ສ້າງຄວາມເຂັ້ມແຂງທາງດ້ານບຸກຄະລາກອນໃຫ້ແກ່ ກສຕສ
20/10/2017

(ສພຊ) ເພື່ອຍົກລະດັບຄວາມຮູ້ຄວາມສາມາດ, ສ້າງຄວາມເຂົ້າໃຈ ແລະ ຍົກສູງຄວາມ ສໍາຄັນຂອງວຽກງານສ້າງ ແລະ ປັບປຸງກົດໝາຍ ທັງເປັນພື້ນຖານໃຫ້ແກ່ສະມາຊິກສະພາແຫ່ງຊາດ ໃນການຄົ້ນຄວ້າ, ມີຄໍາເຫັນຕໍ່ຮ່າງກົດໝາຍໃນກອງປະຊຸມສະພາແຫ່ງຊາດ; ເພື່ອເຮັດໃຫ້ ພະນັກງານ, ລັດຖະກອນວິຊາການທີ່ເປັນເສນາທິການ ເຮັດວຽກຕິດພັນກັບການສ້າງ ແລະ ປັບປຸງ ກົດໝາຍ ໃຫ້ສາມາດກໍາແໜ້ນທາງດ້ານຫລັກການ ແລະ ວິທີການຕົ້ນຕໍໃນວຽກງານດັ່ງກ່າວ ຢ່າງເລິກເຊິ່ງ.

​ໃນວັນສຸກທີ 6 ຕຸລາ 2017 ທີ່ເມືອງວັງວຽງ ແຂວງວຽງຈັນ, ກອງປະຊຸມສໍາມະນາ ຍົກລະດັບຄວາມຮູ້ກ່ຽວກັບເຕັກນິການສ້າງ ແລະ ປັບປຸງນິຕິກໍາ ໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ພະນັກງານສະພາແຫ່ງຊາດ ໄດ້ໄຂຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ສາຍທອງ ແກ້ວດວງດີ ກໍາມະການຄະນະປະຈໍາ, ປະທານກໍາມາທິການກົດໝາຍ ສະພາແຫ່ງຊາດ; ເຂົ້າຮ່ວມມີບັນດາຮອງປະທານກໍາມາທິການກົດໝາຍ, ສະມາຊິກສະພາແຫ່ງຊາດ ທີ່ເປັນກໍາມະການກໍາມາທິການກົດໝາຍຈາກ 18 ເຂດເລືອກຕັ້ງທົ່ວປະເທດ, ຫົວໜ້າ-ຮອງຫົວໜ້າກົມ, ພະນັກງານ-ລັດຖະກອນວິຊາການພາຍໃນສະະພາແຫ່ງຊາດ.

ໃນກອງປະຊຸມ, ສໍາມະນາກອນໄດ້ຮັບຟັງການເຜີຍແຜ່ກົດໝາຍວ່າດ້ວຍ ການສ້າງນິຕິກໍາ ສະບັບເລກທີ 19/ສພຊ ລັງວັນທີ 12 ກໍລະກົດ 2012 ໂດຍທ່ານ ອໍາໄພ ຈິດມານົນ ຮອງປະທານ ກໍາມາທິການກົດໝາຍ; ໄດ້ຮັບຟັງການເຜີຍແຜ່ຄວາມຮູ້ພື້ນຖານ ກ່ຽວກັບການສ້າງ ແລະ ປັບປຸງນິຕິກໍາລຸ່ມກົດໝາຍ ໂດຍທ່ານ ນາງ ບຸນພອນ ເຮືອງມະນີ ຮອງປະທານກໍາມາທິການ ກົດໝາຍ; ສໍາມະນາກອນ ໄດ້ລົງເລິກເຕັກນິກຂອງການສ້າງ ແລະ ປັບປຸງນິຕິກໍາຂອງ ສປປລາວ ພ້ອມທັງໄດ້ຄົ້ນຄວ້າຮໍ່າຮຽນ ບົດຮຽນກ່ຽວກັບການສ້າງ ແລະ ປັບປຸງນິຕິກໍາຂອງຕ່າງປະເທດ.

ກອງປະຊຸມສໍາມະນາຄັ້ງນີ້ ໄດ້ດໍາເນີີນເປັນເວລາ 2 ວັນເຕັມ ເຊິ່ງໄດ້ອົດລົງໃນວັນເສົາ ທີ 7 ຕຸລາ 2017 ດ້ວຍຜົນສໍາເລັດຕາມລະດັບຄາດໝາຍ.