ຮອງປະທານ ສພຊ ຕ້ອນຮັບຄະນະຜູ້ແທນ ສະພາປະຊາຊົນ ແຂວງເຊສວນ
17/12/2018

(ສພຊ) ໃນຕອນບ່າຍຂອງວັນອັງຄານທີ 11 ທັນວາຜ່ານມາ ທີ່ສະພາແຫ່ງຊາດ (ສພຊ) ສະຫາຍ ນາງ ສີໃສ ລືເດດມູນສອນ ຮອງປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເສີນ ເຫວີນຫົວ (Mr. Chen Wenhua) ຮອງປະທານສະພາປະຊາຊົນແຂວງເຊສວນ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 11-12 ທັນວາ 2018.

          ທັງນີ້ກໍເພື່ອເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ແລະ ຕາມທິດ 4 ດີ ຄື: ເປັນເພື່ອນບ້ານທີ່ດີ, ສະຫາຍທີ່ດີ, ເປັນມິດທີ່ດີ ແລະ ຄູ່ຮ່ວມມືທີ່ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ເວົ້າລວມ, ເວົ້າສະເພາະແມ່ນລະຫວ່າງສອງອົງການນິຕິບັນຍັດ ລາວ-ຈີນ ໃຫ້ເຂົ້າສູ່ລວງເລິກ ແລະ ເກີດດອກອອກຜົນຍິ່ງໆຂຶ້ນ ທັງເພື່ອພົບປະແລກປ່ຽນບົດຮຽນ ລະຫວ່າງສະພາປະຊາຊົນແຂວງເຊສວນ, ສປຈີນ ແລະ ຄະນະຮັບຜິດຊອບວຽກງານເຂດເລືອກຕັ້ງ ຂອງສະພາແຫ່ງຊາດລາວ ກໍຄືການປະຕິບັດໜ້າທີ່ ແລະ ພາລະບົດບາດຂອງສອງອົງການນິຕິບັນຍັດ.

          ໂອກາດດັ້່ງກ່າວ, ສະຫາຍ ນາງ ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ ສະຫາຍ ເສີນ ເຫວີນຫົວ ພ້ອມດ້ວຍຄະນະ ທັງໄດ້ຕີລາຄາສູງຕໍ່ການເດີນທາງມາຢ້ຽມຢາມ ແລະ ພົບປະເຮັດວຽກຢູ່ ສປປລາວ ໃນຄັ້ງນີ້ ຖືເປັນຜົນສໍາເລັດອັນໃຫຍ່ຫລວງ ທັງເປັນການຢືນຢັນສືບຕໍ່ການຮ່ວມມືໃຫ້ເຂົ້າສູ່ລວງເລິກ ແລະ ມີປະສິທິຜົນຍິ່ງໆຂຶ້ນ.

ສະຫາຍ ເສີນ ເຫວີນ ຫົວ ກໍໄດ້ສະແດງຄວາມຂອບໃຈຕໍ່ສະຫາຍ ນາງ ສີໃສ ລືເດດມູນສອນ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງໄດ້ແຈ້ງໃຫ້ຮູ້ກ່ຽວກັບຈຸດປະສົງການເດີນທາງມາ ສປປລາວ ໃນຄັ້ງນີ້ ກໍເພື່ອສືບຕໍ່ສາຍພົວພັນການຮ່ວມມືຂອງສອງປະເທດໃຫ້ມີປະສິດທິຜົນເພີ່ມຂຶ້ນ ແລະ ໄດ້ພົບປະເຮັດວຽກຮ່ວມກັບສະຫາຍ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງສະພາແຫ່ງຊາດ ກ່ອນໜ້ານີ້, ຄະນະຜູ້ແທນສະພາປະຊາຊົນແຂວງເຊສວນໄດ້ພົບປະເຮັດວຽກຮ່ວມກັບຄະນະຜູ້ແທນສະພາແຫ່ງຊາດລາວ ຝ່າຍລາວນໍາໂດຍສະຫາຍ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງສະພາແຫ່ງຊາດ ແລະ ຝ່າຍແຂວງເຊສວນນໍາໂດຍສະຫາຍ ເສີນ ເຫວີນຫົວ ຮອງປະທານສະພາປະຊາຊົນແຂວງເຊສວນ, ມີຮອງປະທານກໍາມາທິການວັດທະນະທໍາ-ສັງຄົມ, ຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງ, ຫົວໜ້າກົມພົວພັນລັດຖະສະພາສອງຝ່າຍ, ຮອງຫົວໜ້າກົມວຽກງານສະມາຊິກສະພາແຫ່ງຊາດ ແລະ ພະນັກງານວິຊາການທິ່ກ່ຽວຂ້ອງເຂົ້າຮ່ວມ.

ໃນການພົບປະຄັ້ງນີ້, ທັງສອງຄະນະໄດ້ຮັບຟັງການລາຍງານສະພາບໂດຍຫຍໍ້ກ່ຽວກັບການພັດທະນາເສດຖະກິດ, ວັດທະນະທໍາ-ສັງຄົມຂອງ ສປປລາວ, ຮັບຟັງສະພາບການໂດຍສັງເຂບກ່ຽວກັບແຂວງເຊສວນ ສປຈີນ, ແລກປ່ຽນບົດຮຽນກ່ຽວກັບພາລະບົດບາດຂອງສະພາແຫ່ງຊາດໃນຖານະເປັນອົງການຕົວແທນຂອງປະຊາຊົນ ແລະ ບັນດາບັນຫາທີ່ຕ່າງຝ່າຍໃຫ້ຄວາມສົນໃຈ, ນອກນັ້ນ ຍັງໄດ້ພ້ອມກັນຕົກລົງຈະສືບຕໍ່ເສີມຂະຫຍາຍພົວພັນອັນພິເສດໃຫ້ນັບມື້ນັບດີຂຶ້ນກວ່າເກົ່າ ແລະ ຈະເພີ່ມທະວີການແລກປ່ຽນຄະນະຜູ້ແທນໄປມາຢ້ຽມຢາມເຊິ່ງກັນ ແລະ ກັນ ເພື່ອຖອດຖອນແລກປ່ຽນບົດຮຽນນໍາກັນ.

 

(ສອນສັກ ວັນວິໄຊ)