ສະພາແຫ່ງຊາດ ສະເໜີການເຄື່ອນໄຫວ ວຽກງານກາງສະໄໝ
20/12/2018

 ສະພາແຫ່ງຊາດສະເໜີການເຄື່ອນໄຫວວຽກງານກາງສະໄໝ (2016-2018) ແລະ ປີ 2018 ທິດທາງຮອດປີ 2020 ແລະ ແຜນວຽກງານຈຸດສຸມ ປະຈຳປີ 2019 ຂອງສະພາແຫ່ງຊາດ ຊຸດທີVIII; ການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍໄລຍະສາມປີ ແລະ ແຜນການສອງປີ ທ້າຍສະໄໝສະພາແຫ່ງຊາດຊຸດທີ VIII (2019-2020) ແລະ ສະພາບການຈັດຕັ້ງປະຕິບັດ ແລະ ໜ້າທີ່ຕິດຕາມກວດກາໃນໄລຍະຜ່ານມາ ແລະ ແຜນ ການຕິດຕາມກວດກາປະຈຳປີ 2019 ຂອງສະພາແຫ່ງຊາດ ແລະ ຮັບຟັງການປະກອບຄຳເຫັນຂອງສູນກາງແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນຕໍ່ບົດລາຍງານກ່ຽວກັບການເຄຶ່ອນໄຫວວຽກງານ ຂອງສະພາແຫ່ງຊາດ.ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ໃນວັນທີ 19 ທັນວານີ້ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ເພື່ອໃຫ້ ສສຊໄດ້ພ້ອມກັນປະກອບຄຳເຫັນໃສ່ເພື່ອເຮັດໃຫ້ມີເນື້ອໃນອຸດົມສົມບູນ,ສອດຄ່ອງ ແລະ ສາມາດນຳໄປຈັດຕັ້ງປະຕິບັດໄດ້ໃນຕໍ່ໜ້າຢ່າງມີປະສິດທິຜົນ ແລະ ສອດຄ່ອງ ກັບສະພາບການພັດທະນາເສດຖະກິດ-ສັງຄົມຂອງ ສປປ ລາວ ທ່ານນາງ ສີໃສ ລືເດດມູນ ສອນ ຮອງປະທານສະພາ ແຫ່ງຊາດ ໄດ້ເວົ້າວ່າ: ການ ເຄື່ອນໄຫວປະຕິບັດສິດ ແລະ ໜ້າທີ່ຂອງສະພາແຫ່ງຊາດ ໃນໄລຍະເຄິ່ງສະໄໝຜ່ານມາໄດ້ມີຜົນສຳເລັດຫຼາຍດ້ານ ເປັນຕົ້ນ ການປະຕິບັດແຜນສ້າງ ແລະ ປັບປຸງກົດໝາຍ, ເອົາໃຈໃສ່ພິຈາລະນາບັນຫາສຳຄັນຕ່າງໆ ຕາມພາລະບົດບາດຂອງຕົນ ກໍຄື ການຕົກລົງບັນຫາສຳຄັນພື້ນຖານຂອງປະເທດຊາດ, ການປະຕິບັດວຽກງານຕິດຕາມກວດກາ, ການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ, ລວມທັງການເຄື່ອນໄຫວວຽກງານຂອງ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ. ໂດຍຊີ້ໃຫ້ເຫັນວ່າ: ຜົນງານ ແຕ່ປີ 2016-2018 ໂດຍສະພາແຫ່ງຊາດ ຊຸດທີ VIII ສາມາດຮັບຮອງເອົາກົດໝາຍທັງໝົດ 63 ສະບັບ ເທົ່າ 60% ຂອງແຜນການ 5 ປີ. ໃນນີ້, ມີກົດໝາຍ ສ້າງໃໝ່ 27 ສະບັບ, ກົດໝາຍປັບປຸງ 36 ສະບັບ. ສຳລັບປີ 2018 ສ້າງ ແລະ ປັບປຸງກົດໝາຍໄດ້ 21 ສະບັບ, ເທົ່າກັບ 95% ຂອງແຜນການປີ ຊຶ່ງມີກົດໝາຍສ້າງໃໝ່ 15 ສະບັບ ແລະ ກົດໝາຍປັບປຸງ 6 ສະບັບ. ສະພາແຫ່ງຊາດ ໄດ້ມີຄວາມຮັບຜິດຊອບສູງ ໃນການຕົກລົງບັນຫາສຳຄັນຂອງຊາດ ຊຶ່ງໃນວາລະດຳເນີນກອງປະຊຸມ 6 ຄັ້ງຜ່ານມາ ມີທັງໝົດ 124 ເນື້ອໃນ ແລະ ໄດ້ມີມະຕິຮັບຮອງ 84 ສະບັບ; ສະເພາະ 2018 ໄດ້ພິຈາລະນາ 45 ເນື້ອໃນ ແລະ ມີມະຕິຮັບຮອງ 38 ສະບັບ. ໃນໄລຍະ 3 ປີຜ່ານມາ ສະພາແຫ່ງຊາດ ໄດ້ເອົາໃຈໃສ່ສົມທົບກັບພາກສ່ວນກ່ຽວຂ້ອງ ພິຈາລະນາຕໍ່ຄຳສະເໜີ, ຄຳຮ້ອງຂໍຄວາມເປັນທຳຂອງພົນ ລະເມືອງ ຊຶ່ງສາມາດແກ້ໄຂດ້ວຍຮູບການຕ່າງໆ ໄດ້ 2.086 ເລື່ອງ, ທັງມີການຕິດຕາມກວດກາ ວຽກງານຈຳນວນໜຶ່ງ ຕາມພາລະບົດບາດຂອງແຕ່ລະພາກສ່ວນ ເປັນຕົ້ນ ດ່ານສາກົນ, ການຍົກຍ້າຍພູມລຳເນົາ, ການແຕ່ງງານທີ່ບໍ່ຖືກຕ້ອງຕາມກົດໝາຍ ຢູ່ບາງແຂວງ ລຽບຕາມຊາຍແດນ, ການຄຸ້ມຄອງໂຮງຮຽນສາມັນກິນນອນຊົນເຜົ່າ, ວຽກງານສາສະໜາ, ການປະຕິບັດສິດ, ຜົນປະໂຫຍດຂອງແມ່ຍິງ, ເດັກນ້ອຍ ແລະ ອື່ນໆ ຊຶ່ງເຫັນວ່າການເຄື່ອນໄຫວຂອງບັນດາອົງການລັດທຸກຂັ້ນ ລວມທັງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຮັບການປັບປຸງດີຂຶ້ນ. ຮອງປະທານສະພາແຫ່ງຊາດ ກ່າວຕື່ມວ່າ: ເພື່ອຮັບ ປະກັນໃຫ້ແກ່ການຈັດຕັ້ງປະ ຕິບັດພາລະບົດບາດ, ສິດ ແລະ ໜ້າທີ່, ສະພາແຫ່ງຊາດ ໄດ້ຖືສຳຄັນໃນວຽກງານສ້າງຄວາມເຂັ້ມແຂງໃຫ້ແກ່ກົງຈັກ ແລະ ບຸກຄະລາກອນ ທັງສູນກາງ ແລະ ທ້ອງຖິ່ນ ຊຶ່ງໄດ້ມີການປັບປຸງ, ສັບຊ້ອນ ແລະ ການຝຶກອົບຮົມ ຍົກສູງຄຸນນະພາບ ໃຫ້ແກ່ພະນັກງານສະມາຊິກສະພາແຫ່ງຊາດເພື່ອຮອງຮັບການຂະຫຍາຍຕົວ ແລະ ອຳນວຍຄວາມສະດວກໃຫ້ແກ່ການເຄື່ອນໄຫວ ຂອງສະພາແຫ່ງຊາດໃນໄລຍະ ໃໝ່ ເຮັດໃຫ້ການປະກອບຄຳຄິດເຫັນ ຕໍ່ເນື້ອໃນຕ່າງໆທີ່ນຳມາພິຈາລະນາຢູ່ກອງປະຊຸມສະພາ ມີເນື້ອໃນທີ່ໜັກແໜ້ນ, ເປັນຂໍ້ທີ່ດີ ໃຫ້ແກ່ພາກສ່ວນທີ່ກ່ຽວຂ້ອງ ໄດ້ນຳໄປສືບຕໍ່ຄົ້ນຄວ້າປັບປຸງວຽກງານຂອງຕົນໃຫ້ດີຂຶ້ນກວ່າເກົ່າ. ສຳລັບການເຄື່ອນໄຫວຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ ຕະຫຼອດເຄິ່ງສະໄໝຜ່ານມາ ໄດ້ເອົາໃຈໃສ່ລົງເກັບກຳຂໍ້ມູນ, ຕິດຕາມກວດກາ ການປະຕິບັດລັດຖະທຳມະນູນ ແລະ ກົດໝາຍ ຢູ່ທ້ອງຖິ່ນ, ລົງພົບປະຜູ້ມີສິດເລືອກຕັ້ງ ເພື່ອນຳເອົາແນວທາງນະໂຍບາຍຂອງພັກ-ລັດໄປເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຫຼາຍຂຶ້ນ, ພ້ອມທັງນຳເອົາຄຳສະເໜີ ແລະ ຂໍ້ຄິດເຫັນ ທີ່ເປັນປະໂຫຍດ ຈາກປະຊາຊົນມາສະເໜີຂັ້ນເທິງ ພິຈາລະນາແກ້ໄຂຕາມຄວາມເໝາະສົມ. ຈາກນັ້ນ ສສຊ ໄດ້ຜັດ ປ່ຽນກັນຂຶ້ນປະກອບຄຳເຫັນ ໃສ່ໂດຍລວມແລ້ວແມ່ນເຫັນ ດີເປັນເອກະພາບແຕ່ມີບາງເນື້ອໃນຍັງບໍ່ທັນຈະແຈ້ງ ດັ່ງ ນັ້ນຈິ່ງໄດ້ສະເໜີໃຫ້ປັບປຸງບາງ ເນື້ອໃນເພື່ອເຮັດໃຫ້ມີ ເນື້ອໃນຮັດກຸມຄົບຖ້ວນຈະແຈ້ງ, ຖືກຕ້ອງ ແລະ ແທດເໝາະກັບການເຄື່ອນໄຫວວຽກງານ ໃນໄລຍະໃໝ່.