ສພຊ ຮັບຮອງເອົາກົດໝາຍວ່າດ້ວຍການປະກັນສຸຂະພາບ
17/12/2018

(ສພຊ) ວັນທີ 13 ທັນວາ 2018 ໂດຍການເປັນປະທານຂອງທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ VIII ໄດ້ພິຈາລະນາ ແລະ ຮັບຮອງເອົາກົດໝາຍວ່າດ້ວຍການປະກັນສຸຂະພາບ ​ເຊິ່ງ​ໄດ້ສະເໜີຄວາມເປັນມາ, ເຫດຜົນຄວາມຈໍາເປັນ ແລະ ໝາກຜົນທີ່ຈະໄດ້ຮັບ ໂດຍທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ.

ບັນດາສະມາຊິກສະພາແຫ່ງຊາດ (ສສຊ) ໄດ້ສຸມໃສ່ຄົ້ນຄວ້າປະກອບຄໍາຄິດຄໍາເຫັນໃສ່ຮ່າງກົດໝາຍດັ່ງກ່າວ ຕາມການເຈາະຈີ້ມ ແລະ ​ໃຫ້ທິດຊີ້ນໍາຂອງປະທານກອງປະຊຸມ ເຊິ່ງສ່ວນໃຫຍ່ແມ່ນໄດ້ສະແດງຄວາມຊົມເຊີຍ ແລະ ເຫັນດີເຫັນພ້ອມເປັນເອກະພາບຕໍ່ການສ້າງຮ່າງກົດໝາຍ ວ່າດ້ວຍການປະກັນສຸຂະພາບ ເຊິ່ງເຫັນວ່າມີເນື້ອໃນທີ່ລະອຽດ ຊັດເຈນ ແລະ ຈະແຈ້ງພໍສົມຄວນ, ແຕ່ກໍມີບາງບັນຫາທີ່ເຫັນວ່າຕ້ອງໄດ້ມີການປັງປຸງທາງດ້ານເນື້ອໃນໃຫ້ຄົບຖ້ວນ ຮັດກຸມຫລາຍກວ່າເກົ່າ ແລະ ຄວນກວມເອົາບາງນິຕິກໍາລຸ່ມກົດໝາຍທີ່ກ່ຽວຂ້ອງຕື່ມອີກ, ການນໍາໃຊ້ກອງທຶນການປະກັນສັງຄົມຄວນມີການກໍານົດລະອຽດຕື່ມ; ສສຊ ສ່ວນໃຫຍ່ໄດ້ມີຄຳເຫັນກ່ຽວກັບຄວາມສໍາຄັນຂອງການກວດກາສຸຂະພາບປະຈໍາປີ ແລະ ບັນຫາອື່ນໆ ເຊິ່ງກົດໝາຍວ່າດ້ວຍການປະກັນສຸຂະພາບ ແມ່ນມີຄວາມສໍາຄັນໃນການຮັກສາສຸຂະພາບຂອງທຸກຄົນໃນສັງຄົມ ບໍ່ວ່າຈະເປັນພະນັກງານ-ລັດຖະກອນ ຕະຫລອດຮອດປະຊາຊົນບັນດາເຜົ່າ ໂດຍສະເພາະປະຊາຊົນຜູ້ທຸກຍາກຂາດເຂີນ.

ພາຍຫລັງປະທານກອງປະຊຸມໄດ້ສະຫລຸບສັງລວມການປະກອບຄໍາເຫັນແລ້ວ ໄດ້ສະເໜີໃຫ້ບັນດາ​ທ່ານ ສສຊ ໃຊ້ສິດຂອງຕົນລົງຄະແນນສຽງຮັບຮອງເອົາຮ່າງກົດໝາຍວ່າດ້ວຍ ການປະກັນສຸຂະພາບ ເຊິ່ງລວມຄະແນນເຫັນດີ 103 ສຽງ ເທົ່າກັບ 95%, ບໍ່ເຫັນດີ 4 ສຽງ ເທົ່າກັບ 4% ແລະ ບໍ່ອອກສຽງ 1 ສຽງ ເທົ່າກັບ 1%; ໝາຍຄວາມວ່າ ຮ່າງກົດໝາຍດັ່ງກ່າວໄດ້ຖືກຮັບຮອງເອົາດ້ວຍສຽງສ່ວນຫລາຍ.