທຸກ​ຄວາມ​ຮັບຜິດຊອບ​ຂອງ​ຕົນ ໄດ້​ຮັບ​ຜົນສຳ​ເລັດ​ຫລາຍ​ດ້ານກໍ​ຕາມ. ບັນດາ ສສຊ ທຸກ​ເຂດ​ເລືອກ​ຕັ້ງ ຍັງ​ມີ​ຄຳ​ເຫັນ​ທີ່​ຫລາກ​ຫລາຍ ​ເພື່ອ​ສະ​ເໜີ​ໃຫ້​ສະພາປັບປຸງ​ແກ້​ໄຂ ​ແລະ ​ເພີ່ມ​ທະວີ ບັນດາ​ວຽກງານ​ດັ່ງກ່າວ ​ໃຫ້​ມີ​ປະສິດທິ​ຜົນ​ສູງ​ກວ່າ​ເກົ່າ.