ສພຊ ຮັບຮອງເອົາຮ່າງກົດໝາຍວ່າດ້ວຍການລົດໄຟ ແລະ ທາບທາມກົດໝາຍວ່າດ້ວຍທີ່ດິນ
17/12/2018

(ສພຊ) ວັນ​ທີ 17-18 ທັນວາ 2018, ທີ່​ຫ້ອງ​ປະຊຸມ​ສະພາ​ແຫ່ງ​ຊາດ (ຫລັກ 6), ນະຄອນ ຫລວງ​ວຽງຈັນ ​ໂດຍ​ການ​ເປັນ​ປະທານກອງ​ປະຊຸມ​ຂອງ​ທ່ານ ສົມ​ພັນ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ ​ເຊິ່ງກ້າວເຂົ້າສູ່ອາທິດທີ 5 ​​ເຊິ່ງເປັນ​ອາທິດ​ສຸດ​ທ້າຍຂອງການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ VIII, ກອງປະຊຸມໄດ້ພິຈາລະນາ ແລະ ຮັບຮອງເອົາຮ່າງກົດໝາຍສ້າງໃໝ່ ​ແລະ ການທາບທາມຮ່າງ​ກົດໝາຍ ເຊິ່ງ​ໄດ້​ຮັບ​ຟັງ​ການສະ​ເໜີຮ່າງກົດໝາຍວ່າດ້ວຍການ​ລົດ​ໄຟ ​(ສ້າງ​ໃໝ່) ໂດຍ​ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ແລະ ຮ່າງກົດໝາຍວ່າ​ດ້ວຍ​ທີ່​ດິນ (ທາ​ບທາມ) ໂດຍ​ທ່ານ ສົມ​ມາດ ພົນ​ເສນາ ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ; ພາຍຫລັງຮັບຟັງການສະເໜີແລ້ວປະທານກອງປະຊຸມໄດ້ມີຄຳເຫັນເຈາະຈີ້ມ ແລະ ໃຫ້ທິດຊີ້ນຳໃນການປະກອບຄຳເຫັນ; ບັນດາສະມາຊິກສະພາແຫ່ງຊາດ (ສສຊ) ໄດ້ສຸມສະຕິປັນຍາຄົ້ນຄວ້າປະກອບຄຳຄິດຄຳເຫັນໃສ່ 2 ຮ່າງກົດໝາຍດັ່ງກ່າວຢ່າງມີເຫດມີຜົນ ແລະ ກົງໄປກົງມາ; ຈາກນັ້ນ, ຕາງໜ້າອະນຸກຳມະການສ້າງຮ່າງກົດໝາຍໄດ້ໃຫ້ຄວາມກະຈ່າງແຈ້ງຕໍ່ຄຳຊັກຖາມຂອງບັນດາທ່ານ ສສຊ.

ພ້ອມດຽວກັນນັ້ນ, ປະທານກອງປະຊຸມໄດ້ສະຫລຸບສັງລວມການປະກອບຄຳເຫັນ ແລ້ວສະເໜີໃຫ້ບັນດາທ່ານ ສສຊ ໃຊ້ສິດຂອງຕົນລົງຄະແນນສຽງຮັບຮອງເອົາຮ່າງກົດໝາຍວ່າ​ດ້ວຍ​ການ​ລົດ​ໄຟ (ສ້າງໃໝ່) ເຊິ່ງຜົນການລົງຄະແນນສຽງແມ່ນ ເຫັນດີ 111 ທ່ານ ຄິດ​ເປັນ 86%, ບໍ່ເຫັນດີ 16 ທ່ານ ຄິດ​ເປັນ 12%, ບໍ່ອອກສຽງ 2 ທ່ານ ຄິດ​ເປັນ 2%, ລວມ 129 ສຽງ ຄິດ​ເປັນ 100%; ສຳລັບ​ການ​ ທາ​ບທາມຮ່າງ​ກົດ​ໝາຍວ່າ​ດ້ວຍ​ທີ່​ດິນ ບັນດາ​ທ່ານ ສສຊ ໄດ້​ໃຫ້​ຄວາມສົນ​ໃຈ​ຫລາຍ​ກວ່າໝູ່ແມ່ນ​ບໍ່​ເຫັນ​ດີ​​ໃຫ້​ຕ່າງ​ປະທດ ບໍ່ວ່າ​ຈະ​ເປັນ​ບຸກຄົນ ຫລື ນິຕິບຸກຄົນ​ ມີ​ສິດ​ຊື້ສິດ​ໃນ​ການ​ນຳ​ໃຊ້​ທີ່​ດິນ​ຈາກ​ລັດ ​ແລະ ພົນລະ​ເມືອງ​ລາວ,  ການ​ຈັບຈອງ ​ແລະ ບຸກລຸກ​ທີ່​ດິນ, ການ​ອອກ​ໃບ​ຕາດິນ​ບໍ່ຖືກຕ້ອງ, ດິນ​ທີ່​ຖືກ​ອາ​ຍັດ​ແຕ່​ອອກ​ໃບ​ຕາດິນ​ໃຫ້, ການຈັດ​ປະ​ເພດ​ທີ່​ດິນ ​ແລະ ອື່ນໆ ເຊິ່ງທ່ານປະທານກອງປະຊຸມ ໄດ້ສະເໜີໃຫ້ອະນຸກໍາມະການປັບປຸງຮ່າງກົດໝາຍດັ່ງກ່າວ ນໍາເອົາຄຳເຫັນຂອງ ສສຊ ໄດຄົ້ນຄວ້າພິຈາລະນາ; ຮ່າງກົດໝາຍວ່າດ້ວຍທີ່ດິນ ຍັງຈະສືບຕໍ່ນໍາໄປທາບທາມຢູ່ຂັ້ນສູນກາງ ແລະ ທ້ອງຖິ່ນ ກ່ອນຈະນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນຄັ້ງຕໍ່ໄປ.

 

(ນາງ ສຸພາວັນ ຫອມສະນິດ)